Padčas kancertu Hanny Łabkoŭskaj u Miadźviedzičach 13 žniŭnia. Tut i dalej — fota Maryny Vałasar
Sioleta ŭ prahramie fiestyvalu Ars Magna Organi ŭ Miadźviedzičach było zapłanavana 7 kancertaŭ. Piaty ź ich prajšoŭ zusim niadaŭna — 13 žniŭnia. Tvory znakamitych kampazitaraŭ vykanała arhanistka ź Minska Hanna Łabkoŭskaja. Prahučali miełodyi Johana Siebaśćiana Bacha, Nikałausa Brunsa, Marsela Dziupre, Aliŭje Miesijana i Siezara Franka.
Darečy, kancerty ŭ miežach fiestyvalu Ars Magna Organi prachodziać ciapier nie tolki ŭ Miadźviedzičach, ale taksama ŭ Pinsku i Viciebsku, dzie arhanizujucca na miascovym uzroŭni.
Arhanistka Hanna Łabkoŭskaja
Arhanizataram fiestyvalu ŭ Miadźviedzičach vystupiŭ Lachavicki rajvykankam. Nastupnyja vystupleńni adbuducca 27 žniŭnia i 10 vieraśnia. Uvachod na ŭsie kancerty — biaspłatny.
Arhan u Miadźviedzičach znachodzicca ŭ miascovym kaściole śviatych Apostałaŭ Piatra i Paŭła. Jon byŭ zbudavany ŭ 1912 hodzie vilenskim majstram Piatrom Vajciachovičam. Heta najbujniejšy instrumient, vykanany ŭ całkam ramantyčnym styli, što zachavaŭsia ŭ pieršapačatkovym vyhladzie.
Staražytny arhan u Miadźviedzičach (1912 hod)
Miadźviedzicki arhan ličycca taksama adnym z najbujniejšych arhanaŭ Biełarusi, jakija byli zbudavanyja da Pieršaj suśvietnaj vajny. Jon zajmaje druhoje miesca pa svajoj vieličyni siarod histaryčnych arhanaŭ Bresckaj vobłaści, a taksama treciaje — pa kolkaści rehistraŭ siarod usich adramantavanych histaryčnych arhanaŭ Biełarusi, sastupajučy tolki arhanam u Pinsku i Mścibavie.
Ź inicyjatyvaj adnavić arhan niekalki hadoŭ tamu vystupiŭ Lachavicki rajvykankam. Potym adbyłasia sustreča pradstaŭnikoŭ miascovych uładaŭ ź biskupam Pinskim Antonijem Dziamjankam, na jakoj i vyrašyli realizavać hetuju spravu.
Adnaŭleńnie arhana ŭ Miadźviedzičach, 2020 hod. Fotazdymki z fejsbuk-staronki Alaksandra Burdzialova
Ciaham 10 miesiacaŭ, z vosieni 2019-ha da leta 2020-ha, adbyvaŭsia ramont arhana, u jakim udzielničała 13 čałaviek — vałanciory-entuzijasty roznych prafiesij ź Miadźviedzičaŭ i ź inšych miaścin Biełarusi. Da ich dałučyŭsia, u tym liku, kolišni probašč parafii sv. Apostałaŭ Piatra i Paŭła, ks. Vincent Siaŭruk. Pracesam adnaŭleńnia kiravaŭ Alaksandr Burdzialoŭ, stvaralnik encykłapiedyi «Arhany Biełarusi».
Čytajcie taksama:
Śpiecyjalist nazvaŭ dźvie asnoŭnyja pryčyny, čamu ŭdałosia ŭratavać arhan u Budsłavie
