U sacyjalnych sietkach źjaviłasia vypiska z pratakoła taho pasiadžeńnia rady tvorčaha sajuza. Ź jaje vynikaje, što pasiadžeńnie adbyłosia 30 maja, i na im prysutničali 34 siabry rady z 50, jakija ŭ jaje ŭvohule ŭvachodziać. Vioŭ pasiadžeńnie staršynia rady Uładzimir Słabodčykaŭ.
Pieravažnaja bolšaść prysutnych siabroŭ rady, 32 čałavieki, padtrymali rašeńnie ab vyklučeńni palitviaźnia, tolki adzin čałaviek byŭ suprać i adzin ustrymaŭsia.
Farmalnaj pryčynaj dla vyklučeńnia Alesia Puškina i inšych mastakoŭ stała toje, što jany
«nie vypłačvajuć unioski bolš za dva hady, majuć zapazyčanaść pa apłacie za tvorčuju majsterniu bolš za šeść miesiacaŭ, za parušeńnie Etyčnych pravił siabroŭ HA «BSM», a taksama na inšych padstavach i normach Statuta HA «BSM».
Jakuju mienavita normu ź pieraličanych prymianili da Alesia Puškina, u vypiscy z pratakoła nie ŭdakładniajecca, śpis prysutnych na pasiadžeńni tvorcaŭ taksama pakul nieviadomy. Akramia Puškina, u toj dzień z sajuza vyklučyli, pa našych źviestkach, jašče dzieviaciarych mastakoŭ, siarod jakich viadomy dyzajnier Uładzimir Ceśler.
Aleś Puškin pra svajo vyklučeńnie, najchutčej, tak i nie daviedaŭsia: listy da palitviaźnia ŭ hrodzienskuju turmu apošnim časam praktyčna nie dachodzili, i zvarotnaj suviazi ź im nie było ciaham bolš jak dvuch miesiacaŭ.
U sakaviku 2022 hoda mastak byŭ asudžany da piaci hadoŭ kałonii strohaha režymu. Adbyvać pakarańnie jaho nakiravali ŭ papraŭčuju kałoniju ŭ Ivacevičach. Administracyja PK-22 inicyjavała pieravod Alesia Puškina ŭ turmu nibyta za sistematyčnyja parušeńni režymu ŭtrymańnia. Pa rašeńni suda mastaka pieraviali ŭ hrodzienskuju turmu №1, dzie jon musiŭ pravieści paŭtara hoda.
Unočy z 10 na 11 lipienia jaho pryvieźli z turmy ŭ reanimacyju hrodzienskaha špitala ŭ nieprytomnym stanie. Tam jon, pa nieaficyjnaj infarmacyi, skanaŭ ad nastupstvaŭ prabadnoj jazvy straŭnika: padčas apieracyi ŭ jaho spyniłasia serca. Mastaka pachavali na radzimie ŭ Babry Krupskaha rajona.
Jak stała viadoma paźniej, mocnyja boli ŭ Alesia Puškina pačalisia jašče ŭ siaredzinie červienia. Adnak turemnyja daktary abmiažoŭvalisia kapieječnymi abiazbolvalnymi srodkami i chacieli adpravić Puškina ŭ ŠIZA za simulacyju.
Boli narastali i narastali. Za try-čatyry dni da špitalizacyi boli ŭ Alesia Puškina stali niaścierpnymi, adnak jaho nie nakiravali ŭ haradski špital. Jamu stali davać tolki mocnyja abiazbolvalnyja srodki. Kali b Puškina pryvieźli choć na niekalki dzion raniej, chirurhi, imavierna, jaho ŭratavali b.
Miedčastkaj hrodzienskaj turmy kiruje Viktar Łutcaŭ.
Čytajcie taksama:
Fotafakt: Malunak turmy, zrobleny Alesiem Puškinym u 2012 hodzie
Hałoŭnaja tajamnica Alesia Puškina
«Niabačnyja» śviedki spravy Alesia Puškina. Chto danios na mastaka
«A tiepieŕ davajtie jeŝie raz, na normalnom jazykie». Što adbyvałasia z Alesiem Puškinym za kratami
Aleś Puškin: chto hety hienijalny mastak i palitviazień, što zhinuŭ u źniavoleńni
