Ilustracyjnaje fota: «Naša Niva»
Što źmianiajecca
Paśla źjaŭleńnia ŭ sakaviku 2019 hoda lhotnaj razmytnioŭki na aŭtamabili dla peŭnaj katehoryi hramadzian masava kuplać pryviezienyja aŭto ź Jeŭropy i ZŠA ŭ našaj krainie pačali i rasijanie. Z pačatkam poŭnamaštabnaj vajny va Ukrainie, adychodam z Rasii suśvietnych aŭtavytvorcaŭ i ŭviadzieńniem šeraha sankcyj popyt na aŭto ŭ Biełarusi z boku rasijan tolki pavialičyŭsia. Ale, jak kažuć zaŭsiodniki biznesu, pa mašyny da nas u bolšaści vypadkaŭ jechali nie šarahovyja aŭtaamatary, a mienavita rasijskija pierakupy, suprać jakich u tym liku i nakiravany novyja źmieny ŭ rasijskim zakanadaŭstvie.
Ad 1 žniŭnia ŭ Rasii nie tolki źmieniacca taryfy na ŭtylizacyjny zbor dla jurydyčnych asob, ale i mietad spahnańnia dla fizičnych asob.
Na biahučy momant utylizacyjny zbor dla fizičnych asob u RF navat mienšy za toj, što jość u Biełarusi. U nas za lehkavik da troch hadoŭ treba zapłacić 544 rubli (kala 160 jeŭra), ad troch da siami hadoŭ — 816 rubloŭ (kala 245 jeŭra) i 1225 rubloŭ (kala 370 jeŭra), kali aŭto starejšaje za siem hadoŭ.
U Rasii za aŭto da troch hadoŭ utylzbor dla fizičnych asob składaje 3400 rasijskich rubloŭ (kala 34 jeŭra), za aŭto, jakomu bolš za try hady, — 5200 rasijskich rubloŭ (kala 52 jeŭra).
Tak zvany lhotny taryf dla fizičnych asob zachavajecca i paśla 1 žniŭnia. Ale jość važny momant. Kali čałaviek zachoča pradać uviezieny z-za miažy aŭtamabil ciaham pieršaha hoda ad momantu ŭvozu, to dla taho, kab źjaviłasia mahčymaść źmianić ułaśnika, jamu daviadziecca zapłacić utylizacyjny zbor pa taryfie jurydyčnaj asoby.
A heta ŭžo zusim inšyja ličby. Za aŭtamabil da troch hadoŭ z ruchavikom da dvuch litraŭ treba budzie vykłaści 178 400 rasijskich rubloŭ (amal 1800 jeŭra). Kali mašynie ŭžo spoŭniłasia try hady, to ŭtylzbor składzie 313 800 rasijskich rubloŭ (bolš za 3000 jeŭra).
Z pavieličeńniem abjomu staŭka raście. Tak, naprykład, za čatyrochhadovy aŭtamabil z ruchavikom da 2000 sm³ achvotniku pierapradać aŭtamabil ciaham 12 miesiacaŭ paśla ŭvozu daviadziecca zapłacić 480 200 rasijskich rubloŭ (biez małoha 5000 jeŭra).
Takija źmieny ŭ zakanadaŭstvie zrobiać pieraprodaž tolki što pryviezienych aŭtamabilaŭ nie nadta vyhadnaj spravaj.
Siarod inšaha varta adznačyć, što lhotnyja staŭki buduć dziejničać tolki ŭ dačynieńni da aŭto z ruchavikom da troch litraŭ. Kali abjom ruchavika bolšy, to fizičnaj asobie adrazu daviadziecca płacić utylzbor na ŭzroŭni jurydyčnaj asoby. A heta ŭžo ad 2500 da 7000 jeŭra ŭ ekvivalencie. Tamu amataram aŭto ź vialikim abjomam u lubym vypadku daviadziecca raskašelicca.
Paciarpiać i biełaruskija pierahonščyki
Surazmoŭca ź liku aŭtabiznesoŭcaŭ, jaki zajmajecca pieraprodažam na RF darahich aŭto sa Štataŭ, ličyć, što takija źmieny niehatyŭna adabjucca na jaho dziejnaści.
«Reč u tym, što da nas z RF u asnoŭnym pryjazdžajuć nie kančatkovyja pakupniki, jakija biaruć aŭto dla sabie, a pierakupy. Jany kuplali aŭto ŭ Biełarusi, paśla vieźli jaho ŭ Rasiju, dzie rehistravali na svaju «viešałku», rabili elektronny techpašpart (PTS), siertyfikat, ustaloŭvali knopku SOS, bo biez hetaha ŭ RF nielha pastavić aŭtamabil na ŭlik. Navat kali jon pryviezieny ź Biełarusi», — tłumačyć surazmoŭca.
Pa jahonych słovach, mienavita praz davoli składanuju praceduru padrychtoŭki aŭto da rehistracyi mašyny ŭ bolšaści vypadkaŭ kuplali mienavitaja pradprymalnyja rasijanie, a nie kančatkovyja spažyŭcy.
Ilustracyjnaje fota: «Naša Niva»
«Rasijanie ŭ bolšaści svajoj vielmi lanivyja, im treba, kab usio było zroblena «pad kluč». Tamu sami jany redka da nas jeduć, bo kłopatu z takim aŭto davoli šmat. Im lepiej, kab usio za ich zrabili, a jany tolki pieraaformili ŭžo całkam hatovy aŭtamabil na siabie», — tłumačyć mužčyna.
Biznesmien ličyć, što praź źmieny ŭ rasijskim zakanadaŭstvie zajmacca pieraprodažam aŭto na RF stanie značna składaniej.
«I biez taho nie samy vialiki popyt, jaki my nazirajem apošnija miesiacy stanie jašče bolš kvołym. Možna čakać, što na niejki pieryjad cikavaść da aŭto z boku rasijan stanie blizkaj da nula», — ličyć mužčyna.
«Daviadziecca šukać inšyja schiemy i šlachi»
Biełaruskim i rasijskim aŭtabiznesoŭcam, jakija zajmalisia pieraprodažam aŭto ź ES i ZŠA, chutka daviadziecca pracavać pa novych praviłach, jakija, jak dumaje inšy naš surazmoŭca, usio adno nie spyniać hetaha biznesu.
«Daviadziecca šukać inšyja schiemy i šlachi. Zaraz rasijskim pierakupščykam treba budzie vieźci ź Biełarusi mašynu, jakaja prosta źniataja z uliku, ale jašče nie pradadzienaja novamu ŭłaśniku. U Rasii im daviadziecca pradavać jaje na biełaruskich tranzitach, kab pieršym ułaśnikam u RF byŭ kančatkovy pakupnik, jaki adrazu zarehistruje aŭto na siabie.
Bo inakš daviadziecca dapłacić niekalki tysiač jeŭra ŭtylizacyjnaha zboru, što ŭ bolšaści vypadkaŭ zrobić ździełku niavyhadnaj», — ličyć surazmoŭca, jaki pryhaniaje aŭto ź Jeŭropy.
Pa słovach pierahonščyka, praca pa takoj schiemie musić akazać peŭny niehatyŭny ŭpłyŭ, bo nie kožny pakupnik aŭto ŭ RF zachoča źviazvacca z takoj schiemaj. Im treba budzie kuplać mašynu, jakaja znachodzicca ŭ Rasii, ale dakumienty ŭ jaje biełaruskija, a damovu kupli-prodažu daviadziecca składać ad imia biełaruskaha ŭłaśnika, jaki znachodzicca nieviadoma dzie.
Ilhotniki atrymajuć dadatkovuju ryzyku
Taksama aŭtabiznesoviec adznačaje, što ad takoj schiemy nie ŭ zachapleńni buduć i biełaruskija lhotniki.
«Takaja mašyna jašče nieviadoma kolki budzie farmalna zastavacca va ŭłasnaści biełaruskaj «viešałki». Adpaviedna, i adkaznaść budzie na jurydyčnym ułaśniku aŭto, kali niešta zdarycca ci banalna pryjdzie štraf za pieravyšeńnie chutkaści, bo pierachodu ŭłasnaści nie adbudziecca. Mašyna budzie źniataja z uliku dla prodažu, u jaje buduć tranzitnyja numary, ale pakul rasijski pierakup nie pradaść jaje i nie zarehistruje na kančatkovaha pakupnika, to farmalna mašyna budzie ŭvieś hety čas naležać biełarusu», — źviartaje ŭvahu surazmoŭca.
Pierahonščyk aŭto ź Jeŭropy, jak i inšy naš surazmoŭca, taksama ličyć, što takija źmieny ŭ RF mohuć niehatyŭna adbicca na jahonym biznesie.
«Mahčyma, praz heta stanie krychu bolš tych rasijan, jakija sami navažacca pryjechać pa aŭto ŭ Biełaruś, ale ja nie dumaju, što ich kolkaść mocna pavialičycca», — razvažaje pierahonščyk.
Jość jašče adzin varyjant, jak biełaruskija i rasijskija pierakupščyki zmohuć pracavać u novych umovach.
Častka mašyn budzie jechać u RF adrazu paśla razmytnioŭki ŭ Biełarusi navat biez pastanoŭki na ŭlik u biełaruskaj DAI. Rasijski pierakupščyk budzie vypisvać dahavor kupli-prodažu na novaha ŭłaśnika, a razmytnienaje aŭto tak nikoli i nie dajedzie da rehistracyjnaha adździaleńnia ŭ Biełarusi.
«Niekatoryja i ciapier tak pierapradajuć mašyny, ale tut treba razumieć, što nie kožny lhotnik na takoje pahodzicca», — pryznajecca pierahonščyk.
Varta adznačyć, što lhotniki, jakija padpisvajucca na pieraprodaž aŭto bieź jaho rehistracyi ŭ DAI, mohuć stać pieršymi, na kaho źviernuć uvahu kantralujučyja orhany. Bo ŭ takim vypadku budzie značna praściej znajści abhruntavańnie taho, što lhota była vykarystanaja nie dla asabistaha karystańnia, to-bok nie pa naznačeńni.
Dla daviedki, letaś kolkaść aŭto, jakija fizičnyja asoby impartavali ŭ Biełaruś z trecich krain, vyrasła ŭ 2,4 razu. Kali za ŭvieś 2021 hod heta było 35 tysiač aŭtamabilaŭ, to za 2022-i — bolš za 80 tysiač. Amal usie jany byli razmytnienyja z vykarystańniem ilhoty. Značnaja častka hetych mašyn paźniej apynułasia ŭ Rasii.
Prodaž novych aŭtamabilaŭ u Biełarusi ŭ červieni vyras amal na čverć
«Biełdžy» nabiraje supracoŭnikaŭ i płanuje vypuskać aŭto pad ułasnym brendam
