Eduard Apsit akazaŭsia ŭ centry publikacyj «Biełaruskaha rasśledavalnickaha centra». Kałaž «Našaj Nivy»
Kantrakt z Bresckim vahonnym učastkam
Biełaruski rasśledavalnicki centr kaža, što nie abvinavačvaŭ kampaniju «Čysty śviet plus» u kradziažy piaci miljonaŭ dalaraŭ na tendary pa absłuhoŭvańni Bresckaha łakamatyŭnaha depo. I tłumačyć dalej pa hetym kiejsie:
«Čysty śviet plus» ukłaŭ damovu z Bresckim vahonnym učastkam 30 vieraśnia 2015 hoda. Amal praz try tydni, 20 kastryčnika 2015 hoda, było ŭkładzienaje dadatkovaje pahadnieńnie, pavodle jakoha košt damovy istotna pavialičyŭsia. Na heta źviarnuŭ uvahu kolišni majstar Bresckaha vahonnaha ŭčastka Alaksandr Kłačkoŭ. Jahony kamientar pryvodzicca ŭ materyjale «Narodnaha reparciora». Pavodle słoŭ Kłačkova, rascenki na niekatoryja pasłuhi pa damovie byli zavyšanyja ŭ tysiaču razoŭ. Kłačkoŭ paskardziŭsia na dziejańni kiraŭnika Bresckaha vahonnaha ŭčastka ŭ dziaržaŭnyja orhany. U lutym 2016 hoda kantrolna-revizijny adździeł Bresckaha adździaleńnia Biełaruskaj čyhunki pravioŭ pravierku. Jana vyjaviła, što kampanii «Čysty śviet plus» zhodna z aktam pryjomki-zdačy vykananaj pracy ad 31 studzienia 2016 hoda nieabhruntavana vypłacili 9 363 500 rubloŭ.
Bresckaja transpartnaja prakuratura taksama praviała pravierku paśla zvarotu Kłačkova i nakiravała jamu adkaz. Hety list pryvodzicca ŭ tym ža materyjale «Narodnaha reparciora». Tam skazana, što padstaŭ dla zaviadzieńnia kryminalnaj spravy niama, ale kiraŭniku Bresckaha vahonnaha ŭčastka vynieśli papiaredžańnie i abjavili zaŭvahu za «ździajśnieńnie pravaparušeńnia, jakoje stvaraje ŭmovy dla karupcyi». Adkaz prakuratury datujecca lipieniem 2016 hoda. Praź niekalki miesiacaŭ, 31 kastryčnika 2016 hoda, pra hetuju historyju napisała vydańnie bg.media. «Za raboty, vykananyja pa zavyšanym taryfie ŭ listapadzie 2015 hoda, vahonnym učastkam było vypłačana kala 11 młn rubloŭ, tady jak, pavodle pieršapačatkovych umovaŭ damovy, ich košt składaŭ krychu bolš za 1,6 młn», — havorycca ŭ artykule. Roźnica akurat składaje tyja samyja 9,4 młn rubloŭ.
Krynica: Youtube-kanał «Narodny reparcior» / Adkaz Bresckaj transpartnaj prakuratury
Pakolki adkaz prakuratury i artykuł vyjšli ŭžo paśla praviadzieńnia denaminacyi (ad 1 lipienia 2016 hoda), my sychodzili z taho, što sumy tam paznačanyja z ulikam denaminacyi. Kali pieravieści 9,4 młn rubloŭ u dołary pa tahačasnym kursie, atrymajecca kala 5 młn dołaraŭ. Heta suma, na jakuju zavyšanaja pieršapačatkovaja damova.
My nie vyklučajem, što mahli pamylicca ŭ padlikach, i sumy paznačanyja ŭ niedenaminavanych rublach. Ale heta nie admianiaje fakt, što rascenki na pasłuhi byli zavyšanyja. I pa hetych zavyšanych rascenkach «Čysty śviet plus» paśpieŭ vykanać niekatory abjom prac, pakul nie pačalisia pravierki».
Tendary prezidenckaha miedcentra
BRC ličyć, što imitacyja kankurencyi na niekatorych tendarach z udziełam kampanij Apsita była, i pryvodzić adzin z takich tendaraŭ.
«28 vieraśnia 2016 hoda «Respublikanski kliničny miedyčny centr» pry Upraŭleńni spravami prezidenta (prezidencki miedcentr) abviaściŭ tendar na pracy pa kompleksnym absłuhoŭvańni pamiaškańniaŭ na nastupny hod. Dakumientacyju pa hetym tendary možna pahladzieć tut. Tak, my nie paznačyli ŭ rasśledavańni, što na konkurs padalisia niekalki ŭdzielnikaŭ, ale nie ŭsie jany dajšli na tarhoŭ 8 śniežnia 2016 hoda.
Pieršapačatkovy košt elektronnaha aŭkcyjonu — 715 936,65 rubloŭ. U pratakole tarhoŭ try ŭdzielniki: «BIEŁEZ», «Čysty śviet plus» i «Kirujučaja kampanija «Fasilikom»». «BIEŁEZ» uvachodzić u strukturu Upraŭleńnia spravami prezidenta, jak, darečy, i miedcentr, jaki abviaściŭ tendar. «Čysty śviet plus» i «Kirujučaja kampanija «Fasilikom»» padkantrolnyja siamji Apsit. Z pratakoła praviadzieńnia tarhoŭ vynikaje, što staŭka «BIEŁEZ» składaje 622 434,38 rubloŭ z 15% prefierencyjaj, staŭka «Kirujučaj kampanii «Fasilikom»» — 620 787,72 rubloŭ, staŭka «Čysty śviet plus» — 619 964,39 rubloŭ. Staŭka «Čysty śviet plus» akazałasia samaj nizkaj. I jana, sapraŭdy, na 13,4% nižejšaja za pieršapačatkovy košt elektronnaha aŭkcyjonu — ale tolki na 0,1% mienš za staŭku afilavanaj kampanii «Kirujučaja kampanija «Fasilikom»».
Niuans u tym, što kampanii pavinny paćvierdzić svaje staŭki elektronnym ličbavym podpisam (EŁP), što źjaŭlajecca abaviazkovaj umovaj dla ŭdziełu ŭ tarhach. «Čysty śviet plus» i «Kirujučaja kampanija «Fasilikom»» paćvierdzili svaje staŭki EŁP, a «BIEŁEZ» nie».
«U vynikovym pratakole ad 16 śniežnia 2016 hoda paznačanyja tolki dźvie kampanii — «Čysty śviet plus» i «Kirujučaja kampanija «Fasilikom»». To-bok, kamisija abirała pieramožcu pamiž imi», — praciahvaje BRC.
Rasśledavalniki pišuć, što padobnyja situacyi ź ličbavym podpisam skłalisia i na inšych tendarach prezidenckaha miedcentra z udziełam kampanij Apsitaŭ.
«Aprača taho, my znajšli tendary dziaržaŭnych arhanizacyj, dzie nie było inšych udzielnikaŭ, aprača kampanij Apsitaŭ», — dadaje BRC. I pryvodzić spasyłki (pieršaja i druhaja).
Krynica: Internet-viersija infarmacyjnaj sistemy «Tendary» www.icetrade.by
«Udzieł afilavanych kampanij u tarhach nie zabaronieny biełaruskim zakanadaŭstvam, ale takaja praktyka krytykujecca. Heta, pa sutnaści, jak konkurs pamiž levaj i pravaj kišeniaj adnych portak. Naprykład, va Ukrainie kampanii, źviazanyja z Apsitam, pakarali štrafam za imitacyju kankurencyi na tarhach Lvoŭskaj čyhunki», — piša BRC.
Kryminalnaja sprava ŭ Biełarusi
U materyjale BRC zhadvajecca kryminalnaja sprava, zaviedzienaja na dyrektara «Čysty śviet plus» Valeryja Hatoŭčyka. Upieršyniu pra jaje stała viadoma ŭ sakaviku 2019 hoda. Śledčy kamitet paviedamiŭ pra zatrymańnie dyrektara «Čysty śviet plus» pa abvinavačvańni ŭ dačy chabaru. BRC piša:
«Z dapamohaj «Kibierpartyzan» my daviedalisia akaličnaści hetaj spravy. Tam minimum try epizody. Pavodle fabuły spravy Hatoŭčyka, mienavita jon davaŭ chabar čynoŭnikam z roznymi metami. Jak minimum 2500 dalaraŭ, kab pieramahčy na tendary Banku VTB; 500 dalaraŭ, kab ałkaholny chołdynh «Minsk Kryštal» raźličyŭsia za raniej vykananyja pracy; 500 dalaraŭ, kab prezidenckaja klinika łajalna pastaviłasia da pracy, jakuju vykonvaje «Čysty śviet plus». Pryčym chabar hałoŭny inžynier prezidenckaj kliniki Ludmiła Lubčuk atrymała ŭ lutym 2019 hoda, a ŭ lipieni taho ž hoda prezidenckaja klinika ŭkłała z «Čystym śvietam plus» novy kantrakt.
Krynica: «Kibierpartyzany»
Krynica: «Kibierpartyzany»
Ahułam, pa našych padlikach, paśla zaviadzieńnia kryminalnaj spravy «Čysty śviet plus» padpisaŭ damovy z roznymi dziaržaŭnymi ŭstanovami na sumu bolš za miljon rubloŭ. Pakul «Čysty śviet plus» udzielničaŭ u tendarach, rasśledvańnie kryminalnaj spravy suprać Hatoŭčyka praciahvałasia.
U paźniejšych dakumientach pradstaŭnikoŭ Banku VTB i «Minsk Kryštal» vykarystoŭvajecca inšaja farmuloŭka — nibyta jany zavałodali hrašyma Hatoŭčyka šlacham padmanu. U fabule spravy Lubčuk takoj farmuloŭki niama. U dakumientach napisana, što joj pieradali chabar ad «Čystaha śvietu plus» za łajalnaje staŭleńnie pry pryjomcy prac, jakija kliniery vykonvajuć pa raniej zaklučanych damovach».
Biznes u Rasii
Dalej BRC daje adkaz nakont viadzieńnia biznesu Apsitaŭ u Rasii:
«Eduardu i Alenie Apsit naležyć maskoŭskaja kampanija «Fasilikom». Jana źjaŭlajecca pravaŭładalnikam niekalkich handlovych znakaŭ, siarod jakich — «Čysty śviet» i «Čysty śviet. My robim śviet čyściejšym». Licenzijatami hetych handlovych znakaŭ źjaŭlajucca dziasiatki kampanij, i ŭžo jany ŭdzielničajuć u tendarach. Pavodle rasijskich zakonaŭ, pravaŭładalnik handlovaha znaka i licenzijat niasuć salidarnuju adkaznaść, kali da pracy licenzijata ŭźnikajuć pytańni.
U piśmovym tłumačeńni dla łatvijskich śledčych jurysty kampanii raspaviali, što ŭ 1998 hodzie siamiejny biznes Apsitaŭ ź Biełarusi pašyryŭsia na Rasiju. U 2006-2007 hadach biznes u Rasii byŭ restrukturavany. Apsity pierajšli ad niepasrednaha akazańnia klininhavych pasłuh klijentam da pieradačy hetych funkcyj subpadradčykam. Mienavita jany ŭžo vykonvali zamovy klijentaŭ. Dalej skazana, što klininhavy biznes Apsitaŭ zajmaje lidzirujučyja pazicyi na rasijskim rynku i viadomy pad handlovym znakam «Čysty śviet».
Łatvijskija śledčyja taksama atrymali tłumačeńni ad banku ABLV, dzie afšornyja kampanii Apsitaŭ mieli rachunki. Z tłumačeńniaŭ banku vynikaje, što Apsity zarablali hrošy ŭ tym liku na klininhu ŭ Biełarusi, Ukrainie i Rasii. Siarod ekskluziŭnych klijentaŭ nazyvajucca Kreml, Viarchoŭny sud i Centralny bank Rasii.
Ź inšaj krynicy nam viadoma, što Apsity abrali stratehiju pracy na rasijskim rynku praz subpadradčykaŭ, kab u tym liku zaścierahčy svoj biznes ad mahčymych prablem z pravaachoŭnikami. To-bok ź siaredziny 2000-ch Apsity zarablali hrošy ŭ Rasii nie naŭprost, a praz kampanii, jakim vydavali licenzii na karystańnie handlovymi znakami «Fasilikom». Pavodle rasijskich zakonaŭ, licenzijar vydaje licenzijatu prava tolki na karystańnie handlovym znakam, tym časam jak pa franšyzie možna karystacca nie tolki handlovym znakam, ale i sakretami vytvorčaści, kamiercyjnym dośviedam, dziełavoj reputacyjaj».
Kazarmy ŭ akupavanym Krymie
BRC daje tłumačeńnia pa niekatorych kankretnych padradach:
«U 2015—2016 hadach kampanija «Fłahman Klin» vyjhrała siem tendaraŭ Ministerstva abarony na pryborku kazarmaŭ u akupavanym Krymie. Na hetych padradach kampanija atrymała ź biudžetu kala 30 młn jeŭra. «Fłahman Klin» była licenzijatam handlovych znakaŭ «Čysty śviet» i «Čysty śviet. My robim śviet čyściejšym». Kiraŭnicaj «Fłahman Klin» u 2016 hodzie była Halina Siracinina. Da hetaha jana pracavała ŭ kampanii «Čysty śviet servis», jakoj vałodali Eduard i Alena Apsit. Pra hetuju akaličnaść NN u svaim artykule nie zhadvaje. Pry hetym adnačasova z pracaj u akupavanym Krymie źviazanyja z Apsitam kampanii viali biznes va Ukrainie, dzie padkantrolnyja jamu i jahonym mieniedžaram firmy złavili na manipulacyjach na tendarach i pakarali štrafam».
Kartelnaja zmova na tarhach Minabarony
«U 2016 hodzie Fiederalnaja antymanapolnaja słužba (FAS) RF vyjaviła kartelnuju zmovu na aŭkcyjonach pa kompleksnym absłuhoŭvańni vajennych haradkoŭ i inšych abjektaŭ, — piša BRC. — U tarhach udzielničali dzieviać kampanij, jakija mierkavana admaŭlalisia ad paŭnavartasnaha supiernictva, z-za čaho ŭsie dziaržkantrakty zaklučyli ź niaznačnym źnižeńniem pačatkovaj maksimalnaj cany — nie bolš za 1,5%. U chodzie razboru antymanapolnaj słužbie ŭdałosia dakazać zmovu pamiž 8 kampanijami. Na ahulnuju sumu pačatkovaha maksimalnaha koštu kantraktaŭ u 28 młn jeŭra. Z materyjałami spravy možna aznajomicca pa spasyłcy.
FAS zhadvała dźvie hrupy kampanij-zmoŭnic. Pieršaja — heta kampanii «Kampanient», «Ekabałt», «RusKompleks», «Śpiecresurs», «Miehałajn». Rasijski Fond baraćby z karupcyjaj vyśvietliŭ, što jany źviazanyja ź Jaŭhienam Pryhožynym.
Druhaja ŭmoŭnaja hrupa ŭklučała firmy «Bieły miadźviedź», «Korałklin» i «Milenium klin». Kampanii źjavilisia ŭ 2014 hodzie i byli likvidavanyja ŭ 2022-m. Łancužok ad ich viadzie da Apsitaŭ. Kiraŭniki i ŭładalniki ŭsich troch kampanij u svoj čas pracavali na firmy, jakim Apsity vydali licenziju na karystańnie handlovymi znakami, jakija naležać «Fasilikom». I siarod takich ludziej nie tolki Ludmiła Čakaraja. Razam ź joj takich piać čałaviek».
BRC zvaniŭ Čakaraja. Jana paćvierdziła, što raniej pracavała na Apsitaŭ, u tym liku ŭ kampanii «Korałklin».
«Žančyna skazała, što ničoha nie pamiataje pra ŭdzieł «Korałklin» u zmovie na tendarach Minabarony, bo mieła inšyja abaviazki — adkazvała ŭ hrupie kampanij «Fasilikom» za jakaść pracy.
Vierniemsia da spravy ab kartelnaj zmovie, bo ŭ joj jość cikavyja vysnovy. Z materyjałaŭ FAS vynikaje, što «Bieły miadźviedź», «Korałklin» i «Milenium klin» karystalisia adnym IP-adrasam i MAS-adrasami pry padačy zajavak na tarhi. Na dumku śpiecyjalistaŭ FAS Rasii, heta śviedčyć ab «praciahłych i ŭstojlivych suviaziach» pamiž kampanijami. Akramia taho, u materyjałach FAS paznačana, što zajaŭki na konkurs padavalisia adnymi i tymi ž karystalnikami. Pryčym adzin i toj ža karystalnik padavaŭ zajaŭki na aŭkcyjon ad imia firmaŭ z roznych hrup. Da prykładu, Kanciemir Jemišaŭ padavaŭ zajaŭki jak ad imia «Kampanient», «RusKompleks», «Miehałajn», tak i ad imia «Korałklin».
Niekatoryja fajły, jakija źmiaščajucca ŭ zajaŭkach, stvoranyja pad adnym ulikovym zapisam, adnačasova i identyčnyja pa pamiery i źmieście. FAS pryjšła da vysnovy, što dakumienty na konkursy rychtavalisia sumiesna. Praściej kažučy, ludzi, źviazanyja z Apsitam, damovilisia ź ludźmi, źviazanymi z Pryhožynym. Raniej vydańnie RBK vyśvietliła, što rynak vajskovaha klininhu Pryhožyn dzialiŭ z kampanijami, jakija mohuć być źviazany z hrupaj «Fasilikom».
Biznes u roznych krainach i admyvańnie hrošaj
«My nie abvinavačvajem Apsita ŭ złačynstvach, — davodzić BRC. — U rasśledavańniach my pakazvajem, jak jon viadzie biznes u roznych krainach. I hety biznes supravadžajecca sudovymi spravami — u Łatvii jaho biznes padazrajuć u admyvie hrošaj, a ŭ Biełarusi top-mieniedžar jaho kampanii asudžany za chabarnictva.
Aprača taho my pakazvajem, što ŭ roznych krainach hety biznes viadziecca pa-roznamu. U Biełarusi Apsity pracujuć naŭprost praz padkantrolnyja firmy i atrymlivajuć dziaržaŭnyja zamovy ad takich ustanoŭ, jak špitali, univiersitety, čyhunka, Nacyjanalnaja biblijateka, Nacyjanalnaja teleradyjokampanija, Park vysokich technałohijaŭ i inšyja. Ahulny košt kantraktaŭ za dziesiać hadoŭ — kala 40 młn jeŭra pa kursie na dzień publikacyi.
Va Ukrainie Apsit vałodaŭ biznesam naŭprost razam sa svaimi mieniedžarami, ale paśla akupacyi Krymu i vajny na Danbasie jon vyjšaŭ sa składu ŭdzielnikaŭ usich viadomych nam kampanij. Ukrainskaja hrupa kampanij «Čysta», suviaź ź jakoj maje Apsit, prybiraje važnyja stratehičnyja abjekty, tym časam jak Apsit maje rasijskaje hramadzianstva. Ale farmalna jaho niama siarod uładalnikaŭ ukrainskich kampanij.
Tym časam jak Apsit viadzie biznes va Ukrainie, źviazanyja ź im firmy atrymlivajuć zamovy ad rasijskaha Ministerstva abarony. Ale, kab schavać takuju suviaź, u Rasii Apsity pracujuć nie naŭprost, a praz subpadradčykaŭ, jakija karystajucca licenzijami «Čysty śviet» i «Čysty śviet. My robim śviet čyściej». To-bok, Apsit vyhladaje biznesoŭcam, jaki sprabuje ŭsiedzieć adrazu na niekalkich kresłach.
Zaroblenyja ŭ Biełarusi, Ukrainie i Rasii srodki vyvodzilisia na rachunki afšornych kampanij u łatvijskim banku ABLV praź fiktyŭnyja kredytnyja i inšyja damovy, padazrajuć łatvijskija śledčyja. Jany adznačajuć, što, pavodle hetych damovaŭ, miljony jeŭra pieravodzilisia na rachunki afšornych kampanij Apsita «biez ekanamičnaj łohiki» z metaj schavać pachodžańnie srodkaŭ. Pravaachoŭniki pryjšli da vysnovy, što pad Apsita ŭ banku ABLV była stvorana admysłovaja «pralnia». Darečy, biznesoviec byŭ tajemnym akcyjanieram banku praź dźvie kiprskija kampanii. Jak vyśvietlili ŭ OCCRP, jon vałodaŭ adnym adsotkam akcyj ABLV i 21% — źviazanaj z bankam inviestycyjnaj kampanii AmberStone Group.
My razmaŭlali z Apsitam kala troch hadzin, prapanoŭvali jamu dać nam razhornuty kamientar na kamieru, ale jon admoviŭsia. U našym rasśledavańni my pierakazali jahonuju pazicyju, padrychtavanuju advakatami. Jana zaklučajecca ŭ admaŭleńni ŭsiaho taho, pra što my pisali vyšej».
BRC patłumačyŭ taksama pytańnie dapamohi Apsitu i jahonym siamiejnikam z boku demakratyčnych siłaŭ ź lehalizacyjaj u Litvie.
«Asoba biznesoŭca bačycca nam sprečnaj dla takoj padtrymki», — piša BRC.
Kamientar ad Redakcyi «Našaj Nivy»
«Naša Niva» zacikaviłasia biznesoŭcam Eduarda Apsitam i jahonymi biznesami paśla publikacyi BRC i vyrašyła napisać na hetuju temu, kali pabačyła ŭ publikacyi vidavočnyja pamyłki — pierabolšvańnie sumy ŭ 10 000 razoŭ — abo pierabolšvańni, jak ź dziejnaściu franšyzy.
Publikacyi BRC nas zacikavili, bo my pabačyli, jak pamyłki žurnalistaŭ pryviali da publičnaha danosu na, mahčyma, fundatara biełaruskaha niezaležnaha hramadstva.
Nichto jašče i nikoli dobraachvotna i publična nie vydavaŭ łukašenkaŭcam imiony fundataraŭ fondaŭ salidarnaści bieź ich zhody.
U svaim adkazie BRC cytuje infarmacyju, atrymanuju imi ad «łatyšskich śledčych».
BRC tłumačyć, što jany «nie vyklučajuć pamyłki ŭ padlikach» sumy vypłat na Bresckim vahonnym učastku, tamu što nie zaŭvažyli daty na dakumiencie. Ale možna zaŭvažyć, što vahonny ŭčastak Bresckaha filijała Biełčyhunki nikoli nie mieŭ finansavaj mahčymaści adnamomantava vypłacić 5 miljonaŭ dalaraŭ za klininhavyja pasłuhi.
Pavodle bazy tendaraŭ, maksimalnaja suma, jakuju kali-niebudź adzinarazova traciŭ uvieś Brescki filijał Biełčyhunki — 371 tysiača biełaruskich rubloŭ (na zakupku tysiač par śpiecyjalizavanaha abutku).
Piać miljonaŭ dalaraŭ siońnia — heta 3 novyja łakamatyvy TME3, na 2015 hod — heta amal što 4-vahonny «Štadler». Heta taja suma, jakuju redka kali moža adzinarazova patracić navat hałaŭnaja arhanizacyja Biełčyhunki, i toje z vykarystańniem kredytnych resursaŭ.
Sama historyja ŭ Bresckim vahonnym učastku — heta historyja mižasabistych adnosin majstra vahonnaha ŭčastka Alaksandra Kłačkova i načalnika bresckaha adździaleńnia čyhunki Alaksandra Afanaśjeva, jakaja ŭ detalach apisanaja sajtam BGmedia.
Tezis pra «tysiačarazovaje zavyšeńnie cany» naležyć Kłačkovu. Ale Afanaśjeŭ, na jakoha Kłačkoŭ pisaŭ zajavy ŭ prakuraturu, śćviardžaje:
«Było 7 pravierak pa hetaj spravie, praviarała prakuratura, dvojčy ABEZ. […] Ale sutnaść u tym, što suma, na jakuju abviaščaŭsia tendar, ni ŭ damovie, ni ŭ dadatkovym pahadnieńni nie źmianiłasia. […] Nie vyjaŭlena pry praviadzieńni tendara nijakich karupcyjnych prajavaŭ […]», — kaža Afanaśjeŭ. Ën ličyć spravu vynikam piersanalnaha kanfliktu.
Suma nie źmianiłasia, kaža Afanaśjeŭ, ale ŭ adzinym dakumiencie my bačym, što źmianiłasia. Jak takoje moža być? Afanaśjeŭ chłusić?
My nie viedajem. U hetaj situacyi brakuje faktaŭ i tendarnaj dakumientacyi, kab jaje abjektyŭna apisać.
Ale my dakładna razumiejem, u jakich vypadkach takoje byvaje.
Apisańnie Afanaśjeva vyhladaje apisańniem pierasorcicy ŭ ramkach zakupki. Dapuścim, jość suma kantrakta — 100 rubloŭ. U ramkach jaho jość pasłuhi na 50 rubloŭ, try rubli, dziesiać i hetak dalej.
Ale pa chodu vyśviatlajecca, što niešta nie ŭličyli, tut treba nie na 10, a na 30, a tut nie na 50, a na 20. Adbyvajecca buchhałtarskaje adlustravańnie pierasorcicy praz zalik realnych cenaŭ pasłuh ci tavaraŭ u paraŭnańni z zapłanavanymi.
Suma zastajecca taja ž, ale jaje raźmierkavańnie ŭnutry — mianiajecca.
I, zvyčajna, heta adbyvajecca ŭ ramkach niejkaha bolšaha kantrakta. Što aznačaje, što my nie viedajem cany zakupki, my viedajem tolki pamier pierasorcicy.
Uvohule, razbor tendarnych niuansaŭ, imavierna, budzie małacikavym šyrokaj čytackaj aŭdytoryi. Ale praz važnaść niekatorych momantaŭ my pryviadziem niekalki tłumačeńniaŭ.
«Niuans u tym, što kampanii pavinny paćvierdzić svaje staŭki elektronnym ličbavym podpisam (EŁP), što źjaŭlajecca abaviazkovaj umovaj dla ŭdziełu ŭ tarhach. «Čysty śviet plus» i «Kiraŭničaja kampanija «Fasilikom» paćvierdzili svaje staŭki EŁP, a «BIEŁEZ» nie. Čamuści ŭ artykule NN pra heta nie zhadvajecca. U vynikovym pratakole ad 16 śniežnia 2016 hoda paznačanyja tolki dźvie kampanii — «Čysty śviet plus» i «Kiraŭničaja kampanija «Fasilikom». To-bok, kamisija abirała pieramožcu pamiž imi», — kaža ŭ svaim adkazie BRC.
U realnaści ž heta ahulnaja pracedura.
U vynikovym pratakole aŭkcyjonu pa adnym łocie zaŭsiody paznačajucca tolki dźvie kampanii niezaležna ad kolkaści ŭdzielnikaŭ. Tamu što tolki heta jurydyčna značna — u vypadku admovy ci niemahčymaści pieršaj kampanijaj vykanać kantrakt jon aŭtamatyčna pierachodzić da druhoj kampanii.
Što datyčyć EŁP (elektronnaha ličbavaha podpisu), to ŭdzieł u aŭkcyjonie bieź jaho niemahčymy i podpis stavak adbyvajecca da pačatku aŭkcyjonu, a nie pry kancy.
Udzielnik aŭkcyjonu nie moža prajhrać jaho vypadkova, tolki tamu što zabyŭsia padpisać niejkuju adnu staŭku.
«Pry ŭvachodzie na tarhi ŭdzielniki padpisvajuć EŁP paviedamleńnie nastupnaha źmiestu: «Hetym paviedamleńniem pryznaju jurydyčnuju značnaść stavak, zroblenych mnoj u tarhach pa elektronnamu aŭkcyjonu AU<…..>, […]», — apisvaje praceduru tarhoŭ punkt 7, padpunkt 67 «Rehłamientu arhanizacyi i praviadzieńnia pracedur zakupak u elektronnym farmacie na elektronnaj handlovaj placoŭcy AAT «Biełaruskaja ŭniviersalnaja tavarnaja birža».
My ŭziali ŭ bazie tendaraŭ advolnyja aŭkcyjony pa toj ža katehoryi pasłuh, ale ŭ jakich nie ŭdzielničali kampanii Eduarda Apsita.
Što my pabačyli? U vynikovym pratakole fihurujuć tolki dźvie kampanii, niezaležna ad kolkaści ŭdzielnikaŭ, a ŭ aŭkcyjonnych dakumientach «zaśviedčanymi staŭkami EŁP» adznačanyja tolki pieramožcy.
Pratakoł advolnaha aŭkcyjonu
BRC analizuje adkrytuju infarmacyju na sajcie icetrade.by i ŭ jakaści adnaho z prykładaŭ pryvodzić skrynšot z tłumačeńniem, što ŭ tendary ŭdzielničali tolki dźvie kampanii Apsita. Ale heta čarhovaja pamyłka. Heta tolki adlustravańnie, što kampanii Apsita zaniali pieršaje i druhoje miesca.
Skrynšot, jaki pryvodzić BRC u svaim adkazie, jak ilustracyju fiktyŭnych aŭkcyjonaŭ
A kali kapnuć hłybiej i znajści aŭkcyjonnyja dakumienty, to my znachodzim kankurentny tendar i, jak minimum, jašče adnu kampaniju, jakaja dajšła da aŭkcyjonu. U hetym vypadku heta ŭsio toj ža «BiełEZ».
Skrynšot z aŭkcyjonnaj dakumientacyi pa tym ža tendary
Kampanii zrabili 375 krokaŭ na źnižeńnie pa 0,1% ad pieršapačatkovaj cany kožnaja.
Ni ŭ «Našaj Nivy», ni ŭ «BRC» niama adkazu na pytańnie, što ž u realnaści adbyłosia z kryminalnaj spravaj na dyrektara «Čystaha śvietu» Hatoŭčyka.
Čamu jaho aryštoŭvali i adpuskali ŭ 2019-m, a potym u 2021-m sadzili nie za toje, što napisana ŭ fabule pieršapačatkovaj kryminalnaj spravy?
Što da datyčnaści Apsita da kartelnaj zmovy, to ŭ aŭdyjazapisie razmovy karespandenta BRC z Čakaraja my pačuli, što jana zvolniłasia z «Fasilikoma» Apsitaŭ minimum u 2014-m, a kartelnaja zmova była raskrytaja FASam u 2016-m, a adbyłasia ŭ 2015-m.
U kožnym razie, siarod kampanij-udzielnic kartelnaj zmovy, jakich pakarali štrafam, nie było kampanij Apsita.
Takim čynam, adkazy BRC nie pierakanali nas, što my ŭ niečym pamylilisia ŭ našym artykule «Jak 398 jeŭra pieratvarylisia ŭ 5 miljonaŭ. Sprava Apsita: kamu i čamu padyhrali rasśledavalniki?».
