Dakumientam, za pryniaćcie jakoha prahałasavali 270 narodnych deputataŭ, płanujecca ŭchvalić i ŭnieści na razhlad u Radu nacyjanalnaj biaśpieki i abarony prapanovy pa prymianieńni 18 piersanalnych ekanamičnych i inšych abmiežavalnych mier (sankcyj) da 36 pradstaŭnikoŭ spartyŭnych arhanizacyj Rasii i Biełarusi.
U hetym śpisie namieśnik ministra sportu i turyzmu Biełarusi Alaksandr Baravula, eks-staršynia Fiederacyi chakieja Dźmitryj Baskaŭ, rektar Univiersiteta fizkultury Siarhiej Repkin, były kiraŭnik Fiederacyi futboła Uładzimir Bazanaŭ, dziejnyja kiraŭniki fiederacyj chakieja — Alaksandr Bahdanovič, tenisa — Siarhiej Rutenka, baraćby — Alim Sialimaŭ i trener pa mastackaj himnastycy Luboŭ Čarkašyna.
Havorka idzie pra błakavańnie ich aktyvaŭ, praduchileńnie vyviadzieńnia kapitałaŭ za miežy Ukrainy i pazbaŭleńnie dziaržaŭnych uznaharod Ukrainy.
RNBA rekamiendujecca pryniać rašeńnie ab prymianieńni sankcyj, a taksama zabiaśpiečyć infarmavańnie kampietentnych orhanaŭ Jeŭrapiejskaha sajuza, ZŠA, Kanady, Aŭstralii, Japonii i inšych dziaržaŭ z metaj razhladu imi pytańnia ab uviadzieńni anałahičnych sankcyj.
Čytajcie taksama:
Zialenski ŭvioŭ sankcyi suprać šaści biełaruskich kampanij i dvuch biznesoŭcaŭ
Ukraina moža bajkatavać čempijanat śvietu pa plažnym futbole praz udzieł u im zbornaj Biełarusi
