Fota: Alexandr Demyanchuk / Sputnik, Kremlin Pool Photo via AP
Vystupajučy pierad žurnalistami, Erdahan skazaŭ, što spadziajecca na pradaŭžeńnie dziejańnia pahadnieńnia paśla 17 lipienia (u hety dzień zakančvajecca termin, na jaki jano było raniej praciahnuta) u vyniku namahańniaŭ AAN i Turcyi. Vydańnie Daily Sabah padało jaho słovy tak, nibyta havorka idzie ŭžo pra ździejśnieny fakt:
«My rychtujemsia pryniać Pucina ŭ Turcyi ŭ žniŭni i damovilisia adnosna praciahu Čarnamorskaha zbožžavaha kalidora», — zajaviŭ turecki prezident.
Ale vydańnie Reuters pryvodzić cytatu ŭ takim vyhladzie, ź jakoha nie vynikaje, što rašeńnie ŭžo pryniata:
«Jak vy viedajecie, my rychtujemsia da pryjomu spadara Pucina ŭ Turcyi ŭ žniŭni, i my zhodnyja, što praca Čarnamorskaha zbožžavaha kalidora pavinna być praciahnutaja. Spadar Huteryš z AAN taksama nakiravaŭ list Pucinu. Ja spadziajusia, što z hetym listom i sumiesnymi namahańniami — našymi i Rasii — [termin dziejańnia] zbožžavaha kalidora budzie pradoŭžany».
Napiaredadni paviedamlałasia, što hienieralny sakratar AAN Antoniu Huteryš prapanavaŭ Pucinu praciahnuć «zbožžavaje pahadnieńnie» ŭ abmien na padklučeńnie «dački» Raśsielhasbanka da mižnarodnaj apłatnaj sistemy SWIFT.
Pazicyja Kramla pa hetym pytańni ahučvałasia ciaham apošniaha miesiaca nieadnarazova. 13 červienia sam Pucin zajaŭlaŭ, što Maskva dumaje pra toje, kab spynić udzieł u zbožžavym pahadnieńni. 21 červienia jahony pres-sakratar Dźmitryj Piaskoŭ śćviardžaŭ, što pieradumoŭ dla praciahu zbožžavaha pahadnieńnia niama, bo jano nie vykonvajecca.
Akurat učora, 13 lipienia, za dzień da zajavy Erdahana, Pucin havaryŭ, što Rasija praciahnie zbožžavuju ŭhodu tolki tady, kali buduć vykananyja abaviazańni pierad joj.
Paśla siońniašniaj zajavy Erdahana rasijskija miedyja źmiaścili zajavu Dźmitryja Piaskova, što «Rasija ničoha nie kazała ab pradaŭžeńni «zbožžavaha pahadnieńnia».
Čytajcie taksama:
«Dyk PVK «Vahnier» nie isnuje! Prosta nie isnuje!» Pucin raspavioŭ, pra što razmaŭlaŭ z Pryhožynym
Erdahan abmierkavaŭ ź Zialenskim i Pucinym situacyju vakoł Kachoŭskaj HES
