Raniej my ŭžo pisali pra toje, što niekatorych supracoŭnikaŭ dziaržustanoŭ prymušajuć admaŭlacca ad karty palaka. Pry admovie pahražajuć zvalnieńniem, a ŭ najlepšym vypadku — adsutnaściu pierśpiektyŭ karjernaha rostu.
Danyja ab najaŭnaści ŭ čałavieka karty palaka łukašenkaŭcy, jak vidać, atrymlivajuć ad pahraničnikaŭ. Kožny typ vizy maje svoj ličbavy kod u zaležnaści ad padstaŭ, pa jakich vydadziena viza.
Ilustracyjny zdymak
Razam z tym nam stała viadoma pra vypadki, kali kiraŭnictva dziaržaŭnych ustanoŭ daviedvałasia ab tym, što čałaviek tolki maje namier padavacca na kartu palaka. Surazmoŭca padrychtavaŭ usie nieabchodnyja dakumienty dla pajezdki na sumoŭje, ale jašče nie paśpieŭ hetaha zrabić.
Achvotnych atrymać kartu palaka vyklikajuć «na dyvan», dzie nastojliva rekamiendujuć admovicca ad takich namieraŭ, kab paźbiehnuć prablem u budučyni. Papiaredžvajuć, što, kali supracoŭnik nie pasłuchaje i atrymaje kartu palaka, zatrymacca na pracy ŭ najlepšym vypadku atrymajecca tolki da zaviaršeńnia biahučaha kantrakta, a pra niejkaje pavyšeńnie pa karjernaj leśvicy rajać zabycca.
Surazmoŭca, jaki akazaŭsia ŭ padobnaj situacyi, vykazvaje zdahadki, što biełaruskija śpiecsłužby daviedvajucca pra namier čałavieka atrymać kartu palaka šlacham prasłuchoŭvańnia pasiarednikaŭ, jakija akazvajuć supravadžalnyja pasłuhi i pravodziać navučańnie dla zdačy ispytu.
Taksama raskazvajuć pra vypadki, kali supracoŭniki dziaržustanoŭ traplali pad dadatkovuju ŭvahu z boku śpiecsłužbaŭ praz kartu palaka ŭ svajakoŭ.
Krynica paviedamlaje, što kali pierad pavyšeńniem pa karjernaj leśvicy čałaviek prachodziŭ dadatkovyja niehałosnyja pravierki, to pytańni ŭźnikali navat praz toje, što kartu palaka mieła dzicia, a nie sam čałaviek, jaki išoŭ na pavyšeńnie. Surazmoŭca kaža, što kiraŭnictva nastojliva raiła razabracca, kab nadalej nie ŭźnikała takich pytańniaŭ.
Adznačym, što takaja cikavaść kiraŭnictva i śpiecsłužbaŭ va ŭsich vyšej apisanych vypadkach viałasia ŭ dačynieńni da ludziej, jakija zajmajuć davoli vysokija pasady ŭ dziaržaŭnych ustanovach. Vyhladaje, što, prynamsi, pakul u pieršuju čarhu mohuć pracavać z tymi, chto zajmaje bolš-mienš značnuju pasadu. Da šarahovych supracoŭnikaŭ takoj pavyšanaj uvahi pakul niama.
Jość tyja, chto praz represii admoviŭsia ad idei padavacca na kartu palaka. Ludzi ličać, što kali ty pracuješ u dziaržaŭnaj ustanovie i nie źbiraješsia źjazdžać z krainy, to ad karty palaka ciapier moža być bolš prablem, čym karyści.
Kolki palakaŭ žyvie ŭ Biełarusi?
Pa danych pierapisu nasielnictva 2019 hoda, dola palakaŭ u krainie — 3,1% nasielnictva, abo bolš za 287 tysiač čałaviek. Kala 2/3 ź ich pražyvaje na terytoryi Hrodzienskaj vobłaści. Dola palakaŭ na Hrodzienščynie składaje 21,5% nasielnictva. U Voranaŭskim rajonie palaki pa samavyznačeńni składajuć bolšaść nasielnictva.
Pačynajučy z 2008 hoda konsuły ŭ Biełarusi vydali bolš za 160 tysiač kartaŭ palaka.
Nahadajem, 11 lipienia nabyŭ moc abnoŭleny zakon «Ab hramadzianstvie». Zhodna ź im biełarusy, jakija atrymali hramadzianstva inšych krain, DNŽ ci inšy dakumient zamiežnaj dziaržavy (naprykład, kartu palaka), jaki daje prava na lhoty i inšyja pieravahi, na praciahu troch miesiacaŭ z dnia atrymańnia adpaviednych dakumientaŭ abaviazanyja paviedamić pra heta ŭ orhany ŭnutranych spraŭ abo ŭ orhany dypłamatyčnaj słužby.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»«U Biełarusi dla palakaŭ ciapier najhoršaje stanovišča ŭ śviecie» — Kancylaryja prezidenta Polščy
