Fota: Jordan Strauss / Invision / AP, File
Pryčynaj śmierci 54-hadovaj žančyny, jak i jaje baćki, stała nieprachodnaść tonkaj kiški z-za rubcoŭ, jakija ŭźnikli paśla chirurhičnaj apieracyi pa źnižeńni vahi.
Havorka idzie pra baryjatryčnuju apieracyju, u vyniku jakoj skaračajecca abjom straŭnika. Preśli pieraniesła jaje za niekalki hadoŭ da śmierci.
Śpiavačka pamierła 12 studzienia paśla taho, jak jaje terminova dastavili ŭ kalifarnijskuju balnicu sa spynieńniem serca.
U čaćvier sudmiedekśpiertyza patłumačyła, što spynieńnie serca było vyklikana nieprachodnaściu tonkaj kiški.
Hety vid parušeńnia matoryki ŭ straŭnikava-kišačnym trakcie moža ŭźnikać u vyniku raku toŭstaj kiški, pryjomu lekaŭ abo z-za spajek paśla apieracyj u brušnaj połaści, jak u vypadku z Preśli.
«Heta viadomaje doŭhačasovaje ŭskładnieńnie paśla takoha rodu apieracyj», — adznačajecca ŭ zaklučeńni sudmiedekśpierta.
Pry hetym vypadki śmierci ad nieprachodnaści tonkaj kiški redkija, patłumačyła ŭ intervju amierykanskamu viaščalniku CBS doktar Anžalik Kampien z Kalifarnijskaha centra nieadkładnaj dapamohi.
Preśli była pachavanaja na terytoryi majontka Hrejślend u Miemfisie, jakoje naležała Ełvisu, pobač sa svaim synam Biendžaminam Kia, jaki skončyŭ žyćcio samahubstvam u 2020 hodzie.
Paśla jaje śmierci maci śpiavački, Pryscyła Preśli, pasprabavała asprečyć u sudzie zakonnaść jaje zaviaščańnia. Pavodle jaje słoŭ, jana nie viedała pra papraŭku 2016 hoda, jakaja adbiraje ŭ jaje prava kantrolu nad majomaściu i spadčynaj Lizy Mary.
