Pavieł Šurmiej ličyć, što nichto nie viedaje, što budzie zaŭtra. Nierealnyja płany mohuć stać realnaściu. Skryn videa «Žyćcio-malina»
Jak vydavaŭ siabie za zahinułaha
Bajec zhadvaje pra vypadak, jaki ź im i jaho kalehami zdaryŭsia padčas bajavych dziejańniaŭ. Jany rušyli na naziralny post, ale rabili heta nie zusim aściarožna. Było ŭžo dobra śvietła, i varožy bieśpiłotnik ich zaŭvažyŭ. Bajcy patrapili ŭ čystym poli pad minamiotny abstreł. Chavacca nie było kudy — ni akopaŭ, ni ŭkryćciaŭ.
«Spačatku heta byŭ bieh pa-sabačy. Paźniej my ŭžo pierabiežkami pieramiaščalisia. Varožy minamiot vykarystaŭ uvieś svoj bajavy kamplekt. Pakul jamu jaho padvozili, pa nam pačała pracavać BMD (bajavaja mašyna desantu)».
Šurmiej zhadvaje, što im daviałosia lehčy na ziamlu i prykinucca zabitym.
«Trava, murašy poŭzajuć. I ty razmaŭlaješ z tym, chto ŭviersie jość u kožnaha: «Davaj nie siońnia. Chaj heta budzie nie siońnia». Heta była Vialikaja piatnica pierad Vialikadniem u minułym hodzie. I mocny-mocny pach pałynu»,
— dzielicca ŭspaminami Šurmiej.
Jak atrymaŭ ranieńnie
Raspaviadajučy pra svajo ranieńnie, bajec zhadvaje, što heta było ŭnačy. Treba było zabrać z zadańnia śpiecyjalnuju hrupu, jakuju za dzień da hetaha dastavili na pazicyju. Dniom prajšoŭ doždž, što ŭskładniła pieramiaščeńnie. Adpravilisia na «Chamvi» (HMMWV — vysokaruchomy šmatmetavy kalosny transpartny srodak), jaki zachras.
«My vyrašali, jak zabrać mašynu i vyvieźci chłopcaŭ. Nas unačy zaŭvažyŭ dron. My znachodzilisia za niekalki dziasiatkaŭ mietraŭ ad mašyny ŭ miescy, jakoje nam zdavałasia bolš-mienš biaśpiečnym. Pačaŭsia abstreł. Paraniła dvuch chłopcaŭ z zamiežnaha lehijonu. My zastalisia, kab akazać im dapamohu, supakoić. I zaprasili evakuacyju. Čakali, pakul znojduć bronietransparcior ci BMP na husienicach.
Praź niekatory čas pačaŭsia druhi abstreł. Ja byŭ spakojny, bo, na maju dumku, pa nas pracavaŭ tank z zakrytych pazicyj. Kab pracavaŭ minamiot, jon nas chutčej dastaŭ by. A tak ŭsio byli pieraloty. Ale nam nie pašancavała — astatni vystrał patrapiŭ u dreva, jakoje było pamiž mnoju i druhim chłopcam-biełarusam. Askiepkami źvierchu nas nakryła. U vyniku evakuacyja zabrała i nas», — zhadvaje Šurmiej.
Fota: pres-słužba pałka Kalinoŭskaha
Dzie biare abutak 50-ha pamieru
Pavieł maje 50-y pamier nahi. Z abutkam jamu dapamahajuć siabry z Amieryki, jakija nabyvajuć nieabchodna na e-bay:
«Za apošnija piać-dziesiać hadoŭ u mianie ŭvieś nabyty abutak z Amieryki, z e-bay. Ale ciapier ja bačyŭ u kramach va Ukrainie, jakija handlujuć vajskovym adzieńniem, dobryja vajskovyja boty majho pamieru».
Pra zarobki vajaroŭ
Pavieł havoryć, što jon, jaki i inšyja bajcy pałka Kalinoŭskaha, — dobraachvotnik.
«Kali my ŭsie ŭ kancy lutaha — pačatku sakavika prabiralisia siudy, to nichto pra kantrakty nie viedaŭ i nie dumaŭ. Mnie zdajecca, kali b ciapier nas pazbavili kantraktaŭ, to niašmat ludziej pakinuli b našy šerahi», — adznačaje Šurmiej.
Pa jaho słovach, u kancy sakavika minułaha hoda im paviedamili, što ŭsie inšaziemcy iduć na kantrakty z Uzbrojenymi siłami Ukrainy.
«My atrymali kantrakty, akład, miedyčnuju dapamohu. Usie hetyja hrošy vykarystoŭvajucca na ramont techniki, amunicyju, pryłady dla zbroi. Kali niechta dumaje, što jon na hetych hrošach stanie bahatym, to jon vielmi pamylajecca. Hetyja hrošy treba vykarystoŭvać na baraćbu»,
— raspaviadaje bajec.
Šarmiej adznačaje, što zarobak u taho, chto nie prymaje ŭdzieł u bajavych dziejańniach, składaje kala 60 tysiač hryvień (kala 1600 dalaraŭ). Kali čałaviek niepasredna prymaje ŭdzieł ceły miesiac u bajavych dziejańniach, to zarobak budzie ŭ dva razy bolej.
Jak budzie vyzvalacca Biełaruś
Pavieł Šurmiej prytrymlivajecca pohladu, što mirnym šlacham situacyju ŭ Biełarusi nielha vyrašyć.
«Chočam my hetaha ci nie chočam, heta budzie, na žal, vajskovy šlach. Davajcie ŭjavim, što Ukraina pieramahaje ŭ vajnie. Treba, kab pieramoha była takaja, kab u Rasii takija pracesy pajšli, kab joj nie było spravy da padtrymki Łukašenki. Ale što, Łukašenka ad hetaha pahadzicca pakinuć Biełaruś, palacieć u Emiraty? A kudy ŭsie siłaviki, represiŭnaja sistema dzienucca? Ci jana ŭsia skaža «prabačcie, my nie mieli racyi»?
— zadaje pytańni Šurmiej.
Fota: archiŭ Paŭła Šurmieja
Bajec adznačaje, što ŭ jaho hałavie zastajucca słovy Karajeva, jaki 2020-m cytavaŭ słovy Lenina ab tym, što nichto prosta tak uładu narodu mirnym šlacham nie addaść.
Pavieł spadziajecca, što jon i jaho adnapałčanie buduć prykładam dla biełarusaŭ u tym, što «nichto za nas nie vyrašyć naš los».
«Hałoŭnaje — apraŭdać nadziei ludziej, nie dać im falšyvaj nadziei. Nam treba rabić jašče bolš, kab ludzi ŭ Biełarusi, kali pryjdzie čas, kali my budziem tudy ŭvachodzić, kab jany paŭstali», — kaža Pavieł.
Pachod na Biełaruś
Bajec nie kankretyzuje płany pa vyzvaleńni Biełarusi.
«My nad hetym pracujem. My havorym pra nadzieju dla ludziej. Na toj momant, kali akno mahčymaściej adkryjecca i treba budzie iści ŭ Biełaruś, pavinien być płan. Moža tak zdarycca, što jano adkryjecca praź miesiac»,
— havoryć Šurmiej i adznačaje, što kankretna ŭ jaho jość płan taho, jak jon budzie vyzvalać svaju rodnuju Lidu.
«Na maju ŭłasnuju dumku, horad treba budzie vyzvalać ź litoŭskaha boku. Na siońnia heta nierealna. Ale nichto nie viedaje, što budzie zaŭtra. A, naprykład, u čaćvier ci piatnicu vy mahli viedać, što Pryhožyn na Maskvu pojdzie? Tamu ja trymaju ŭ hałavie, jak ja heta baču»,
— dzielicca svaim pohladam bajec.
Adnosiny da Łukašenki
Šurmiej zhadvaje pra toje, jak u 2008 hodzie jaho i inšych spartoŭcaŭ pravažali na Alimpijskija hulni ŭ Piekin.
«U Pałacy Respubliki my čakali Łukašenku. Nas tam sabrali 100-150 čałaviek My stajali ŭ dva šerahi. Jon spaźniaŭsia. Kali jon źjaviŭsia, išoŭ pierad nami, u mianie ŭ hałavie była dumka ab tym, ci paśpieŭ by ja jamu što-niebudź u horła ŭtyrknuć»,
— dzielicca Šurmiej.
Jon adznačaje, što jaho adnosiny da Łukašenki z samaha pačatku, z 1994 hoda, byli, miakka kažučy, niadobryja.
«Mnie nie chapiła adnaho miesiaca da 18-hodździa, kab pryniać udzieł u vybarach. Ale ŭžo ŭ toj čas ja byŭ na baku Zianona Stanisłavaviča Paźniaka», — dzielicca Šurmiej.
Spartoviec raspavioŭ pra toje, što jaho z-za adnosin da Łukašenki chacieli vyklučyć z vučylišča alimpijskaha reziervu.
«Ja tady vučyŭsia ŭ Respublikanskim vučyliščy alimpijskaha reziervu ŭ Minsku i pryvioz z Čempijanatu śvietu płakaty. Tam było šmat čystaha miesca. I ja napisaŭ: «Biełaruś — u Jeŭropu. Łukašenku — u ž*pu», «Łuku — na muku». Voś heta toje, z čym u 1996-1999 hodzie vychodzili ludzi na vulicy i płoščy»,
— zhadvaje Šurmiej.
Pa jaho słovach, płakaty z takimi nadpisami jon paviesiŭ u svaim pakoi. Pajechaŭ na zbory. A kali viarnuŭsia, to jaho prymusili ich źniać. Tolki praz hadoŭ piatnaccać Pavieł daviedaŭsia, što ŭ toj čas stajała pytańnie ab jaho vyklučeńni z vučylišča.
«U toj momant mnie było hadoŭ 20. Ja vystupaŭ za zbornuju Biełarusi pa akademičnym viesłavańni. Majstar sportu byŭ. Na čempijanaty śvietu jeździŭ. Tady jany na vahi pakłali toje, što jany straciać i što im budzie, kali jany mianie nie vyklučać. I ja zastaŭsia», —
havoryć były spartoviec.
Na dumku Paŭła, Łukašenka nie śmieły čałaviek.
Pra žonku-ŭkrainku
Pavieł Šurmiej zhadvaje, što paznajomiŭsia z žonkaj u 2006 hodzie na čempijanacie śvietu ŭ Anhlii. Jana taksama zajmałasia akademičnym viesłavańniem.
«Jana na 12 hadoŭ maładziejšaja. Ale, jak jana kaža, navat kab nie viesłavańnie, my ŭsio roŭna ź joj by paznajomilisia. Bo my dźvie častki adnaho cełaha»,
— dzielicca asabistym Pavieł.
Były spartoviec zhadvaje, što dla jaho nie było prablemaj toje, što jaho dziaŭčyna žyvie za tysiaču kiłamietraŭ ad jaho. Pavieł pry luboj mahčymaści, kali byŭ čas pamiž zborami, vyryvaŭsia i jechaŭ u Kijeŭ ci Nikałajeŭ.
A ŭ 2014 hodzie Šurmiej surjozna dumaŭ pajści vajavać za Ukrainu. Ale jaho spynili dumki pra maci.
Kali ž Pavieł apynuŭsia na vajnie, to žonka jaho padtrymała i pajechała za im u połk:
«Jana mianie maksimalna padtrymała. U pačatku vajny jana znachodziłasia ŭ Nikałajevie, jaki vielmi ščylna abstrelvaŭsia. 25 lutaha jana zabrała maci, svaju kumu i jaje dačku i na aŭtamabili praz Čarnaŭcy, dzie spynilisia ŭ maich siabroŭ, praz Rumyniju pryjechali ŭ Polšču, dzie taksama polskija spartoŭcy-vieślary akazali dapamohu. Jana znachodziłasia tam.
Pryjazdžała da mianie minułym letam, vosieńniu. Ale voś na Novy hod jana viarnułasia znoŭ va Ukrainu. Spačatku ŭ Dniepr, bo žadała być bližej da mianie. Na toj čas u Zaparožskaj vobłaści znachodziłasia naša baza. Ale paśla majho ranieńnia, jak mianie pieraviali ŭ Kijeŭ, jana taksama siudy pryjechała. Jana vyvučyłasia na masažysta i robić masaž bajcam».
Čytajcie jašče:
Raskazvajem pra biełaruskaha vieślara, jaki pajechaŭ vajavać za Ukrainu
