«Kali vy dumajecie, što, znachodziačysia pry hetaj uładzie, ja niešta praźmiernaje atrymaŭ i atrymaŭ naohuł, vy pamylajeciesia. Ničoha padobnaha. Ja pracuju na vysokaj pasadzie, jakuju mnie davieryŭ narod. Pracuju. A nie ŭładaru», — skazaŭ Łukašenka.
«Nie ja ž vyrašaju, być mnie pry ŭładzie ci nie», — zajaviŭ jon, havoračy pra try dziesiacihodździ la rula krainy.
Adkazvajučy na pytańnie pra los Biełarusi paśla jaho kiraŭnictva, Alaksandr Łukašenka skazaŭ: «Jaki budzie los majoj Biełarusi, ja spadziajusia, my z vami ŭbačym».
«Ja zadumvajusia, što budzie dalej, što budzie paśla mianie. Ale, kali ja budu žyvy paśla prezidenckaha terminu, ja budu iści hetym šlacham i zmahacca za suvierennuju i niezaležnuju Biełaruś», — skazaŭ jon.
«Što tyčycca apošniaha dyktatara Jeŭropy, vy pavinny ŭžo paprasić prabačeńnia pierada mnoj. Vy ŭžo adyšli ad hetaha aznačeńnia. Nijaki ja nie dyktatar, a kali i dyktatar, to nie apošni», — dadaŭ jon, nie ŭdakładniajučy, kaho maje na ŭvazie.
Na pytańnie ab udziele ŭ prezidenckich vybarach u 2025 hodzie Łukašenka adkazaŭ: «Ja absalutna ničoha nie płanavaŭ».
Masavyja palityčnyja represii ŭ Biełarusi praciahvajucca z 2020 hoda, kali vybary supravadžalisia nierehistracyjaj i aryštami praciŭnikaŭ Łukašenki i naziralnikaŭ na vybarčych učastkach. Niahledziačy na heta, Alaksandr Łukašenka, miarkujučy pa źviestkach z učastkaŭ, dzie vybarčyja kamisii dazvolili naziralnikam sačyć za padlikam hałasoŭ, prajhravaŭ Śviatłanie Cichanoŭskaj, ale nie addaŭ ułady.
Z 2022 hoda, paśla napadu Rasii na Ukrainu, biełarusaŭ pačali pieraśledavać i za antyvajennyja vykazvańni abo simpatyi da Ukrainy.
Za hety čas u krainie adbyłosia nie mienš za 50 tysiač palityčna matyvavanych zatrymańniaŭ, zaviedziena nie mienš za 12 tysiač palityčna-kryminalnych spraŭ i adkinutyja bazavyja normy zakonnaści i marali. Sistemny charaktar nabyli katavańni palitźniavolenych.
Heta biada i hańba.