Daśledčyki, jakija vyvučajuć uzajemasuviaź pamiž fizičnymi praktykavańniami i pačućciom hoładu, vyśvietlili, što pavieličeńnie vysiłkaŭ na treniroŭcy moža mieć taki ž efiekt, jak i ŭ preparataŭ dla pachudzieńnia, paviedamlaje The Times.
Aktyŭnaja fizičnaja dziejnaść pavyšaje ŭzrovień harmonu GLP-1, jaki źjaŭlajecca asnovaj dla niekatorych lekaŭ ad atłuścieńnia, — jon prymušaje vas adčuvać siabie sytym, bo zapavolvaje pieratraŭlivańnie i źnižaje apietyt. Hety harmon pavyšany niekalki hadzin paśla treniroŭki.
Taksama navukoŭcy vyvučajuć, jak upłyvaje na ŭzrovień hoładu łaktat — pabočny pradukt, jaki vypracoŭvajuć ciahlicy padčas intensiŭnych praktykavańniaŭ. U niadaŭnim daśledavańni, apublikavanym u brytanskim «Časopisie prykładnoj fizijałohii», jany paraŭnali vysokaintensiŭnuju intervalnuju treniroŭku (HIIT) na rovary / biehavoj darožcy z 20-chvilinnym bieham u spakojnym tempie.
Analizy kryvi pakazali, što ŭzrovień łaktatu byŭ pradkazalna vysoki padčas HIIT-treniroŭki, i čym vyšejšy byŭ uzrovień łaktatu, tym nižejšy ŭzrovień hrelinu — harmonu, jaki stymuluje apietyt, što śviedčyć pra mocny efiekt padaŭleńnia apietytu.
U charčovych dziońnikach, jakija zapaŭniali ŭdzielniki paśla trenirovak, hrupa, jakaja zajmałasia vysokaintensiŭnymi treniroŭkami i mieła vysoki ŭzrovień łaktatu, paviedamiła pra spažyvańnie na bolš jak 200 kałoryj mienš, čym biehuny ŭ siarednim tempie. Heta nievialikaje, ale patencyjna značnaje źnižeńnie, kali paŭtarać takija praktykavańni niekalki razoŭ na tydzień.
Takim čynam, kali vy rehularna zajmajeciesia aktyŭnymi vidami sportu, to vaš apietyt bolš padaŭleny ŭvieś čas.
Pry ŭmovie, što vy raspaznajacie pačućcio sytaści i nie zachodzicie ŭ kaviarniu pa kavu i desiert adrazu paśla treniroŭki, kab papoŭnić stračanyja kałoryi.
Jašče adnoj paradaj moža być treniravacca ŭ pačatku dnia, bo zvyčajna ludzi bolš jaduć paśla viačernich trenirovak i mienš — paśla ranišnich.
Voś na jakija jašče asablivaści možna źviarnuć uvahu.
Intervalnyja treniroŭki źnižajuć apietyt macniej, čym zvyčajnyja
U daśledavańni Univiersiteta Uiłfryda Łarje navukoŭcy paraŭnali pavolny bieh ź dźviuma treniroŭkami ŭ styli HIIT: adna ŭklučała 60 siekund chutkaha biehu na biehavoj darožcy, za jakimi išło 60 siekund spakojnaha biehu ci chady — kambinacyja paŭtarałasia dziesiać razoŭ; druhaja składałasia z vaśmi 15-siekundnych spryntaŭ na chatnim rovary z dvuchchvilinnym adpačynkam pamiž ryŭkami.
Uzrovień łaktatu byŭ našmat vyšejšy paśla trenirovak HIIT, i ŭdzielniki źjeli na 129 kałoryj mienš paśla intervalnaha biehu i na 201 mienš kałoryj paśla treniroŭki na rovary ŭ paraŭnańni z hrupaj, jakaja zajmałasia prosta bieham.
Takim čynam, čym bolš namahańniaŭ vy prykładajecie pry vykanańni praktykavańniaŭ, tym bolš paśla źnižajecca žadańnie pajeści.
Ale prabiežka abo prahułka — lepš, čym ničoha
Nie ŭsim treba zajmacca spryntam i rabić intervalnyja treniroŭki, kab być zdarovymi i ŭtajmoŭvać apietyt. Navat kali vy prykładziacie trochi bolš namahańniaŭ padčas chady abo prabiežki, — hetaha moža być dastatkova.
Kamuści, kab praduchilić pierajadańnie, moža być dastatkova navat hadziny ŭmieranaj chady, bo kali vy robicie heta štodnia — vypracoŭvajecca zvyčka, jakaja dapamahaje kantralavać vahu.
Majcie na ŭvazie: płavańnie pakinie vas bolš hałodnymi, čym jazda na rovary
Vyniki ekśpierymientaŭ pakazali, što pačućcio hoładu rezka pavialičvałasia paśla płavańnia: płyŭcy spažyvali ŭ siarednim na 142 kałoryi bolš, čym paśla prosta siadzieńnia. Tyja, chto jeździŭ na rovary, taksama źjeli bolš, čym paśla siadzieńnia, ale tolki na 94 dadatkovyja kałoryi, što niaznačna adroźnivajecca ad adpačynku.
Reč u tym, što cieła vykarystoŭvaje bolš enierhii dla vypracoŭki ciapła pry apuskańni ŭ prachałodnuju vadu, i heta moža być adnoj z pryčyn žadańnia papoŭnić kałoryi.
Čytajcie jašče:
Jaki najlepšy čas dla śniadanku, kali zranku vy zajmajeciesia sportam?
Čym bolš ludzi jeździać, tym lepš siabie adčuvajuć — daśledavańnie
