Hryby Psilocybe cubensis viadomyja svaimi halucynahiennymi efiektami. Fota: Wikimedia Commons
Jak piša Le Monde, Aŭstralija stała adnoj ź pieršych krain u śviecie, jakaja dazvoliła vykarystańnie ekstazi i halucynahiennych hryboŭ dla miedycynskich met. Psichijatry tut z 1 lipienia mohuć pryznačać MDMA dla lačeńnia posttraŭmatyčnaha stresavaha rasstrojstva, a psiłacybin z halucynahiennych hryboŭ — pry depresii, jakaja nie paddajecca inšym sposabam lačeńnia.
Takoje rašeńnie było pryniata ŭ lutym hetaha hoda Nacyjanalnaj radaj Aŭstralii pa ałkaholi i narkotykach.
MDMA, taksama viadomy jak ekstazi dla viečarynak, ujaŭlaje saboj sintetyčny narkotyk, jaki dziejničaje jak halucynahien. Takim ža dziejańniem z-za aktyŭnaha złučeńnia psiłacybinu vałodaje kala 200 vidaŭ hryboŭ.
Choć Aŭstralija — pieršaja kraina ŭ śviecie, jakaja rehuluje vykarystańnie narkotykaŭ u jakaści lekaŭ, kliničnyja vyprabavańni taksama pravodziacca ŭ ZŠA, Kanadzie i Izraili.
Aŭstralija pierakłasifikavała hetyja rečyvy paśla vyprabavańniaŭ, praviedzienych Aŭstralijskim upraŭleńniem pa terapieŭtyčnych tavarach, jakoje acaniła ich jak «adnosna biaśpiečnyja» pry vykarystańni ŭ «asiarodździ, kantralavanym ź miedycynskaha punktu hledžańnia».
Prychilniki rašeńnia spadziajucca, što hetyja rečyvy mohuć pryvieści da vyrašalnych pośpiechaŭ u lačeńni niekatorych psichičnych rasstrojstvaŭ.
Majk Maskier (Mike Musker), daśledčyk u halinie psichičnaha zdaroŭja i praduchileńnia samahubstvaŭ va Univiersitecie Paŭdniovaj Aŭstralii, u intervju vydańniu adznačyŭ, što MDMA daje pacyjentam «pačućcio suviazi», jakoje dazvalaje im ablehčyć kantakt z terapieŭtam i abmierkavać svoj traŭmatyčny dośvied.
Maskier ličyć, što «psichaduchoŭny efiekt» psiłacybinu, «jakoha vy nie atrymlivajecie z dapamohaj tradycyjnych miedykamientaŭ, moža źmianić vaša ŭsprymańnie siabie i, kali pašancuje, moža dać vam žadańnie žyć».
Śpiecyjalist sumniavajecca, što hetyja preparaty buduć «šyroka vykarystoŭvacca» pacyjentami da 2024 hoda. Samo ž lačeńnie nie budzie vyhladać jak prosty pryjom tabletki. Ekstazi, naprykład, napeŭna, zapatrabuje troch pryjomaŭ ciaham piaci-vaśmi tydniaŭ.
Pryčym kožny sieans budzie doŭžycca kala vaśmi hadzin pry niepasrednaj prysutnaści psichaterapieŭta. Akramia taho, z-za darahoŭli (kala 1000 aŭstralijskich dołaraŭ, abo 609 jeŭra) takija sieansy nie buduć dastupnyja kožnamu.
Adnak, jak adznačaje Le Monde, hety dazvoł nie byŭ adnadušna padtrymany ŭ navukovaj supolnaści. Niekatoryja daśledčyki ličać jaho zaŭčasnym.
Tak, kahnityŭny niejrapsichołah prafiesar Suinbiernskaha technałahičnaha ŭniviersiteta ŭ Mielburnie Śjuzien Rosieł (Susan Rossell) adznačyła, što choć hetyja mietady lačeńnia «majuć patencyjał», Aŭstralija «prasoŭvajecca napierad na piać hadoŭ raniej, čym jana pavinna heta zrabić».
Prafiesar zaŭvažaje, što «dla luboha inšaha typu zachvorvańnia, jak sardečna-sasudzistyja zachvorvańni abo rak, niemahčyma vyvieści leki na rynak hetak ža chutka, jak zroblena ŭ hetym vypadku».
Leki nie prajšli ŭsie nieabchodnyja kliničnyja vyprabavańni, u pryvatnaści, niama paraŭnańnia ich efiektyŭnaści z terapijaj, jakaja ciapier prymianiajecca, ci z płaceba.
Aŭstralijskaje ŭpraŭleńnie pa terapieŭtyčnych tavarach, u svaju čarhu, adznačaje, što rašeńnie «prymaje da ŭvahi toj fakt, što dokazy vykarystańnia hetych rečyvaŭ dla lačeńnia psichičnych zachvorvańniaŭ jašče nie ŭstanoŭlenyja».
U toj ža čas «pieravahi dla niekatorych pacyjentaŭ pieravažvajuć ryzyku, i ciapier brakuje varyjantaŭ dla pacyjentaŭ, jakija pakutujuć ad peŭnych psichičnych zachvorvańniaŭ, što ź ciažkaściu paddajucca vylečvańniu».
Čytajcie jašče:
ŁSD, psiłacybin i ekstazi ŭ aptekach: jak navukoŭcy daśledujuć psichadeliki, kab stvaryć novyja leki
