Skarha va Ukrpoštu ad vałanciorki Iryny Łukašenki nakont niemahčymaści atrymańnia hrašovych vypłat ad AAN. Fota: archiŭ Iryny Łukašenki
Raniej, adrazu paśla pačatku poŭnamaštabnaj vajny 24 lutaha 2022 hoda, biełarusam va Ukrainie zabłakavali bankaŭskija rachunki. U pastanovie Nacbanka Ukrainy №18 było skazana: «Spynić ažyćciaŭleńnie bankami raschodnych apieracyj pa rachunkach rezidentaŭ Rasijskaj Fiederacyi / Respubliki Biełaruś». Vyklučeńnie — biełarusy-vajskoŭcy (tyja ž kalinoŭcy), paźniej i niekatoryja biełaruskija žurnalisty: BAŽ damahłasia razbłakiroŭki rachunkaŭ žurnalistaŭ va Ukrainie, nakiroŭvajučy zvaroty va ŭładnyja struktury. Ale i heta pratryvała niadoŭha. Sioleta ŭ sakaviku rachunki zabłakavali paŭtorna.
Aryna Koršunava, žurnalistka «Radyjo Svaboda», paćviardžaje, što kala hoda zmahła pakarystacca svajoj kartkaj, adkrytaj va ŭkrainskim banku. Ale viasnoj rachunak znoŭ zabłakavali z usimi srodkami, što byli na im:
«Pracuju žurnalistkaj, maju paćviardžeńni ad Słužby biaśpieki Ukrainy pra svaju pazicyju nakont vajny, razmaŭlaju pa-ŭkrainsku lepiej i čaściej za pałovu Kijeva, ale, na dumku ŭładaŭ, nie zasłuhoŭvaju mieć hrošy na kartcy ŭ anivodnym z bankaŭ Ukrainy», — dzielicca dziaŭčyna.
Dla vyrašeńnia prablemy ź lehalizacyjaj va Ukrainie, mnohija biełarusy padavali dakumienty na biežanstva. Razhlad ich tut moža doŭžycca hadami, u hety čas adzinym dakumientam, jaki vydajecca mihracyjnaj słužbaj u abmien na pašpart, ličycca daviedka pra zvarot pa abaronu va Ukrainie.
Takaja daviedka vydajecca tym, chto padaŭsia na biežanstva, ale nie atrymaŭ jaho jašče. Fota: Aleś Minaŭ
Sama pracedura adbyvajecca pad ehidaj Upraŭleńnia Viarchoŭnaha kamisara AAN pa spravach biežancaŭ. Adpaviedna ad AAN raz na try miesiacy vypłačvajecca hrašovaja dapamoha tym, chto padaŭsia na takuju abaronu: hrošy prychodziać terminovym pieravodam na imia čałavieka praz Ukrpoštu, tamu dla atrymańnia nie treba mieć bankaŭskaha rachunku, a dastatkova pryjści ŭ luboje adździaleńnie z dakumientam ad mihracyjnaj słužby.
Siońnia ž i hetyja vypłaty dla biełarusaŭ stali niedasiažnymi: daviedka pra zvarot pa abaronu supracoŭnikaŭ pošty ŭžo nie zadavalniaje, patrabujuć albo pašpart hramadzianina Ukrainy, albo paśviedčańnie na pastajannaje pražyvańnie (daviedka taki status nie maje).
Vałanciorka Ira Łukašenka ŭ statusie padačy na biežanstva ŭžo amal paŭtara hoda. Apošnija dva pieravody ad AAN atrymlivała ŭ hałoŭnym adździaleńni na Chryščaciku:
«Siońnia ja pryjšła da toj ža apieratarki, jakaja absłuhoŭvała mianie raniej. I jana skazała, što praviły źmianilisia: ciapier pa maim dakumiencie jana moj pieravod mnie nie addaść, — raskazvaje dziaŭčyna (u jaje daviedka pra zvarot pa abaronu). — Pakazała mnie śpis dakumientaŭ, pa jakich atrymać pieravod možna. Tam jość dakumienty biežancaŭ, ale moj, atrymlivajecca, nie z tych…»
Paśla hetaha Iryna źviarnułasia ŭ inšaje adździaleńnie pošty, tam dziaŭčynie ŭžo razdrukavali karparatyŭny list, u jakim zaznačana, što pieravod biełarusam mohuć vydać, kali jość «rehistracyja miescaznachodžańnia va Ukrainie».
«U maim paśviedčańni jość adras majho pražyvańnia tut. Ale i hetaha akazałasia niedastatkova. Ja napisała skarhu hienieralnamu dyrektaru Ukrpošty. Ja zastajusia va Ukrainie, tamu što lublu jaje i chaču, kab jana pieramahła. I pakazvaju heta nie tolki słovami, ale i spravami. Heta viedajuć i bačać usie, u tym liku orhany dziaržaŭnaj ułady Ukrainy. Ale prablemy z rachunkami, hrašovymi pieravodami i inšym ad hetaha nie źnikajuć».
Hrošy ad AAN Iryna płanavała patracić na toje, kab zładzić čarhovuju akcyju ŭ Kijevie da Dnia biełaruskaj kultury: biaspłatna pačastavać ukraincaŭ chaładnikom.
«Takuju akcyju ŭ parku Šaŭčenki my ŭsio roŭna zrobim, ale zrobim nie dziakujučy, a nasupierak!»
U anałahičnaj situacyi akazalisia i inšyja biełarusy Ukrainy. Anarchist Ilja Siańko z Baranavičaŭ uciok ad palityčnaha pieraśledu na radzimie ŭ Kijeŭ u 2021 hodzie. Chłopiec sutyknuŭsia z prablemaj lehalizacyi paśla pačatku ŭvarvańnia: adździaleńni mihracyjnaj słužby nie prymali dakumienty.
«Ja źviarnuŭsia pa dapamohu ŭ AAN, namahajusia padacca na biežanstva. Mała taho, što mihracyjka sistematyčna parušaje zakony Ukrainy, tak jašče ciapier ja nie mahu atrymać hrašovuju dapamohu ad AAN. Liču heta dyskryminacyjaj i parušeńniem pravoŭ čałavieka!» — aburajecca aktyvist.
Na haračaj linii Ukrpošty nam zaznačyli, što dziejańni supracoŭnikaŭ, jakija nie vydajuć pieravody, pravamiernyja:
«Toje, što takija pieravody vydavalisia raniej, było pamyłkaj našych supracoŭnikaŭ, bo jość pastanova Nacbanka Ukrainy №18, my abapirajemsia na jaje. Tamu kali ŭ vas budzie inšy dakumient — pašpart hramadzianina Ukrainy ci paśviedčańnie na pastajannaje pražyvańnie va Ukrainie, — prychodźcie, vam vydaduć pieravod».
