Pavieł Padabied. Fota: BAŽ
Pieršapačatkova pasiadžeńnie 30 červienia było zapłanavana na 15.00, pra što napiaredadni i śviedčyła infarmacyja ŭ raskładzie na sajcie Viarchoŭnaha suda. Adnak raptam čas pasunuli na 10-ju ranicy — jaŭnaja prykmieta, što zdać spravu ŭ archiŭ vyrašyli da doŭhich vychodnych.
Tak i atrymałasia: u pieršaj pałovie pradstaŭnik dziaržabvinavačańnia na padstavie č. 3 art. 361-1 Kryminalnaha kodeksa prapanavaŭ pakarać žurnalista 4 hadami papraŭčaj kałonii, a pa abiedzie sudździa Jaŭhien Pisarevič pryniaŭ prapanovu bieź piarečańniaŭ. Svajaki i sam fihurant ličać vyrak praźmierna strohim i nie adpaviednym inkryminavanym «złačynstvam».
Jašče raniej Pavieł Padabied u listach na volu pisaŭ, što ŭ vypadku niespryjalnaha dla siabie rašeńnia budzie padavać apielacyjnuju skarhu ŭ Viarchoŭny sud Biełarusi, jak piša Biełaruskaja asacyjacyja žurnalistaŭ.
Padčas pieršaha pasiadžeńnia stała viadoma, što Paŭłu Padabiedu inkryminujecca supraca z telekanałam «Biełsat» i, jak vynik, «udzieł u ekstremisckim farmavańni». U jakaści piersanalnaj datyčnaści demanstravalisia videasiužety «pratesnaha kantentu», u tym liku pryśviečanyja źnikłamu videaapierataru Dźmitryju Zavadskamu i zabitamu žurnalistu Paŭłu Šaramietu. Choć proźvišča fihuranta ŭ citrach nie značyłasia, pavodle «ŭskosnych prykmiet» było ahučana padazreńnie ŭ jaho niepasrednaj datyčnaści da zdymkaŭ.
Akramia taho, u chodzie pracesu stała zrazumieła, što telefon Paŭła Padabieda prasłuchoŭvaŭsia, hetaksama siłaviki mieli dostup da jahonaha listavańnia ŭ miesiendžarach.
Taksama žurnalista abvinavacili ŭ «karyślivych matyvach» ad žurnalisckaj dziejnaści i atrymańni finansavaj vyhady — padstavaj stała najaŭnaść kartki zamiežnaha banka. Nie vyklučana, što na hetaj padstavie padčas vyniasieńnia prysudu jamu dadatkova vypišuć štraf za patencyjna niaspłočanyja padatki ŭ Biełarusi.
