Fota: Virgin Galactic
Samalot-nośbit Eve razam z rakietapłanam uźlacieŭ z kasmaporta ŭ amierykanskim štacie Ńju-Mieksika ŭ čaćvier u 08:30 pa miascovym časie i prykładna praz hadzinu palotu, jaki tranślavaŭsia z kabiny karabla ŭ žyvym efiry, na vyšyni 13 600 mietraŭ rakietapłan adździaliŭsia ad samalota, uklučyŭ ułasnyja ruchaviki i vyjšaŭ da miežaŭ kosmasu, dasiahnuŭšy najbolšaj vyšyni ŭ 85 km, jak piša Bi-bi-si.
Uvieś palot doŭžyŭsia paŭtary hadziny, na borcie akramia dvuch piłotaŭ i astranaŭta-instruktara kampanii Virgin Galactic znachodzilisia troje italjanskich aficeraŭ-lotčykaŭ, jakija praviali šerah navukovych ekśpierymientaŭ va ŭmovach biazvažkaści, a kali karabiel dasiahnuŭ najvyšejšaha punkta palotu, razharnuli nacyjanalny ściah z nahody stahodździa italjanskich VPS.
Fota: Virgin Galactic
Choć na borcie kasmalota nie było turystaŭ jak takich, heta ŭsio ž byŭ kamiercyjny rejs, bo za svaich aficeraŭ zapłaciła Ministerstva abarony Italii.
Ciapier ser Ryčard Brensan płanuje pastupova adpraŭlać u palot tych, chto zahadzia nabyŭ kvitki koštam ad 250 da 450 tysiač dalaraŭ, usiaho ich kala 800 čałaviek. Niekatoryja bolš za dziesiać hadoŭ čakajuć svajoj hadziny, kab pabyvać na krai kosmasu, adnak dla bolšaści čakańnie abiacaje zaciahnucca.
Reč u tym, što karabiel Unity moža ŭziać na bort tolki niekalki pasažyraŭ, a paloty płanujecca pakul ździajśniać raz u miesiac, tak što čarha moža i razyścisia da taho času, pakul Virgin Galactic nie zapuścić novy kłas rakietapłanaŭ, jakija pavinny prystupić da kamiercyjnych palotaŭ u 2026 hodzie i ździajśniać rejsy ŭžo raz na tydzień.
Šlach kampanii Virgin Galactic da kamiercyjnych palotaŭ byŭ ciažkim. Jana była zasnavanaja ŭ 2004 hodzie na chvali pośpiechu nievialikaha ekśpierymientalnaha samalota SpaceShipOne, jaki dvojčy za dva tydni zmoh padniacca da miažy kosmasu i atrymaŭ pryz u 10 młn dalaraŭ za technałahičnyja inavacyi.
Brensan spadziavaŭsia tady, što kamiercyjnyja rejsy možna budzie zapuścić užo ŭ 2007 hodzie, adnak kampanija sutyknułasia ź niespadziavanymi techničnymi ciažkaściami, a ŭ 2014 hodzie prajekt ledź nie zharnuli paśla taho, jak pratatyp Enterprise razvaliŭsia pry nabory vyšyni, pry hetym zahinuŭ adzin z dvuch piłotaŭ.
Ryčard Brensan. Fota: John Lamparski / Getty Images
Tolki ŭ kancy 2018 hoda novy karabiel Unity, zmoh dasiahnuć vyšyni ŭ 80 km, što ličycca miažoj kosmasu. U 2021 hodzie ser Ryčard asabista adpraviŭsia na im u palot, nazvaŭšy svaje adčuvańni ad jaho niejmaviernymi.
Choć Unity ličycca subarbitalnym karablom — heta značyć jon nie ŭ stanie dasiahnuć chutkaści i vyšyni, nieabchodnaj dla vychadu na arbitu, — jon tym nie mienš daje pasažyram paspytać niekalki chvilin biazvažkaści ŭ vierchnim punkcie svajoj trajektoryi (im budzie dazvolena adšpilić ramiani).
Da taho ž ź iluminataraŭ rakietapłana adkryvajucca cudoŭnyja vidy na Ziamlu.
Misija, jakaja adbyłasia ŭ čaćvier, atrymała nazvu Galactic 01. Druhi rejs, Galactic 02, zapłanavany na žnivień. U jaho adpraviacca niekalki pasažyraŭ, jakija zahadzia nabyli kvitki.
