Aŭtobus z nadpisami Intercars u Krymie. Fota: blizko.by
Biznes — ničoha asabistaha?
Kampanija Intercars pačała ažyćciaŭlać pieravozki ź Minska ŭ akupavany Krym. U kamientary internet-partału Blizko.by dyrektarka kampanii «Bajertrans» Julija Burdon-Sabieckaja paviedamiła, što rejsy karystajucca papularnaściu. U płanach pieravozčyka — adkryć novyja maršruty, kab možna było dabracca nie tolki ŭ akupavanyja Jałtu, Ałuštu i Fieadosiju, ale i ŭ Jeŭpatoryju, jakaja znachodzicca na zachodnim uźbiarežžy paŭvostrava.
Skrynšot z sajta intercars-tickets.com
Tym nie mienš, miarkujučy pa infarmacyi na sajcie pieravozčyka, asnoŭnyja kirunki pracy kampanij «Interkars» i «Bajiertrans» — krainy Jeŭropy.
Skrynšot z sajta intercars-tickets.com
Vyhladaje, što kampanija nie aścierahajecca taho, što arhanizacyja pajezdak u Krym moža pryvieści da sankcyj z boku ES i ZŠA i reputacyjnaj ryzyki.
Dvie niadaŭnija publikacyi kampanii «Bajiertrans» u Google. 2 maja jany pišuć pra źnižki na novy rejs u Vilniu, a 15 — anansujuć novyja rejsy ŭ Krym i Krasnadarski kraj. Skrynšot z Google
Jak u RF kłapociacca pra biznes u Krymie
Kab pamienšyć ryzyku biznesu patrapić pad sankcyi, u 2019 hodzie ŭrad RF pryniaŭ admysłovuju pastanovu, jakaja vyznačaje vypadki, kali moža być abmiežavany dostup da danych u Adzinym dziaržaŭnym rejestry jurydyčnych asob. Zakon dazvalaŭ u tym liku nie afišavać danyja pra kampanii, jakija viaduć biznes u akupavanym Krymie.
Cikava, što 9 červienia 2023-ha dakumient zaznaŭ źmieny. U novuju redakcyju dadali i inšyja akupavanyja terytoryi — «Danieckuju Narodnuju Respubliku», «Łuhanskuju Narodnuju Respubliku», a taksama Zaparožskuju i Chiersonskuju vobłaści.
Skrynšot z sajta consultant.ru
Zvyčajna biznes, jaki choča zarablać na pracy z Krymam, idzie na chitryki i šukaje łaziejki, kab nie patrapić pad sancyi. Siarod papularnych mietadaŭ: adkryćcio daččynych kampanij abo firm-prakładak, dziakujučy jakim asnoŭnaja jurydyčnaja asoba zastajecca nibyta nie datyčnaj da hetaj dziejnaści.
Jeŭrapiejskija karani kampanii
Kali kazać pra Intercars, to źviartaje ŭvahu, što ŭ kamientary Blizko.by dyrektarka kampanii adznačyła, što pramyja rejsy ź Minska iduć tolki da Branska, dzie robicca pierasadka, bo druhaja linija maršrutu absłuhoŭvajecca rasijskaj kampanijaj.
Nielha vyklučać, što taki elemient zastajecca peŭnaj zaściarohaj, kab nie trapić pad sankcyi. Ale tym nie mienš na svaim sajcie apieratar zajaŭlaje, što pradaje kvitki ŭ hetym kirunku, arhanizoŭvaje maršrut i dzielicca płanami na adkryćcio novych kirunkaŭ na terytoryi Kryma.
Skrynšot z sajta intercars-tickets.com
Dla paraŭnańnia, na takich sajtach, jak Infobus ci Busfor, nabyć kvitki ŭ akupavany Krym niemahčyma.
Višańkaj na torcie ŭ vypadku z Intercars možna nazvać toj fakt, što heta kampanija maje jeŭrapiejskija karani. Jak paznačana na sajcie kampanii, hienieralnym dyrektaram źjaŭlajecca Patryk Žan Hi Burdon.
Skrynšot z sajta intercars-tickets.com
Zhodna ź infarmacyjaj u adkrytym dostupie, jon raniej mieŭ biznes u Hiermanii, dzie ŭžo fihuravała i Julija Burdon.
Skrynšot z sajta webvalid.de
Nie tolki Intercars supracoŭničaje z Krymam
Varta adznačyć, što Intercars — nie adzinaja kampanija, jakaja adkryta zajmajecca arhanizacyjaj pieravozak u Krym. Aproč jaje, jość šerah turystyčnych kampanij, jakija prapanujuć pucioŭki na paŭvostraŭ. Pra toje, što navat vajna nie spyniaje hetyja turfirmy adpraŭlać ludziej na adpačynak u Krym, my źviartali ŭvahu jašče letaś.
Turystyčnych ahienctvaŭ u Biełarusi, jakija pradajuć pucioŭki ŭ Krym, davoli šmat.
Skrynšoty z sajtaŭ datatour.by i andersen.by
Pra što zamoŭčvajuć pieravozčyki i turahienctvy?
Pieravozčyki i turapieratary, jakija ažyćciaŭlajuć arhanizacyju pieravozak i adpačynku ŭ Krymie, nie tolki padviarhajuć svoj biznes ryzycy trapić pad sankcyi abo panieści reputacyjnyja straty, ale i padstaŭlajuć svaich klijentaŭ i pasažyraŭ.
Reč u tym, što, zhodna z zakanadaŭstvam Ukrainy, trapić na terytoryju Kryma, nie parušajučy zakonaŭ, možna tolki z macierykovaj častki Ukrainy. U advarotnym vypadku čałaviek moža atrymać zabaronu na ŭjezd va Ukrainu terminam na piać hadoŭ. Naturalna, što ciapier heta nie asabliva aktualna, ale nichto nie viedaje, što budzie praz 3-5 hadoŭ. I jak takija pajezdki mohuć adhuknucca ŭ budučyni, kali raptam niechta zachoča źjeździć va Ukrainu, a tam vyśvietlicca, što čałaviek naviedvaŭ Krym.
Jašče adzin niebiaśpiečny momant takich pajezdak chavajecca ŭ tym, što ŭ rehijonie idzie vajna, tamu pajezdki na terytoryju Kryma lubym šlacham — heta dadatkovaja ryzyka.
Toj fakt, što niekatory biznes dazvalaje sabie supracoŭničać z Krymam i robić heta biez asablivych zaściaroh, havoryć ab tym, što miechanizm sankcyj niedaskanały. Kantrol za ich vykanańniem, jak vidać, taksama nie nadta pilny, asabliva, kali razmova idzie pra niejkich drobnych hulcoŭ. A etyčnyja normy i reputacyja, jak pakazvaje praktyka, cikaviać daloka nie ŭsich biznesoŭcaŭ jak siarod biełaruskich kampanij, tak i ich zachodnich partnioraŭ.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»
