Navukoŭcy vyjavili, što isnuje ŭzajemasuviaź pamiž sistemaj uznaharodžańnia ŭ mozhu i 24-hadzinnym rytmam. Ilustracyjnaje fota: «Naša Niva»
Jak paviedamlaje Die Welt, finskija vučonyja vyvučali ŭpłyŭ chranatypu i inšych faktaraŭ na praciahłaść žyćcia ludziej. Dla hetaha jany praanalizavali danyja nacyjanalnaha daśledavańnia bliźniat, u jakim uziało ŭdzieł amal 23 tysiačy mužčyn i žančyn, jakija naradzilisia da 1958 hoda. Daśledavańnie pravodziłasia z 1981 pa 2018 hod.
Svaimi vynikami navukoŭcy padzialilisia ŭ časopisie Chronobiology International.
U pačatku daśledavańnia bliźniat prasili acanić svoj unutrany hadzińnik. Kožny treci ŭdzielnik (33%) adznačyŭ, što jon «u bolšaj stupieni sava», kožny dziasiaty (9,9%) nazvaŭ siabie «niesumnienna savoju». Ź inšaha boku, 29,5% nazvali siabie «niesumnienna žaŭrankami» i jašče 27,7% — «u bolšaj stupieni žaŭrankami».
Jak pryznajuć sami aŭtary, taki padychod zjaŭlajecca słabaściu ich daśledavańnia: acenka chranatypu zasnavanaja na samaacency ŭdzielnikaŭ. Adnak u paraŭnańni z anałahičnymi daśledavańniami ich praca ŭklučała vyčarpalnyja danyja ab vobrazie žyćcia. Finy ŭličvali ŭzrovień adukacyi ŭdzielnikaŭ, užyvańnie imi ałkaholu i tytuniu, indeks masy cieła i praciahłaść snu.
Vučonyja vyjavili, što «sovy» byli maładziejšyja ŭ paraŭnańni z žaŭrukami, mieli krychu bolš vysokija pakazčyki ŭ katehoryi adukacyi, a taksama spažyvali bolš ałkaholu i tytuniu.
Navukoŭcy taksama adznačyli, što isnuje ŭzajemasuviaź pamiž sistemaj uznaharodžańnia ŭ mozhu i 24-hadzinnym rytmam.
«Stupień užyvańnia ałkaholu i narkotykaŭ karelujecca z načnoj badzioraściu», — havorycca ŭ daśledavańni.
Asabliva zaŭziatyja paŭnočniki taksama radziej paviedamlali, što śpiać vosiem ci bolš hadzin.
Navukoŭcy praanalizavali taksama danyja ab pryčynach śmierci kala 8800 udzielnikaŭ daśledavańnia, jakija pamierli da 2018 hoda.
Tut jany zaŭvažyli, što ŭ paŭnočnikaŭ na dzieviać pracentaŭ bolš šancaŭ pamierci, čym u tych, chto rana ŭstaje.
Adnak bolš padrabiazny analiz pakazaŭ, što asnoŭnymi pryčynami hetych śmierciaŭ byli kureńnie i ałkahol, a nie chranatyp udzielnikaŭ.
Hety vyvad paćviardžaŭsia tym faktam, što ŭdzielniki daśledavańnia, jakija nie kuryli i ŭmierana ŭžyvali ałkahol, nie mieli pavyšanaj ryzyki śmierci niezaležna ad taho, rana ci pozna jany kłalisia spać.
Čytajcie jašče:
Daśledčyki: «žavaranki» lepš pracujuć čym «sovy» pry tradycyjnym pracoŭnym dni
Navukoŭcy dakazali, što kaeficyjent intelektu źviazany z praciahłaściu žyćcia
čuvstvuju.. jeŝie niemnoho s vami nie posplu, j
biełaruskaja mova ŝie bilšie ŭzbahacica