Arciom Kaminski. Fota: jaho fejsbuk-staronka
Imia zahinułaha — Arciom Kaminski. Jon mieŭ litoŭskaje hramadzianstva, ale karani ŭ mužčyny — biełaruskija. Baćki Arcioma, biełarusy, pierabralisia ŭ Vilniu šmat hadoŭ tamu, i ciapier z radzimaj ich źviazvaje chiba što staraja dziadoŭskaja chata ŭ Astravieckim rajonie.
12 červienia Arciom z rodnymi jakraz i naviedvali hetuju chatu, kab uparadkavać terytoryju la jaje. Trahiedyja zdaryłasia, kali siamja ŭžo skiroŭvałasia dachaty: Arciom jechaŭ na matacykle Suzuki, jaho svajaki — na mašynie. Pavodle zvodak, mužčyna ruchaŭsia pa trasie R52 Hoza — Astraviec — Ašmiany, na 15-m kiłamietry trasy Kaminski pačaŭ abhaniać na skryžavańni. U hety momant 35-hadovy kiroŭca aŭtamabila Mazda, jaki ruchaŭsia ŭ tym ža kirunku, staŭ pavaročvać naleva i sutyknuŭsia z matacykłam Kaminskaha. Arciom zahinuŭ na miescy, kiroŭca mašyny nie paciarpieŭ.
Krynica: kadr z rolika UUS Hrodzienskaha abłvykankama
Znajomyja Kaminskaha apisvajuć jaho jak duža aściarožnaha čałavieka, tamu dakładna nie zrazumieła, što zdaryłasia na toj trasie. Kiroŭcu Mazda, hramadzianina RF, pryznali nievinavatym u zdareńni.
Arciom skončyŭ Vilenskuju biełaruskuju himnaziju imia Franciška Skaryny, advučyŭsia ŭ miedycynskim univiersitecie ŭ Minsku i pracavaŭ stamatołaham u Vilni. Znajomyja zhadvajuć jaho jak pazityŭnaha čałavieka, aktyvista ŭ školnyja časy. Tady ž, padčas navučańnia, Arciom sustreŭ svaju žonku, taksama biełarusku i navučenku Vilenskaj biełaruskaj himnazii — jana była jaho adnakłaśnicaj.
Z Kaminskim raźvitvajucca ŭ Vilni 15 červienia. Akramia žonki, u mužčyny taksama zastałasia dvuchhadovaja dačka, jakuju jon pachryściŭ dva tydni tamu.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»U Vałožynie kazula vybiła akno kinateatra
