Minabarony Biełarusi padzialiłasia videa, jak padčas vučeńniaŭ Uzbrojenych sił Biełarusi z orhanami vajskovaha kiravańnia i voinskimi čaściami techzabieśpiačeńnia «na bazie 43-ha arsienała rakiet i bojeprypasaŭ było adpracavana pytańnie padaŭleńnia i źniščeńnia BPŁA».
Dla padaŭleńnia bieśpiłotnika vykarystoŭvali 23-mm zienitnuju ŭstanoŭku ZU-23-2 i aŭtamat Kałašnikava.
Manitorynhavaja hrupa zaŭvažyła, što na videa biełaruski vajskoviec viadzie ahoń pa BPŁA z aŭtamata Kałašnikava z utułkaj dla chałastoj stralby.
Zhodna z praviłami stralby z aŭtamata AK-74, kateharyčna zabaroniena stralba z aŭtamata bajavymi patronami z nakručanaj na stvoł utułkaj dla chałastoj stralby.
U «Hajunie» ličać, što ŭ vajskoŭca ŭ mahazinie nie mahło być bajavych patronaŭ.
U Minabarony Biełarusi nie ŭdakładnili, jakim čynam moža być «padaŭleny i źniščany BPŁA» ahniom z aŭtamata chałastymi patronami.
«Bieručy pad uvahu pavodziny dvuch videaapierataraŭ (pieršy źniaŭ prymacavanaje videa, a druhoha možna zaŭvažyć na zadnim płanie), možna kanstatavać, što pravodzili nie treniroŭku pa źniščeńni BPŁA, a zdymku čarhovaj pakazuchi.
Vidavočna, MA Biełarusi pakul nie płanuje vučycca realna (a nie na kamieru) zmahacca z dronami i budzie pierajmać «paśpiachovy» dośvied pamiežnikaŭ Biełarusi», — piša «Hajun».
