Andrej Sańnikaŭ padčas intervju. Stop-kadr videa
U intervju ŭkrainskamu jutub-kanału «Fabrika novin» biełaruski palityk Andrej Sańnikaŭ vykazaŭsia pa aktualnych pytańniach palityčnaha paradku dnia Biełarusi. Pryvodzim asnoŭnyja tezisy.
Jak źmianilisia adnosiny pamiž Łukašenkam i Pucinym i što abmiarkoŭvali na Jeŭrazijskim forumie
Sańnikaŭ adznačaje, što adnosiny pamiž Łukašenkam i Pucinym istotna źmianilisia. Ciapier Łukašenka — maryjanietka, jakaja pradstaŭlała terytoryju Biełarusi dla vajennych apieracyj Rasii suprać Ukrainy. Akramia taho, praciahvajecca historyja z emihrantami, jakija praryvajuć hranicu z dapamohaj śpiecsłužbaŭ Łukašenki.
Palityk źviartaje ŭvahu na toje, što ŭvohule nielha vieryć aficyjnym paviedamleńniam, jakija zjaŭlajucca ŭ dziaržaŭnaj presie dźviuch krain. Jon raić hladzieć na realnuju situacyju i adsočvać naviny ci ŭciečki infarmacyi, jakija zvyčajna zjaŭlajucca paśla zaviaršeńnia ŭsich sustreč. Tolki tady, na dumku Sańnikava, možna zrazumieć, što adbyvajecca.
Palityk upeŭnieny, što padčas Jeŭrazijskaha forumu razhladalisia pytańni, źviazanyja z vajnoju. «Niedaremna tudy pajechaŭ sakratar Rady biaśpieki Valfovič», — zaŭvažaje Sańnikaŭ.
Vykazvańnie Łukašenki na forumie ab tym, što Biełaruś z Rasijaj ruchajucca ŭ pravilnym kirunku, palityk acaniŭ jak pravilnaje.
«Pryčynaj usiaho hetaha jość vajna, jakuju dva dyktatary raźviazali suprać Ukrainy. A taksama tatalitarnaja sistema, jakaja isnuje ŭ Rasii i Biełarusi. U ich — sotni, a ŭ nas — tysiačy palitviaźniaŭ. Jany dumajuć, što heta moža kahości zacikavić i ŭpeŭnić, što jany ruchajucca ŭ pravilnym napramku. Hety napramak u apramietnuju, dzie jany i znachodziacca sami i ciahnuć tudy inšych».
Ci adbudziecca pieramiaščeńnie biełaruskich vojskaŭ na miažu z Ukrainaj
Sańnikaŭ padkreślivaje, što ciapier Łukašenka całkam nie samastojnaja fihura. Ad jaho ničoha nie zaležyć. Kali budzie zahad Pucina, jon budzie jaho retranślavać. A voś vykanańnie zahadu zaležyć ad nastroju ludziej u Biełarusi, pavodzin apazicyi, jakaja nie prymaje hetaj vajny i vystupaje za pieramohu Ukrainy, pavodzin biełaruskich niezaležnych miedyja, jakija papiaredžvajuć ab tym, što budzie adbyvacca, i prapanoŭvajuć varyjanty.
«I siarod ich nidzie nie zhadvajecca pra toje, kab sa zbrojaj vajavać suprać ukraincaŭ. Možna zdacca, nakiravać zbroju suprać ahresaraŭ, akupantaŭ, dezierciravać. Miarkuju, što heta znachodzić vodhuk, i ludzi, jakija siońnia słužać u vojsku, zadumvajucca jakraz ab takich varyjantach. Asabliva tyja, kaho pryzyvajuć.
Jašče adzin faktar — u vojska pryzyvajuć udzielnikaŭ pratestaŭ 2020 hoda. Jany zaŭziata nienavidziać režym i nikoli, navat u vojsku, nie pojduć ni na jakoje jaho pryznańnie», — vykazvaje svajo mierkavańnie Sańnikaŭ i dadaje, što Łukašenka dobra razumieje, što ŭ vypadku, kali zahad ab pieramiaščeńni biełaruskich vajskoŭcaŭ da miažy z Ukrainaj budzie addadzieny, to jaho rezidencyi stanuć celami.
Ci baicca Łukašenka destabilizacyi situacyi
Sańnikaŭ ličyć, što Łukašenka vidavočna baicca taho, što ŭ Biełaruś mohuć zajści ŭzbrojenyja farmavańni:
«U jaho isteryka pry zhadcy dobraachvotnikaŭ, jakija vajujuć na baku Ukrainy. Upieršyniu, možna ličyć, u nas zjaviŭsia taki ŭzbrojeny fłanh demakratyčnaj apazicyi, jaki maje poŭnaje prava adstojvać niezaležnaść krainy sa zbrojaj u rukach.
Navat u Statucie AAN prapisana, što jość nacyjanalna-vyzvalenčy ruch. Taki ruch siońnia — usia biełaruskaja apazicyja, jakaja nie prymaje hetaha režymu. I heta prava jość u dobraachvotnikaŭ. Biełharad pakazvaje, što padobnaje nie vyklučana na terytoryi Biełarusi. Heta trymaje Łukašenku ŭ strachu».
Jak moža raźvicca situacyja ŭ Biełarusi paśla śmierci Łukašenki
Palityk ličyć, što ŭ vypadku śmierci Łukašenki ŭładu možna atrymać tolki šlacham narodnaha vystupleńnia.
«Pakul, na žal, biez vulicy z hetymi režymami zmahacca niemahčyma. Jany zachapili ŭsie efiektyŭnyja kanały elektronnaj infarmacyi, — kaža Sańnikaŭ. — Jany vykarystoŭvajuć suprać ludziej armiju i siłavikoŭ. Ale kali prabjecca praboina, to hetym siłavikam ničoha nie zastaniecca rabić, jak tolki pierachodzić na druhi bok».
Sańnikaŭ miarkuje, što tych, chto sapraŭdy padtrymlivaje Łukašenku, nie tak šmat. Heta chiba tolki tyja, chto zajmajecca niepasrednaj jaho achovaj.
U vypadku, kali Rasija nakiruje ŭ Biełaruś siły dla zadušeńnia supraciŭleńnia, na dumku Sańnikava,
«u nas budzie prava prasić uviadzieńnia sił padtrymki miru zvonku. Lepš za ŭsio NATA».
Ale palityk ličyć, što da hetaha nie dojdzie.
Chto budzie nastupnym prezidentam Biełarusi
Andrej Sańnikaŭ upeŭnieny, što ŭ vypadku praviadzieńnia spraviadlivych vybaraŭ, prezidentam stanie pradstaŭnik ad apazicyi. U toj ža čas jon ličyć, što dastatkova vialikuju padtrymku buduć mieć čynoŭniki i asobnyja siłaviki. Ale nie tyja, jakija majuć dačynieńnie da kryvavych złačynstvaŭ. Tamu Sańnikaŭ apošnim prapanoŭvaje: «Uklučajciesia, pracujcie mazhami. Na vybarach u vas jość šanc. Vy možacie česna pazmahacca».
Čytajcie jašče:
Andrej Sańnikaŭ vydaŭ dychtoŭnuju knihu pra turemnuju kuchniu roznych krain
Andrej Sańnikaŭ: U Biełaruś treba ŭvodzić miratvorčyja siły
Pierapisany pratakoł z vybaraŭ-2010 — u Sańnikava było 119 hałasoŭ, zastałosia 19 FOTAFAKT
