Pieraličym tezisna, što z prablem prahučała.
Narada ŭ Łukašenki. Čynoŭniki abmiarkoŭvajuć situacyju ŭ miedycynie. Fota: belta.by
Kadraŭ nie chapaje, ścieny razburajucca
Hałoŭnaja doktarka Respublikanskaha kliničnaha miedcentra Kiraŭnictva spraŭ Łukašenki Iryna Abielskaja pryznała toje, što nie jość tajamnicaj: balnicy nie ŭkamplektavany kadrami.
Pra niedachop kadraŭ havorycca daŭno. Zhodna z nacyjanalnym bankam vakansij, miedyčnym ustanovam krainy patrabujecca 4910 daktaroŭ-śpiecyjalistaŭ, 4066 miedsiaścior, 2750 sanitaraŭ.
Miedyki niezadavolenyja zarobkam dy zabiaśpiečanaściu žyllom.
Jość prablemy z vyrabami miedyčnaha pryznačeńnia i miedabstalavańniem, kazała Abielskaja, jakaja niadaŭna z admysłovaj kamisijaj jeździła praviarać balnicy.
Iryna Abielskaja (druhaja sprava) na naradzie ŭ Łukašenki. Fota: belta.by
Łukašenka ahučyŭ, što «dahetul jość aburalnyja prablemy bardaku ŭ balnicach, u paliklinikach, na FAPach».
«Ścieny i stoli razburajucca, dźviery pakasilisia, elemientarnyja sanitarnyja praviły nie vykonvajucca. (…) Pryčym takoje zdarajecca navat u piedyjatryčnych adździaleńniach…» — pieraličyŭ Łukašenka.
Staršynia Kamiteta dziaržkantrolu Vasil Hierasimaŭ siarod niedachopaŭ zhadaŭ vialikija čerhi. Niekatoryja pracedury treba čakać da piaci miesiacaŭ. A ŭ Rahačoŭskim rajonie čarha na prachodžańnie MRT raściahnułasia bolš čym na hod.
Vakcynacyja na papiery, karupcyja, zakryćcio FAPaŭ
Hienieralny prakuror Andrej Švied siarod prablem nazyvaŭ niedachop kadraŭ, niemetazhodnaje raschodavańnie srodkaŭ ad pazabiudžetnaj dziejnaści, biurakratyju.
Pryznaŭ i pahoniu za pakazčykami pa vakcynacyi.
«Sioleta my vyjavili ŭ Minskaj i Homielskaj abłaściach fakty taho, što vykidvajucca na śmietnicu prydatnyja dla ŭžyvańnia vakcyny suprać kavidu. 6 405 upakovak vyjaŭlena na zvałkach i śmietnikach u Homielskaj i Minskaj abłaściach», — raskazaŭ hienprakuror.
«Na pavierchni lažyć pahonia za pakazčykami pa vakcynacyi nasielnictva», — kanstatavaŭ jon.
Švied taksama havaryŭ pra karupcyju. Za minuły i hety hod raspačata 60 kryminalnych spraŭ. Pavodle prakurora, kiraŭniki miedyčnych ustanoŭ Minska za košt kavidnych vypłat pavysili sabie zarobki da 700 pracentaŭ. Tym časam piersanału, jaki pracavaŭ u kavidnych adździaleńniach, dapłata skłała tolki 27—29 pracentaŭ.
Na vioskach niepradumana začyniajuć fielčarska-akušerskija punkty, zamianiajučy ich pierasoŭnymi miedyčnymi kompleksami.
«FAP zakryvajuć pierš, čym paśpiavajuć pastavić u rajon pierasoŭny miedpunkt, i viaskoŭcam davodzicca źviartacca pa dapamohu ŭ susiednija vioski», — ukazvaŭ prakuror.
«Fakty ŭzrušyli navat hienprakurora»
Apisvajučy naradu, prapahanda padkreślivała, jak «ździvilisia» Łukašenka i inšyja vyšejšyja čynoŭniki prablemam u miedycynie, što hadami imi ž nie vyrašajucca.
«Ja była ŭražanaja», — pryvodzić STB słovy Kačanavaj.
«Łukašenka raskazaŭ, što jaho bolš za ŭsio ździviła z vyjaŭlenych u achovie zdaroŭja prablem», — daje zahałovak BiełTA.
«Niekatoryja fakty ŭzrušyli navat hienprakurora», — piša dziaržaŭnaje ahienctva ŭ inšym tekście.
Alaksandr Łukašenka na kamiery adčytvaje čynoŭnikaŭ. Fota: pres-słužba Łukašenki
Hetaj naradaj Łukašenka, vidać, chacieŭ pakazać, što jon za ŭsim sočyć i naviadzie paradak. Ale nasamreč atrymałasia inakš:
jon sam i vyšejšyja čynoŭniki raśpisalisia ŭ tym, što tak i nie zmahli za stolki hadoŭ kardynalna palepšyć situacyju ŭ halinie achovy zdaroŭja. Prablemy, jakija «ŭražvali da hłybini dušy» funkcyjanieraŭ, absalutna nie novyja.
Miedyki, ź jakimi «Našaj Nivie» ŭdałosia pahavaryć, kažuć, što narada nahadvała zrežysavanaje šou.
«Vypuścili par pierad nasielnictvam. Heta ŭcioki ad prablemy», — ličyć adzin z daktaroŭ.
Vyrašeńnie kadravaha pytańnia Łukašenka bačyć prosta — razabracca z metavikami.
Surazmoŭcy «Našaj Nivy» adznačajuć, što prablemy ź miedyčnymi kadrami nie vyrašajucca pahrozami i naradami. Heta hłabalnaja dla ciapierašniaj Biełarusi prablema, źviazanaja z ahulnaj situacyjaj u krainie i nie tolki ŭ sistemie achovy zdaroŭja. I vyrašyć usio da 1 studzienia, jak adrapartavaŭ Łukašenka, nierealna.
«Najlepšyja daktary zjazdžajuć, i spynić adtok kadraŭ možna, tolki zakryŭšy miažu. Jakaść padrychtoŭki maładych śpiecyjalistaŭ sapraŭdy vyklikaje šmat narakańniaŭ. Trapiŭšy ŭ kalektyŭ balnicy, im niama ŭ kaho vučycca. Kab uzhadavać kvalifikavanaha śpiecyjalista, patrabujucca hady. Składvajecca ŭražańnie, što ŭsio ŭ biełaruskaj miedycynie vyradžajecca. Nie dumaju, što da 1 studzienia 2024 hoda čynoŭniki znojduć efiektyŭnyja zachady, kab papravić situacyju», — adznačaje adzin z surazmoŭcaŭ.
Miedyki adznačajuć, što biełaruskaja sistema achovy zdaroŭja ŭ mnohim zachavała savieckija padychody ŭ arhanizacyi lačeńnia ludziej. U Savieckim Sajuzie davodziłasia taksama jeździć z rajonaŭ u abłasnyja centry dy stalicu pa nieabchodnaje lačeńnie.
Źmieny ŭ biełaruskaj miedycynie adbyvajucca situacyjna: uźnikaje prablema i jaje biarucca vyrašajuć, kažuć daktary.
«Nadyšła pandemija i ŭsio abrynułasia, — tłumačyć adzin ź miedykaŭ. — Potym pačalisia represii. Stała nievynosna pracavać. Śpiecyjalisty pajechali za miažu.
I ŭ toj ža čas mnohich i mnohich daktaroŭ zvalniajuć za niełajalnaje staŭleńnie da ŭłady. Prymušajuć pisać zajavy. Pra heta na naradzie ni słova nie było skazana…»
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Hladzicie taksama:
«Ja nie źbiraŭsia kapać akopy». Miedyk z rajcentra raskazvaje, čamu bolš nie vytrymaŭ
U Škłovie zvolnili kiraŭnika rajonnaj balnicy. Ën zaklikaŭ raŭniacca na Łukašenku
