Sistema Iris-T niamieckaj vytvorčaści. Fota: Wikimedia
Dla sumiesnaj zakupki Iris-T SLM krainy pačynajuć pieramovy ź niamieckim pradpryjemstvam u śfiery abaronnaj pramysłovaści Diehl Defence.
«Ja vielmi rady, što razam z Łatvijaj my dasiahnuli novaj viechi ŭ sumiesnaj zakupcy SPA siaredniaj dalokaści. Heta sumiesny prajekt histaryčnaha značeńnia ŭ abaronnym supracoŭnictvie dźviuch krain, pakolki my nikoli raniej nie ažyćciaŭlali sumiesnych zakupak takoha maštabu», — zajaviŭ ministr abarony Estonii Chana Pieŭkur na sustrečy ŭ Ryzie.
Na dumku ministra abarony Łatvii Inara Murnijecie, abranaja sistema SPA pavysić biaśpieku pavietranaj prastory Łatvii i Estonii i zabiaśpiečyć najlepšuju abaronu ludziej, hramadzianskaj i vajennaj infrastruktury.
Estonija i Łatvija padpisali pratakoł ab namierach sumiesnaj zakupki sistemy SPA siaredniaj dalokaści na samicie NATA ŭ Madrydzie ŭ červieni 2022 hoda. Pracesam kiruje Estonski centr abaronnych inviestycyj, jaki ŭ lipieni minułaha hoda padpisaŭ pahadnieńnie ź Ministerstvam abarony Łatvii ab pačatku sumiesnaj zakupki.
«My imkniemsia da taho, kab da 2025 hoda Estonija mieła dziejnuju sistemu SPA siaredniaj dalokaści. Pieršyja sistemy pavinny pastupić u 2024 hodzie», — paviedamiŭ Pieŭkur. Urad vydatkavaŭ srodki na zakupku ŭ vieraśni 2022 hoda padčas pieramoŭ pa dziaržbiudžecie.
Kab znajści najlepšaha pastaŭščyka, centr abaronnych inviestycyj naładziŭ kantakty z šaściu mižnarodnymi pradpryjemstvami.
Pa słovach Pieŭkura, kali pieramovy z Diehl Defence projduć paśpiachova, pieramožca tendara budzie aficyjna abvieščany letam.
Sistemy SPA siaredniaj dalokaści efiektyŭnyja pry niejtralizacyi samalotaŭ, viertalotaŭ, bieśpiłotnych latalnych aparataŭ, kryłatych rakiet i bojeprypasaŭ.
