Kiraŭnik litoŭskaj kampanii skazaŭ, što zakaz pastupiŭ letaś, adnak nijakich padazreńniaŭ jon nie vyklikaŭ, bo biełarusy prykryvalisia amierykanskaj kampanijaj. «U kampanii jość svaje filijały ŭ Ispanii, na Kipry i ŭ AAE, jany prasili sprajektavać kryło bajavoha drona. Hetuju pracu ŭ śviecie vykonvajuć kala 10 000 kampanij, tut niama ničoha ekskluziŭnaha. Hruzavyja drony ŭžo ciapier pieravoziać hruzy, heta prostaja sprava. My padpisali ź imi kantrakt, atrymali avans i pačali pracu», — skazaŭ staršynia praŭleńnia kampanii Sportinės aviacijos Sihitas Biesahirskas.
Biełarusy prasili nie tolki sprajektavać kryły, ale i navučyć ich masavaj vytvorčaści. Padazreńni ŭ litoŭcaŭ źjavilisia tady, kali bank nie prapuściŭ druhi avans. Ahulnaja suma damovy składaje 600 000 jeŭra. Pieršy avans byŭ 20 000 jeŭra.
«Pačaŭ z nami razmaŭlać pa-rusku čałaviek z rasijskim proźviščam. Kali my spytali, jak jon źviazany z našymi zakazčykami, jon skazaŭ, što źjaŭlajecca ŭładalnikam kampanii i žyvie ŭ Biełarusi, što kampanija biełaruskaja, ale jany ŭsio vyrablajuć dla vojska NATO», — raspavioŭ Biesahirskas. Tady Biesahirskas źviarnuŭsia ŭ Departamient dziaržbiaśpieki.
Ciapier usie suviazi i kantakty ź biełaruskaj kampanijaj spynienyja. Staršynia praŭleńnia Sportinės aviacijos skazaŭ, što nie cikaviŭsia, dla čaho buduć vykarystoŭvać hruzavyja drony. Ale pryznaŭ, što jany mohuć pieranosić vybuchoŭku. «Mohuć nieści pirahi, pradukty z kramy dadomu. A mohuć pieranosić i drennyja hruzy. Jak i mašyna — možna zahruzić u jaje vybuchoŭku, a možna pałatku», — skazaŭ jon.
ŚMI vyśvietlili, što daččynaja kampanija, jakoj prykryvalisia biełarusy, moža ŭdzielničać u pastaŭkach Rasii iranskich dronaŭ.
Biesahirskas nazvaŭ situacyju pravakacyjaj i zaŭvažyŭ, što ŭžo raniej pastupaŭ zakaz ad inšych biełarusaŭ dla ŭkrainskaj armii.
Pa słovach kiraŭnika parłamienckaha kamiteta pa nacbiaśpiecy i abaronie Łaŭrynasa Kaščunasa, kampanii nie pavinny čakać, kali vybuchnie skandał, a sami paźbiahać pravakacyj. «Možna prakansultavacca z kamisijaj, jakaja praviaraje tavary padvojnaha pryznačeńnia na pradmiet adpaviednaści ekspartnym patrabavańniam. Tam jość i pradstaŭniki DDB, i inšych słužbaŭ, jakija mohuć adkazać, jość niebiaśpieka ci nie», — skazaŭ deputat.
