Alaksandr Łukašenka 15 maja 2023 hoda. Fota telehram-kanała Puł piervoho
I. Kali Łukašenka zastaniecca žyvy…
Usio ž bazavy scenaryj — što Łukašenka vyzdaravieje i chutka vierniecca ŭ palityku. Zdaroŭje ŭ Łukašenki daŭno nie ach, jon i raniej, pačynajučy z 2006 hoda, pieryjadyčna vypadaŭ z publičnaj prastory abo źjaŭlaŭsia ŭ kadry nie ŭ samym zdarovym vyhladzie abo z paviazkaj na ruce. Prosta hetym razam źniknieńnie akazałasia najbolš rezanansnym.
Jak historyja z chvarobaj moža na jaho paŭpłyvać? Pakul vymaloŭvajecca niekalki varyjantaŭ.
Pa-pieršaje, kali chvaroba padarvie jaho siły, to my budziem nazirać kaniec jaho karjery ŭ duchu poźniaha Brežnieva.
Kiravańnie spravami jon usio bolš budzie daručać vyšejšym słužbovym asobam, čyja ŭłada i ŭpłyŭ uzraście. Pakolki ŭzrost nie padmanieš, usio heta i tak budzie adbyvacca, pakul jon zastajecca va ŭładzie, prosta chvaroba moža paskoryć hetyja pracesy.
Pa-druhoje, fizičnaje asłableńnie zdolnaje ŭzmacnić pryrodnuju padazronaść Łukašenki.
Tady jon paśla vyzdaraŭleńnia źviernie ŭvahu na tych, chto ŭ jaho adsutnaść «vydzieliŭsia». Pakul adkryta vyłučylisia try katehoryi:
1. Asobnyja prakramloŭskija miedyja i padkantrolnyja śpiecsłužbam rasijskija telehram-kanały, jakija słaba prychoŭvajuć radaść, što apošni sajuźnik Rasii pamre raniej za Pucina.
2. Plejada dziejačaŭ, jakija ŭzvysilisia ŭ režymie paśla 2020 hoda.
Siarod ich charakternaje vykazvańnie Špakoŭskaha, jaki zaklikaŭ paśla śmierci Łukašenki paskoryć toje, što mieła miesca da jaje — jašče bolš uzmacnić zaležnaść ad Rasii i represii ŭnutry krainy.
3. Pratesnaja aŭdytoryja, jakaja złaradničaje, što, zrešty, naturalna — u ludziej skrali nie tolki vybary, ale i narmalnaje žyćcio ŭ svajoj krainie. Pa svajoj tradycyi režym moža spuścić na hetuju hrupu ŭsich sabak. I navat kali kamientataraŭ fizična nie znojduć, u HUBAZiKu ich prydumajuć.
II. Kali Łukašenka sydzie…
Scenaryj tranzitu ŭłady, kali Łukašenka pakinie hety śviet, apisany ŭ artykule 88 kanstytucyi 2022 hoda:
«U vypadku vakansii pasady prezidenta abo niemahčymaści vykanańnia im svaich abaviazkaŭ na padstavach, praduhledžanych Kanstytucyjaj, jaho paŭnamoctvy da pryniasieńnia prysiahi navavybranym prezidentam pierachodziać da staršyni Savieta Respubliki».
Heta značyć, u ciapierašni momant paŭnamoctvy pierachodziać da Natalli Kačanavaj — adnoj z najbližejšych paplečnic Łukašenki. Jana maje reputacyju čałavieka, jaki pracuje stroha pad pohlady i instynkty svajho kiraŭnika. Ale jak jana siabie prajavić, kali jaho nie stanie? Pra heta možna tolki zdahadvacca.
Zrešty, kali pytańnie pra ŭładu — tut niekatorym nie da zakonaŭ i nie da kanstytucyj. I za śpinaj Kačanavaj moža adrazu vymalevacca i Mikałaj Łukašenka, i Viktar, i Raman Hałoŭčanka — jaki-nijaki, a ŭsio ž premjer, i niechta z hienierałaŭ.
III. Pierachodny pieryjad — vuzkaje miesca
Stvoranaja Łukašenkam sistema zastaniecca paśla jaho. Čakać, što skon Łukašenki vyrašyć usie prablemy jaho sapiernikaŭ i, jak pakazali apošnija dni, prychilnikaŭ, było b naiŭna. Unutry sistemy pačniecca pošuk fihury na rolu pierajemnika.
Klika Łukašenki nie maje adnarodnaści — chutčej heta prosta situacyjnaja hrupa z roznymi ŭsiaredzinie pohladami, pachodžańniem i intaresami. Tamu nieŭzabavie praces vybaru kiraŭnika pieraraście ŭ palityčnuju baraćbu.
Klučavoje pytańnie — rola źniešnich sił.
Maskva jak minimum była b zacikaŭlenaja kantralavać biełaruski tranzit praz šyrokuju sietku «svaich ludziej» u Minsku. U situacyi praciahłaha supraćstajańnia z Zachadam Biełaruś joj patrebnaja dla hieapalityčnych metaŭ.
Zrazumieła, što mierkavańniem naroda, jak u 1994 hodzie, usie hetyja «vysokija hulcy» cikavicca nie buduć.
Jak nichto ź ich mocna nie kłapaciŭsia, ci chočuć biełarusy, kab ź ich terytoryi ŭryvalisia va Ukrainu i jakoha jany chočuć sabie prezidenta ŭ 2020-m. Ludziam maksimum prapanujuć, jak kažuć u viarchach, «źjeści» abiacanki i kaktejl z palittechnałohij.
Va ŭsim hetym klučavaja nieviadomaja — rola Zachadu i Ukrainy.
Davodzicca pryznać, što ŭ Jeŭropy i ZŠA ŭnutry Biełarusi nie tak šmat upłyvu. U teoryi, 40% suśvietnaj ekanomiki Zachadu mahli b adcisnuć u Biełarusi rasijskija 3%. Ale što da 2020 hoda, što paśla jaho hetaha nie adbyłosia.
Vajna va Ukrainie mnohaje źmianiła, a jaje vynik moža pryvieści da asłableńnia Rasii. Ale, kali Zachad znoŭ, jak paśla 2020 hoda, zojmie pazicyju wait and see, heta adkryje šlach dla recydyvu prarasijskich sił u Biełarusi navat u vypadku adychodu ad ułady Alaksandra Łukašenki.
Čytajcie taksama:
«Madam Ciuso pamierła b ad zajzdraści». Bajnet vybuchnuŭ ad fota «vaskovaha» Łukašenki
Łatuška: U Łukašenki, pa našych źviestkach, moža być infiekcyjna-alerhičny mijakardyt
