Bai za Bachmut iduć užo paŭhoda. Horad pieratvorany ŭ ruiny. Fota: 24-ja miechbryhada USU imia Karala Daniły
Rasijski vajskoviec, suviazist 4-j motastrałkovaj bryhady Uzbrojenych sił Rasii Andrej Marozaŭ u svaim telehram-kanale zajaviŭ, što 12 maja ŭkrainskaja artyleryja nakryła štab jaho bryhady pad Bachmutam.
Zabityja kambryh i načalnik štaba, a taksama aficer 2-ha korpusa, u jaki ŭvachodzić bryhada.
4-ja bryhada viała bai na poŭnač ad Bachmuta, zamianiŭšy tam paškamutanyja ŭkraincami siły PVK «Vahnier».
Nahadajem, što 10—12 maja mienavita jaje padraździaleńni byli vybityja ŭkraincami z šerahu važnych pazicyj i adkacilisia za Biarchoŭskaje vadaschovišča na niekalki kiłamietraŭ.
«U 4-j bryhadzie zabityja kambryh i načštaba bryhady, zahinuŭ aficer z upraŭleńnia 2 AK, jość inšyja zabityja i paranienyja aficery kiravańnia bryhadaj, ukropy [ŭkraincy] ŭžo radasna pra heta napisali, tak što heta nie navina. Straty ŭ asabovym składzie ŭ bataljonach taksama jość», — napisaŭ Marozaŭ.
Paźniej 14 maja hibiel kamandzira 4-j bryhady pałkoŭnika Viačasłava Makarava i namieśnika kamandzira armiejskaha korpusa pa vajenna-palityčnaj rabocie pałkoŭnika Jaŭhienija Broŭki paćvierdziła Ministerstva abarony Rasii. «Hieraična zahinuŭ» — takuju farmuloŭku ŭžyło rasijskaje vajennaje viedamstva adnosna Broŭki, tady jak pra Makarava adznačana, što jon byŭ ciažka paranieny i pamior pry evakuacyi.
Ź inšych vajennych navin: siońnia ŭnačy rasijskija vojski nanieśli ŭdary bieśpiłotnikami i kryłatymi rakietami. Nad Kijevam usie bieśpiłotniki byli źbityja, zatoje niekalki kryłatych rakiet udaryła pa abjektach u prykarpackim abłasnym centry Ciarnopal. Paviedamlajecca pra razbureńni i paranienych. Učora anałahičnyja ŭdary byli naniesieny pa Chmialnickaj vobłaści ŭ centry Ukrainy.
A infarmavanaje rasijskaje vydańnie «Kommiersant» raskryła niekatoryja detali źbićcia dvuch samalotaŭ i dvuch viertalotaŭ nad Branskaj vobłaściu ŭčora.
«Viertaloty Mi-8, jakija raźbilisia ŭ Branskaj vobłaści, i źniščalniki Su-34 i Su-35 uvachodzili ŭ adnu avijahrupu i mahli być źbityja praktyčna adnačasova», — paviedamlaje «Kommiersant».
Pavodle infarmacyi vydańnia, źniščalniki pavinny byli nanieści rakietna-bombavy ŭdar pa celach na terytoryi Čarnihaŭskaj vobłaści Ukrainy, a viertaloty — ich padstrachavać, kab u tym liku padabrać ekipažy źniščalnikaŭ, kali jany buduć źbityja ahniom praciŭnika. U vyniku ŭsie jany byli źniščanyja, ich ekipažy, usiaho 9 čałaviek, zahinuli.
