Pa TB pakazali čatyroch zatrymanych.
Adna ź ich — 29-hadovaja Viktoryja Vołčak. Jana rodam z Hłuska, žyvie ŭ pasiołku Ždanovičy Minskaha rajona. Dziaŭčyna advučyłasia ŭ Niaśvižskim piedahahičnym kaledžy. Pracavała ŭ sałonach suviazi, na aŭtazapraŭcy, u kramach.
Viktoryja Vołčak. Skryn videa ANT
Druhaja dziaŭčyna, jakuju zatrymali, — Savačkina Hanna. Minčancy 24 hady, vučyłasia na žurfaku BDU, ale nie skončyła, u 2022-m pastupiła znoŭ — na pieršy kurs bijafaka.
Savačkina Hanna. Skryn videa ANT
Zatrymali i samu Hannu, i jaje maci Taćcianu Rusak.
Zatrymali taksama 29-hadovaha Andreja Hryhorjeva. Chłopiec ź Minska, skončyŭ miedycynski kaledž i pracavaŭ zubnym technikam u pryvatnym stamatałahičnym centry.
Andrej Hryhorjeŭ. Skryn videa ANT
Što ich źviazvaje?
Na ANT śćviardžajuć, što ŭsie znajomyja z 23-hadovym Valeryjem Vodzinym, jaki ŭ pačatku lutaha vyjechaŭ va Ukrainu i paśla dałučyŭsia da dobraachvotnikaŭ. Chłopiec nibyta pierasyłaŭ u Biełaruś nastolnyja elektraplity, kab ź ich dapamohaj učynić «terakt na 9 Maja». Zabrać i schavać ich jon prasiŭ svaich znajomych.
Valeryj Vodzin. Skryn videa ANT
Pa viersii ANT, elektryčnyja plity dastavili z Kijeva ŭ Minsk (u punkt na Kamiennaj Horcy) abchodnym šlacham praź Jeŭropu. Adnu z elektryčnych plit, jak śćviardžajuć u filmie, zabrała Hanna i zakapała na mohiłkach u Kałodziščach, kudy jaje padviezła maci. Druhuju, pavodle viersii ANT, zabrała Viktoryja, a chavaŭ Andrej.
Usie čaćviora za kratami. Viadoma, što niekatorych zatrymali kala dvuch tydniaŭ tamu. Pa słovach prapahandystaŭ, jany prachodziać pa spravie jak padazravanyja ŭ zdradzie dziaržavie (artykuł 356 KK) i ździajśnieńni akta teraryzmu (artykuł 289 KK).
U siužecie načalnik Hałoŭnaha ŭpraŭleńnia śpiecyjalnych ekśpiertyz Dziaržaŭnaha kamiteta sudovych ekśpiertyz Uładzimir Atraškoŭ kamientuje, što ŭ plitach znajšli płastyčnyja vybuchovyja rečyvy i detanatary, a ahulnaja masa vybuchovych rečyvaŭ — kala 2 kh.
Uskrytaja plitka, pakazanaja na ANT
Ale siužet pakidaje niedaŭmieńnie — što ŭ im robiać akciorskija scenki z udziełam studentaŭ i vykładčykaŭ žurfaka BDU? Na praciahu ŭsiaho rolika pakazvajuć «mastackija rekanstrukcyi» taho, jak niejki pryjaciel u pierapiscy prosić studenta zabrać pasyłku, toj pahadžajecca, a paśla ich źbirajuć u zale žurfaka na prahlad prapahandysckaha filma ANT i jon pieradumvaje.
Paśla takoha «mastackaha chodu» zastajecca pytańnie: nakolki možna vieryć astatniaj infarmacyi ŭ siužecie?
Čytajcie taksama:
KDB Biełarusi zajaviŭ pra toje, što ŭ krainie płanavali terakty na 9 Maja
