Juryj Dvojkin, Uładzimir Pucin i Hienadź Zajcaŭ na paradzie Pieramohi na Krasnaj płoščy, 9 maja 2023 hoda
Uładzimir Pucin na paradzie Pieramohi na Krasnaj płoščy siadzieŭ pobač z dvuma vieteranami. Adnak ni adzin ź ich nie vajavaŭ suprać fašysckich vojskaŭ. Adzin ź vieteranaŭ u składzie NKVD zmahaŭsia z padpollem va Ukrainie, druhi — supracoŭnik KDB — udzielničaŭ u zadušeńni Pražskaj viasny, havoryć analiz «Ahientstva».
Pa pravuju ruku ad Pucina siadzieŭ 98-hadovy Juryj Dvojkin (jon u kiepcy). U 1942-m hodzie jon zapisaŭsia ŭ vojska dobraachvotnikam, ale na front tak i nie trapiŭ. Paśla zakančeńnia škoły snajpieraŭ u 1944-m hodzie jaho ŭ składzie NKVD adpravili ŭ Lvoŭskuju vobłaść «vykonvać apieracyi pa likvidacyi nacyjanalistyčnaha padpolla na terytoryi Zachodniaj Ukrainy».
«My mała viedali pra banderaŭcaŭ u toj čas. Jany ŭčynili palavańnie: na praciahu dvuch dzion rasstralali bolš za 5000 čałaviek, adčuli siabie haspadarami ŭ Lvovie, na Ukrainie. My začyščali ŭvieś rehijon ad nacyjanalistaŭ, łavili ŭ lasach, zakinutych chutarach», — uspaminaŭ sam Dvojkin.
Pa levuju ruku ad Pucina siadzieŭ Hienadź Zajcaŭ (jon u furažcy). Zajcaŭ naradziŭsia ŭ 1934 hodzie i nie ŭdzielničaŭ u Vialikaj Ajčynnaj vajnie. U 1953 hodzie jaho pryzvali na vajskovuju słužbu, paśla zakančeńnia terminovaj słužby jon zastaŭsia ŭ vojsku, a ŭ 1959 hodzie pačaŭ słužyć u KDB.
U 1968 hodzie Zajcaŭ udzielničaŭ va ŭvodzie savieckich vojskaŭ u Čechasłavakiju dla padaŭleńnia antysavieckich pratestaŭ padčas Pražskaj viasny. Zajcaŭ kiravaŭ hrupaj 7-ha ŭpraŭleńnia KDB SSSR u apieracyi «Dunaj», jak nazyvaŭsia ŭvod vojskaŭ u Čechasłavakiju. Pad jaho kiraŭnictvam byŭ zachopleny budynak MUS u Prazie. U 70-ch Zajcaŭ uznačaliŭ stvoranuju Juryjem Andropavym antyterarystyčnuju hrupu «Alfa».
Čytajcie taksama:
Parad Pieramohi pakazaŭ źniasileńnie rasijskaj armii na druhi hod vajny va Ukrainie
Łukašenka nie vystupiŭ z pramovaj na płoščy Pieramohi ŭpieršyniu za čas svajho kiravańnia
