Śviet vačyma pacyjentaŭ psichijatryčnaj kliniki 14 listapada ŭ Respublikanskim teatry biełaruskaj dramaturhii adbudziecca adkryćcio «Vystavy ŭsich».
Heta jarkaja samabytnaja padzieja ŭ kulturnym žyćci biełaruskaj stalicy, jakaja adkryvaje zavelumavanyja źjavy aktualnaha mastactva Mienska. Mastactva, jakoje isnuje za ścienami režymnaha abjekta — psichanieŭrałahičnaha internata №3 (Navinki).
«Vystava ŭsich» — heta ekspazicyja prac pacyjentaŭ internata, nieprafiesijnych mastakoŭ, jakija składajuć kaściak majsterni «Dom».
Jak adznačajuć arhanizatary, «Vystava ŭsich» — hety łahičny, choć i trochi adterminavany praciah znajomstva z tvorčaściu pacyjentaŭ psichanieŭrałahičnaha internata ŭ ramkach prajekta devijantnaha mastactva art «Nu‑VA!».
Da hetaj vystavy mastaki vystaŭlalisia «paštučna». Naprykład, Hienadź Hryšal maje ŭ svajoj tvorčaj skarboncy dźvie piersanalnyja vystavy ŭ staličnaj halerei «Padziemka», a Michaś Bulič prezientavaŭ svaje pracy na mižnarodnym feście «DACH‑9».
U svaju čarhu «Vystava ŭsich» — heta pieršaja svojeasablivaja sproba abjadnać tvorčaść usich aŭtaraŭ, jakija nasialajuć majsterniu «DOM», pad adnym dacham halerei.
Art‑kuratar Darja Jaskievič adznačaje, što padrychtoŭka da dadzienaj vystavy išła ciaham hoda.
‑ Ciaham hoda my źbirali materyjały i zaraz vystaŭlajem pradukt, jaki vyjšaŭ z‑pad pendźlaŭ mastakoŭ. Ź luboŭju i ironijaj, — kaža kuratar. — Devijantnaje mastactva — nikolki nie devijantna… Jano naiŭnaje, sumnaje, paciešnaje, zvyčajnaje i prosta vydatnaje pa svajoj sutnaści. Heta «mastactva biez ahladki», ale z žadańniem być. A «być» — adzinaja funkcyja mastactva, dy i naša taksama».
«Vystava ŭsich», jak by pretencyjozna nie hučała jaje nazva, sapraŭdy abiacaje stać padziejaj dla ŭsich, chto žadaje zirnuć za šyrmu štodzionnaści vačymi mastaka psichanieŭrałahičnaha internata.
Adkryćcio vystavy adbudziecca 14 listapada ŭ 16:00 u Respublikanskim teatry biełaruskaj dramaturhii (Krapotkina, 44). Naviedvalnikaŭ čakajuć vystupy i pierformansy z udziełam teatra «Alter eha», Lošy Čekanosa i «Łabaratoryi Absurdu».
