Miesca padzieńnia rakiety ŭ Polščy. Fota: wyborcza.pl
Pa źviestkach polskich žurnalistaŭ, pieršapačatkova dumali, što znojdzienyja abłomki — heta snarad Druhoj suśvietnaj vajny, ale chutka ad hetaj viersii admovilisia.
U minułuju piatnicu hienierał Tomaš Piatroŭski skazaŭ, što abjekt moža być źviazany «z padziejami siaredziny śniežnia minułaha hoda, kali rasijanie ździejśnili masiravany abstreł Ukrainy». Pra heta ž zajaviŭ i premjer Matevuš Maraviecki, kažučy, što 16 śniežnia 2022 hoda nataŭskija samaloty F-35 i polskija samaloty byli padniatyja pa tryvozie dla adsočvańnia trajektoryi rakiety, jakaja apynułasia na terytoryi Polščy. Ale tady rakietu nie znajšli.
Abłomki rakiety, znojdzienaj pad Bydhaščam. Fota: wolski_jaros
Pavodle źviestak žurnalistaŭ,
na hety momant samaja surjoznaja hipoteza, jakuju prymajuć pad uvahu śledčyja, u tym, što «16 śniežnia rasijskaja rakieta X-55 była vypuščanaja z rasijskaha samalota, jaki pralataŭ nad terytoryjaj Biełarusi».
Toje, što znojdzienyja abłomki sapraŭdy naležać rasijskaj rakiecie X-55, žurnalistam paćvierdziŭ i adzin z vysokapastaŭlenych polskich čynoŭnikaŭ: «Tak. Chutčej za ŭsio heta rasijskaja rakieta».
Niahledziačy na toje, što viersija nie źjaŭlajecca aficyjnaj i kančatkovaj, vajskovy ekśpiert Jarasłaŭ Volski
pasprabavaŭ rekanstrujavać palot rakiety i pryjšoŭ da viersii, što «pusk byŭ zrobleny z-pad Smalenska pa Kijevie. Adna z rakiet adchiliłasia i nakiravałasia ŭ bok Polščy praz terytoryju Biełarusi».
Maršrut palotu rakiety, jaki prapanavaŭ vajskovy ekśpiert Jarasłaŭ Volski
Manitorynhavaja hrupa «Biełaruski Hajun» śćviardžaje na padstavie svaich źviestak, što 16 śniežnia za ŭvieś dzień zapuskaŭ rakiet z terytoryi Biełarusi zafiksavana nie było.
Avijacyjnaja aktyŭnaść na terytoryi Biełarusi 16 śniežnia 2022 hoda. Fota: hajun.by
Što da viersii Jarasłava Volskaha, to zvyčajna rakiety takoha typu laciać na vyšyni pary dziasiatkaŭ mietraŭ, i ich składana nie zaŭvažyć.
A miarkujučy pa karcie, stvoranaj Volskim, jana mahła lacieć nad bujnymi haradami: Mahilovam, Dziaržynskam, Navahrudkam i navat nad Minskam. U takim vypadku, kali jana lacieła praz usiu krainu, nie zaŭvažyć jaje było prosta nierealna.
Ale Volski taksama śviedčyć, što mahła adbycca admova sistemy navihacyi,
i ŭ takim vypadku rakieta mahła lacieć naohuł na luboj vyšyni. I kali dniom jaje ŭsio adno zaŭvažyli b, a nočču i ŭ drennaje nadvorje pry vialikaj vyšyni vierahodnaść, što snarad nichto nie ŭbačyŭ by, była b bolšaja.
Varonka na miescy padzieńnia ŭ Polščy. Fota: polskija ŚMI
Akramia taho, na fota i videa, jakija publikujuć ŚMI, bačnyja abłomki i miesca pryziamleńnia, pa jakich možna adnaznačna skazać, što rakieta nie vybuchnuła, bo ŭ advarotnym vypadku les vakoł «raźlacieŭsia b u treski» i źjaviłasia b bujnaja varonka, jak pry padzieńni snarada FAB-500 u rasijskim Biełharadzie ŭ krasaviku hetaha hoda — hetyja snarady padobnyja pa paramietrach, i ich karektna paraŭnoŭvać.
Varonka ad prylotu FAB-500 u Biełharadzie. Fota: colonelcassad.livejournal
Heta aznačaje, što rakieta była zapuščana naohuł biez bajavoj častki, da prykładu, jana mahła zapuskacca dla vyznačeńnia SPA Ukrainy.
Tym nie mienš, «Biełaruski Hajun» nie robić kančatkovych vysnoŭ i źbirajecca nadalej sačyć za vynikami śledstva ŭ Polščy.
Čytajcie taksama:
U Polščy znajšli reštki «pavietranaha vajskovaha abjekta»
Znojdzienaja ŭ lesie ŭ Polščy rakieta, napeŭna, była polskaj
Rasijski samalot skinuŭ na Biełharad nie adnu bombu, a dźvie. Idzie evakuacyja nasielnictva
