Usie fota: ctrana.news
U lutym 2022 hoda Zatoka, ci, jak čaściej jaje nazyvajuć adesity, Buhaz, adpačyvała paśla burnaha siezona 2021 hoda i rychtavałasia da nastupnaha. Ale pačatak vajny pachavaŭ usie płany ŭładalnikaŭ biznesu: adnoj z asnoŭnych celaŭ rasijan staŭ čyhunačny most, jaki złučaje dźvie častki kurorta pamiž saboj i kurortnyja bazy ŭ pasiołku. Rasijanie śćviardžali, što na hetych bazach nibyta žyli ŭkrainskija vajskoŭcy, Ukraina heta admaŭlała.
Rakietnyja ŭdary daščentu razburyli niekalki baz i pryvatnyja damy.
Zrešty, kurort zakryŭsia navat nie z-za rakietnych prylotaŭ. Adeskaja AVHA ŭ 2022 hodzie abviaściła plažy zakrytymi pa ŭsioj vobłaści, pakolki ŭ pačatku vajny była vialikaja vierahodnaść marskoha desantu rasijan.
Z-za niebiaśpieki desantu i stratehičnaha mosta kurort faktyčna akazaŭsia zakrytaj zonaj.
Adeski zaliŭ jašče zimoj 2022 hoda byŭ ščylna zaminiravany pa ŭsioj akvatoryi. Paśla štormaŭ niekalki płyvučych min adarvalisia ad padvodnych trosaŭ i stali śmiarotnymi siurpryzami dla śmielčakoŭ, jakija advažvalisia akunucca.
Za minuły siezon 2022 hoda na plažy Adeskaj vobłaści miny vykidvała prybojem šmat razoŭ, bolšaść ich likvidavali sapiory.
Ale ad vybuchaŭ u roznych miescach byli zabityja troje čałaviek, jakija vyrašyli pakupacca ŭ mory.
Kurortny biznes Zatoki zaraz prosta zamior. U pasiołku zakryta bolšaść mahazinaŭ i atelaŭ. Asabliva paciarpieli bujnyja handlovyja sietki, supiermarkiety navat nie sprabujuć adčyniać.
Uładalniki hatelaŭ i apartamientaŭ padtrymlivajuć svoj biznes tolki ŭ nadziei na budučyja siezony, skaraciŭšy absłuhovy piersanał da minimumu. A samyja nievialikija mini-hateli absłuhoŭvajuć sami haspadary.
«U nas u Zatocy jość nievialiki hatel na druhoj linii ad mora. Da vajny była tam i krama. U 2022 hodzie jaho zakryli, tavar raspradali za biascenak u Adesie. U hateli zaraz pastajanna žyvie maci, padtrymlivaje dom jak moža. Pastajalcaŭ niama naohuł, dachodaŭ taksama. Ale kamunałku davodzicca płacić, nijakich ilhot niama i nie budzie. Tamu davodzicca pieradavać maci hrošy na žyćcio, taksama płacim kamunałku, pracujem u Adesie», — raspaviała haspadynia mini-hatela ŭ Zatocy Śviatłana.
«Paśla pačatku vajny moj plažny biznes całkam nakryŭsia. U mianie na plažy było niekalki nadzimanych atrakcyjonaŭ, try marskija skutary z pryviaznymi bananami, na centralnaj alei pracavali dźvie kava-mašyny. Usio heta składziena, ja zastaŭsia biez prybytkaŭ, pryjšłosia šukać inšuju pracu. Dumaju, što navat paśla zakančeńnia vajny kurort niachutka pačnie pracavać, bo buduć doŭha zdymać marskija miny z zaliva. A chto zachoča kupacca i zaharać, kali moža prypłyć taki cud? Tamu Zatoka zakryłasia na najbližejšyja paru hadoŭ», — ličyć uładalnik kompleksu plažnych zabaŭ Uładzisłaŭ Makrynčuk.
Sioleta plažnaha adpačynku taksama nie budzie. Vajennyja ŭžo nakiravali infarmacyju pradstaŭnikam ułady Adeskaj vobłaści ab niemetazhodnaści pačatku kurortnaha siezona ŭ Adeskaj vobłaści.
«Adkryćcio kurortnaha siezona niemetazhodna. My adpravili pradstaŭnikam miascovaj ułady infarmacyju, jakija pahrozy mohuć być. My razumiejem, što rehijon pavinien raźvivacca. Ale biaśpieka na piarednim płanie. Siońnia jašče rana kazać, što ŭźbiarežža — heta kurortnaja zona. Heta zona abarony», — skazała načalnica abjadnanaha kaardynacyjnaha pres-centra Sił abarony «Poŭdzień» Ukrainy Natalla Humianiuk.
Ab tym ža zajaviŭ i pres-sakratar apieratyŭnaha štaba Adeskaj abłasnoj vajennaj administracyi Siarhiej Bratčuk.
«Papadańni ŭ budynki kurortnaj śfiery havorać pra toje, što kurortnaha siezona znoŭ sioleta nie budzie», — zajaviŭ Bratčuk.
