Ilustracyjny zdymak. Fota: pixabay.com
Ciapier hetamu 41-hadovamu mužčynu, jakoha kličuć Džonatan, daviadziecca zapłacić štraf u 100 tysiač jeŭra, kali vyjavicca, što jon parušyŭ zabaronu i pasprabavaŭ znoŭ dać svaju śpiermu klinicy abo patencyjnym baćkam.
Vysokaja donarskaja aktyŭnaść Džonatana ŭžo stanaviłasia pradmietam sudovaha raźbiralnictva ŭ krainie. U 2017 hodzie hałandski sud zabaraniŭ jamu praciahvać supracoŭničać ź miascovymi klinikami, kali vyśvietliłasia, što ad jaho śpiermy naradzilisia bolš za 100 dziaciej.
Ale zamiest taho, kab spynicca, Džonatan staŭ pasyłać svaju śpiermu dackaj klinicy z klijenturaj pa ŭsim śviecie, a taksama pieradavać jaje praź internet.
Pa praviłach, jakija rehulujuć hałandskuju miedycynu, adzin donar nie pavinien stanavicca baćkam bolš za 25 dziaciej u 12 siemjach. Heta źviazana ź niebiaśpiekaj taho, što z-za vialikaj kolkaści ludziej z adnym baćkam, jakija nie padazrajuć ab svajactvie, u budučyni mohuć źjavicca vypadkovyja blizkarodnasnyja siamiejnyja sajuzy.
Padčas sioletniaha słuchańnia vyśvietliłasia, što z taho času, jak Džonatan zaniaŭsia donarskaj dziejnaściu ŭ 2007 hodzie, jon dapamoh źjavicca na śviet prykładna 550-600 dzieciam.
Z aściaroh, što hetaja ličba moža vyraści, sud u Haazie zabaraniŭ jamu zajmacca donarstvam u budučyni i zahadaŭ pradastavić śpis usich klinik, ź jakimi jon supracoŭničaŭ raniej, kab tyja źniščyli pakinutyja ŭ ich asobniki jaho śpiermy.
Džonatanu zabaranili rekłamavać ci naŭprost prapanoŭvać svaje pasłuhi patencyjnym baćkam, a taksama ŭstupać u arhanizacyi, jakija źviazvajuć klijentaŭ z donarami.
Pazoŭ suprać mužčyny padali arhanizacyja, jakaja abaraniaje pravy dziaciej donaraŭ, i adna z maci, jakaja źviarnułasia da štučnaha apładnieńnia z vykarystańniem jaho donarskaha materyjału.
U svaim vierdykcie sudździa Tera Chiesielink adznačyła, što ŭsie źviazanyja ź im baćki raptam vyjavili, što ich dzieci źjaŭlajucca častkaj vializnaj svajackaj sietki, jakaja ŭklučaje ŭ siabie sotni zvodnych bratoŭ i siaścior, na što jany nie davali zhody.
Całkam vierahodna, što heta moža mieć niehatyŭnyja psichasacyjalnyja nastupstvy dla dziaciej, takija jak prablemy z samaidentyfikacyjaj i mahčymaść incestu.
«Intaresy dziaciej tut značna pieravažajuć, u suviazi z čym hetamu mužčynu zabaroniena znoŭ stanavicca donaram śpiermy», — skazaŭ žurnalistam pradstaŭnik suda Hiert-Mark Śmiełt.
Heta nie pieršy vypadak, kali vakoł donarstva śpiermy ŭ Hałandyi ŭźnikaje sudovaje raźbiralnictva.
U 2017 hodzie pamierłaha hiniekołaha i ŭładalnika banka śpiermy Jana Karbaata abvinavacili ŭ tym, što toj vykarystoŭvaŭ zamiest materyjału ananimnych donaraŭ svoj ułasny, takim čynam staŭšy baćkam da 200 dziaciej.
