Ihar Łašuk z parafijankaj
Biznesoviec Alaksandr Zajcaŭ viadomy jak stvaralnik kampanii Sohra Overseas, saŭładalnik kampanii «Bremina hrup» i futbolnych kłubaŭ. «Bremina hrup» była stvoranaja na ŭkaz Alaksandra Łukašenki dla nabližanych da jaho biznesmienaŭ. Praź jaje i źviazanyja ź joj kampanii idzie istotnaja častka aficyjnaha tranzitu praź Biełaruś.
Taksama Zajcaŭ mieŭ dačynieńnie i da abaronnych prajektaŭ, źviazanych z kampanijami ŭ Biełarusi, Łatvii i va Ukrainie. Pad sankcyi Jeŭraźviaza jon trapiŭ u červieni 2021 hoda.
Pra toje, što Zajcaŭ pieršym u historyi Biełarusi atrymaŭ vatykanski tytuł rycara Ordena śviatoha Ryhora Vialikaha, stała viadoma ŭ śniežni 2022 hoda. Heta najvyšejšaja adznaka dla śvieckich asobaŭ, jakaja pryznajecca Papam. Pra padzieju nie paviedamlałasia na aficyjnych katalickich partałach, ale ŭsio ž taki stała viadoma, što vyśviaciŭ rehalii i pryniaŭ prysiahu ad novaha rycara arcybiskup Minska-Mahiloŭski Juzaf Stanieŭski, a va ŭračystaściach udzielničali ksiandzy Ihar Łašuk sa Stoŭbcaŭ i Juryj Žaharyn z Navahradka.
Ksiondz Łašuk adznačyŭ, što viedaje aliharcha «šmat hadoŭ», «jon nie tolki asabista ŭzrastaŭ u viery, ale raspaŭsiudžvaŭ i pašyraŭ vieru Kaścioła tut, na biełaruskaj ziamli». A arcybiskup Stanieŭski padkreśliŭ, što sam Zajcaŭ nie šukaŭ hetaj uznaharody, a «ŭznaharoda šukała rycara Alaksandra, rycarskaja hodnaść šukała jaho».
Inicyjatyva «Chryścijanskaja vizija», jakaja pieršaj paviedamiła pra fakt uhanaravańnia Zajcava, mierkavała tady, što Zajcaŭ padtrymlivaŭ niekatoryja katalickija prajekty finansami, u tym liku ŭ pytańniach budaŭnictva. Adnak «Biełaruski rasśledavalnicki centr» vyjaviŭ bolš ščylnyja suviazi Zajcava i ksiandza Łašuka.
Pavodle BRC, u vieraśni 2021 hoda śviatar zasnavaŭ kampaniju «Alis ma», na jakuju padsankcyjnyja ŭładalniki kampanii «Bremina hrup» pierapisali častku svajoj majomaści. Prytym, što zajmacca biznesam katalickim śviataram zabaraniaje navat kananičnaje prava.
«Naša zadańnie — słužeńnie. Śviatar nie moža ŭdzielničać ni ŭ palityčnych partyjach, ni zajmacca biznesam. Heta niemahčyma navat pa kananičnym pravie. Takaja zajava — vielmi cikavaja navat dla nas. Tamu my taksama ŭ hetym pastarajemsia razabracca», — raskazaŭ žurnalistam Juryj Sańko, pres-sakratar Katalickaj carkvy ŭ Biełarusi.
Sam ksiondz Łašuk nie staŭ tłumačyć, jak jon staŭ uładalnikam kampanii, źviazanaj z «Bremina hrup». Svaje suviazi z Zajcavym jon kamientavać admoviŭsia.
«Heta maja asabistaja sprava, ja śviatar. Na niekatoryja pytańni ja nie adkazvaju nikomu, navat Papu, razumiejecie? Jość pytańni, jakija tolki pierad mnoj jość i Hospadam Boham», — skazaŭ Ihar Łašuk u telefonnaj razmovie.
Cikava pry hetym, što ŭ krasaviku 2022 hoda ksiandza Łašuka sudzili za «raspaŭsiud ekstremisckaj infarmacyi» i pryznačyli jamu štraf pamieram u 30 bazavych vieličyń.
Čytajcie taksama:
nie-a. nie razumiejem. śviataram što - možna ŭsio?