Jun Sok Jol. Fota: Korea.net
Dahetul Paŭdniovaja Kareja davała Ukrainie humanitarnuju dapamohu, a taksama pastaŭlała vajenny ryštunak, naprykład, kaski i broniekamizelki, adnak ustrymlivałasia ad pieradačy ŭzbrajeńnia.
U intervju ahienctvu Reuters, apublikavanamu napiaredadni jaho pajezdki ŭ Złučanyja Štaty, Jun Sok Jol raspavioŭ, što paŭdniovakarejski ŭrad pracuje nad tym, jak možna było b dapamahčy abaranić i adnavić Ukrainu, padobna da taho, jak mižnarodnaja supolnaść dapamahała jaho krainie padčas Karejskaj vajny 1950-53 hadoŭ.
«Kali ŭźniknie situacyja, na jakuju mižnarodnaja supolnaść nie zmoža zapluščyć vočy, — naprykład, u vypadku luboha bujnamaštabnaha napadu na mirnaje nasielnictva, masavaj bojni abo surjoznych parušeńniaŭ zakonaŭ vajny, — to nam budzie składana nastojvać tolki na humanitarnaj abo finansavaj dapamozie», — skazaŭ Jun Sok Jol.
Jak adznačaje Reuters, heta pieršy raz, kali paŭdniovakarejski lidar vykazaŭsia pra mahčymaść pastavak zbroi Ukrainie.
Paŭdniovaja Kareja viadomaja jak adzin ź viadučych u śviecie vytvorcaŭ artyleryjskich snaradaŭ. Adnak da hetaha času, niahledziačy na ŭzmacnieńnie zaklikaŭ zachodnich sajuźnikaŭ dapamahčy Ukrainie bojeprypasami, Sieuł sprabavaŭ paźbiahać antahanizmu z Rasijaj, dzie pracujuć mnohija paŭdniovakarejskija kampanii, a taksama z pryčyny ŭpłyvu Maskvy na Paŭnočnuju Kareju.
«Ja miarkuju, što nie pavinna być nijakich abmiežavańniaŭ na abjom dapamohi dla abarony i adnaŭleńnia krainy, u jakuju adbyłosia niezakonnaje ŭvarvańnie, jak z punktu hledžańnia mižnarodnaha, tak i ŭnutranaha prava. Adnak, uličvajučy našy adnosiny z bakami, jakija viaduć vajnu, i chod padziej na poli boju, my budziem prymać najbolš prydatnyja miery» — skazaŭ Jun Sok Jol.
Minułaj vosieńniu amierykanski časopis Wall Street Journal paviedamlaŭ (sa spasyłkaj na svaje krynicy), što Sieuł pahadziŭsia pradać kala 100 tysiač artyleryjskich snaradaŭ ZŠA, kab tyja zmahli pieradać takuju ž kolkaść Ukrainie. Heta musiła dazvolić Paŭdniovaj Karei paźbiehnuć uskładnieńniaŭ u adnosinach z Maskvoj.
Akramia taho, jak paviedamiła niekalki dzion tamu paŭdniovakarejskaja hazieta Donga Ilbo, u minułym miesiacy Paŭdniovaja Kareja dasiahnuła pahadnieńnia ab pieradačy Złučanym Štatam 500 tysiač snaradaŭ kalibra 155 mm, što moža dać Vašynhtonu vialikuju hnutkaść u pastaŭkach bojeprypasaŭ Ukrainie.
Sa spasyłkaj na nienazvanyja krynicy va ŭradzie, hazieta piša, što snarady buduć vykarystoŭvacca ZŠA — u pieršuju čarhu, dla papaŭnieńnia svaich zapasaŭ.
Kamientujučy hetuju publikacyju, kiraŭnik MZS Paŭdniovaj Karei zajaviŭ, što nie moža paćvierdzić hetyja źviestki, ale dadaŭ, što pazicyja ŭrada suprać pieradačy śmiarotnaj dapamohi Ukrainie zastajecca niaźmiennaj.
Akramia taho, u pačatku sakavika stała viadoma, što Sieuł uchvaliŭ pieradaču Ukrainie samachodnych haŭbic Krab, ustanoŭlenych na šasi karejskaj vytvorčaści. Heta stała pieršym paćviardžeńniem, što Sieuł aficyjna ŭzhadniŭ pastaŭki ŭzbrajeńnia z paŭdniovakarejskimi kampanientami Ukrainie, a nie prosta zapluščvaŭ na ich vočy.
Va Ukrainy da maja mohuć vyčarpacca rakiety SPA, śviedčać źlityja amierykanskija dakumienty
