Aleh Barna na froncie. Fota Iryny Hieraščanka
«Učora padčas bajavych dziejańniaŭ zahinuŭ Aleh Barna. Tak zdaryłasia, što my mieli mahčymaść pahutaryć na minułym tydni».
Eks-prezident Ukrainy Piatro Parašenka taksama napisaŭ u fejsbuku pra hibiel byłoha deputata ad svajoj frakcyi, adznačyŭšy, što nie budzie vieryć u jaho śmierć «da apošniaha».
«Chaj hetaja viestka budzie prykraj čutkaj, žachlivym nieparazumieńniem, złym žartam. Nie siońnia, dyk zaŭtra, nie zaŭtra, dyk praź niekalki dzion Aleh źjavicca. Ci jaho znojduć dzie-niebudź siarod trochsotych. Budziem spadziavacca i malicca», — napisaŭ jon.
Alehu Barnu było 55 hadoŭ, jon uradženiec Ciarnopalskaj vobłaści. Z 1991 pa 2014 hod pracavaŭ nastaŭnikam matematyki, fiziki i infarmatyki ŭ viaskovych škołach na radzimie, aktyŭna ŭdzielničaŭ u hramadskim žyćci.
U vialikuju palityku pryjšoŭ paśla Jeŭramajdana. Spačatku Barna zapisaŭsia dobraachvotnikam u vojska i niekalki miesiacaŭ vajavaŭ na Danbasie, a na vosieńskich vybarach 2014-ha bałatavaŭsia ŭ adnamandatnaj akruzie na radzimie i byŭ abrany deputatam Viarchoŭnaj Rady. Jahony małodšy rodny brat Ściapan, darečy, dabiŭsia tady jašče bolšych palityčnych pośpiechaŭ: staŭ spačatku taksama deputatam, a ŭ krasaviku 2015 hoda ŭznačaliŭ Ciarnopalskuju abłasnuju administracyju i zastavaŭsia na hetaj pasadzie čatyry hady, až da kanca prezidenctva Piatra Parašenki.
Aleh Barna, pakul byŭ deputatam, zapomniŭsia pieradusim ekscentryčnymi pavodzinami, bo ŭvieś čas patraplaŭ u hučnyja skandały. Najbolš viadomy epizod ź jahonym udziełam, fota ź jakim ablacieła stužki suśvietnych infarmahienctvaŭ, — siłavoje vydaleńnie z trybuny ŭ śniežni 2015 hoda tahačasnaha premjer-ministra Arsienija Jacaniuka. Za košt hetaha padčas deputactva Barna nabyŭ vialikuju viadomaść, ale pieraabracca na novy termin u 2019 hodzie heta jamu nie dapamahło.
Aleh Barna znosić z trybuny Arsienija Jacaniuka. Fota: Wikimedia Commons
U 2022 hodzie, paśla pačatku šyrokamaštabnaj rasijskaj ahresii, Aleh Barna, jak i ŭ 2014-m, znoŭ pajšoŭ dobraachvotnikam na front i 17 krasavika 2023-ha zahinuŭ pad Bachmutam.
Čytajcie taksami:
Z sakretnych amierykanskich dakumientaŭ stali viadomyja straty ŭkrainskaj armii