Sudździa Valancina Kulik
Ukaz i rasparadžeńnie ab uznaharodžańni sudździaŭ Viarchoŭnaha Suda Alaksandr Łukašenka padpisaŭ 10 krasavika, piša pres-słužba palityka.
Sudździ Viarchoŭnaha Suda Taćciana Prataščyk, Valancina Kryvaja, Hanna Sakałoŭskaja, Iryna Tylec, Ina Cysik i Alaksiej Ciaciuchin ŭznaharodžany miedalom «Za pracoŭnyja zasłuhi», Piotr Listracienka, Alaksiej Rybakoŭ i Andrej Jafremaŭ — «Za biezdakornuju słužbu» III stupieni.
Zvańnie zasłužanaha jurysta Biełarusi prysvojena sudździ Valancinie Kulik.
Sudździam Andreju Aleščanku i Fiodaru Čubkaŭcu abjaŭlena padziaka Łukašenki.
Hanna Sakałoŭskaja viadomaja tym, što spryčyniłasia da likvidacyi hramadskich arhanizacyj — Biełaruskaha PENa, Biełaruskaha Chielsinkskaha kamiteta.
Jana ž u 2020-m admoviła Valeryju Capkału ŭ skarzie na admovu ŭ rehistracyi jaho kandydatam na vybarach. Jana trapiła ŭ piaty sankcyjny pakiet ES, jaki byŭ pryniaty ŭ śniežni 2021 hoda.
U hety ž sankcyjny śpis trapiła sudździa Valancina Kulik. U pieradvybarčuju kampaniju jana adchiliła skarhu Viktara Babaryki na admovu zarehistravać jaho kandydatam u prezidenty. A ŭ 2003 hodzie, naprykład, jana razhladała spravu ab likvidacyi pravaabarončaha centra «Viasna».
Sudździa Piotr Listracienka pakinuŭ u sile prysud pa spravie lidaraŭ prafsajuza radyjoelektronnaj pramysłovaści. Pa im staršyniu prafsajuza Vasila Bieraśnieva i šmathadovaha lidara abjadnańnia Hienadzia Fiadyniča asudzili da 9 hadoŭ kałonii ŭzmocnienaha režymu, aktyvista Viačasłava (Vacłava) Arešku — da 8 hadoŭ kałonii ahulnaha režymu.
