Napiaredadni Vialikadnia ŭkryžavany ŭ 34 raz filipiniec pamaliŭsia ab zakančeńni rasijskaha ŭvarvańnia va Ukrainu. Pra heta paviedamlaje Associated Press.
«U hetaj vajnie ŭdzielničajuć tolki dźvie krainy: Rasija i Ukraina, ale ad pavyšeńnia cen na naftu pakutujem my ŭsie, navat nie ŭdzielničajučy ŭ kanflikcie», — skazaŭ 62-hadovy Ruben Enadže na pres-kanfierencyi paśla raśpiaćcia. Jon raspavioŭ Associated Press, što praz rasijskaje ŭvarvańnie va Ukrainu jamu stała składaniej vyžyvać na svoj mały prybytak ad stalarnych rabot i vyrabu šyldaŭ, bo pradukty rezka padaraželi.
Realnaje ŭkryžavańnie — tradycyjny abrad u filipinskaj vioscy San-Pedra-Kutud, pahladzieć na jaki źjazdžajucca tysiačy turystaŭ. Sioleta na ŭkryžavańnie advažylisia vosiem čałaviek.
Nadzieŭšy kalučyja vianki z halinak, jany bolš za kiłamietr nieśli na śpinie ciažkija draŭlanyja kryžy pa śpiakocie. Paśla hetaha ich dałoni i stupni prybili dziesiacisantymietrovymi ćvikami ź nieržaviejučaj stali da kryžoŭ i ŭstalavali pad soncam na dziesiać chvilin. Inšyja pakutniki chadzili basanož pa viaskovych vulicach i bili siabie pa hołych śpinach vostrymi bambukavymi pałkami.
Rubien Enadžie ŭdzielničaje ŭ abradzie ŭ padziaku za toje, što vyžyŭ paśla padzieńnia z treciaha paviercha ŭ maładości. Jon nazyvaje heta cudam. Inšyja — u asnoŭnym biedniaki — prachodziać rytuał, kab zahładzić svaje hrachi, pamalicca za chvorych abo paprasić ab lepšym žyćci.
Katalickaja carkva Filipin nie ŭchvalaje raśpiaćcia i samabičavańnia. Miascovyja carkoŭnyja lidary kažuć, što vierniki mohuć dakazać svaju relihijnuju addanaść, nie pryčyniajučy sabie škody, a zajmajučysia dabračynnaściu, naprykład, zdajučy kroŭ.
Čytajcie jašče:
Jak farbavać vielikodnyja jajki: vialiki hajd
Da vielikodnaha stała. Robim paschu: 4 recepty, jakija abaviazkova atrymajucca
