Pra toje, što USU pasprabavali vysadzić desant i šturmavać ZAES, u kancy kastryčnika minułaha hoda paviedamlali čynoŭniki akupacyjnych administracyj i Minabarony Rasii.
Jak adznačaje Times, Kijeŭ aficyjna nie pryznavaŭ sprobu šturmu najbujniejšaj u Jeŭropie atamnaj elektrastancyi, adnak pradstaŭniki ŭkrainskaha śpiecnaza, vajennaj raźviedki i VMS na ŭmovach ananimnaści raspaviali žurnalistam vydańnia padrabiaznaści apieracyi.
Na toj momant rasijskija vojski ŭtrymlivali elektrastancyju ŭžo bolš za šeść miesiacaŭ, vykarystoŭvajučy jaje terytoryju dla abstrełaŭ ukrainskich haradoŭ na druhim bierazie Dniapra i bujnoha staleliciejnaha zavoda ŭ Nikapali, piša Times.
U noč na 19 kastryčnika kala 600 vajskoŭcaŭ na 30 katarach, sa zbrojaj, u tym liku bujnakalibiernymi kulamiotami, hranatamiotami MK-19 i supraćtankavymi srodkami, pasprabavali vysadzicca na levy bierah Dniapra.
«U bai zmoža ŭdzielničać tolki piachota. Jany nie zmohuć prymianić suprać nas artyleryju, bo heta atamnaja stancyja», — cytuje Times adnaho z vajskoŭcaŭ.
Adnak ukraincy nie čakali, što im akažuć taki surjozny supraciŭ.
«Rasijskija vajskoŭcy pabudavali vielmi ščylnuju abaronu, usie zaminiravali. Kali my stali nabližacca, jany navat padciahnuli tanki i artyleryju i pačali abstrelvać nas prosta na vadzie», — raspavioŭ haziecie ŭkrainski vajskoviec.
Pakul katary śpiecnaza pierapłyvali Dniapro, ukrainskija vajskoŭcy stali abstrelvać pazicyi Rasii, u tym liku z dapamohaj rakietnych sistem HIMARS.
U vyniku tolki nievialikaj hrupie ŭkrainskich vajskoŭcaŭ udałosia dabracca da bieraha, jany ŭstupili ŭ trochhadzinnuju pierastrełku z rasijskim vojskam na ŭskrainie Enierhadara, ale potym vymušanyja byli adstupić.
Times adznačaje, što z-za ryzyki ŭciečki radyjacyi padobnaja sproba siłavoha šturmu vyklikaje pytańni navat va ŭkrainskich čynoŭnikaŭ, jakija pierakananyja ŭ nieabchodnaści viarnuć Zaparožskuju AES pad kantrol Kijeva.
Kiraŭnik ukrainskaha «Enierhaatama» Piotr Kocin vykazaŭ zdahadku, što viarnuć ZAES atrymajecca, kali ŭkrainskaja armija zmoža prasunucca na poŭdzień, u bok Kryma i Mielitopala.
«Heta adziny varyjant — bieź niepasrednaha abstrełu stancyi, biez pramoha nastupu na terytoryju stancyi, — kaža jon. — Vielmi niebiaśpiečna rabić takija rečy pobač ź jadziernymi materyjałami».
