Što źmianiłasia ŭ paraŭnańni z 2022-m
Ekśpiertka BEROC Nastaśsia Łuzhina nahadvaje, što biełaruski rubiel choć i nie kapiruje całkam, ale ŭsio ž šmat u čym paŭtaraje trajektoryju rubla rasijskaha, tamu jaho vahańni buduć zaležać ad źmien na valutnym rynku Rasii. Rasijski rubiel u svaju čarhu staŭ słabieć u adnosinach da asnoŭnych valut jašče z druhoj pałovy studzienia.
Pa słovach ekanamistki, hetamu spryjaje ceły šerah faktaraŭ, pačynajučy ad novych sankcyj i źnižeńnia cen na enierharesursy, zakančvajučy źmienami ŭ handlovym bałansie.
«U Rasii i Biełarusi nazirajecca pavieličeńnie abjomaŭ impartu. Situacyja z bałansam u handli ŭžo nie takaja viasiołkavaja, jakoj jana była ŭ 2022 hodzie, i čakać paŭtareńnia letašniaj situacyi, kali ekspart budzie značna bolšy, čym impart, nie varta. Pakazčyki pa imparcie ŭ abiedźviuch krainach rastuć jak dziakujučy paralelnamu impartu, tak i za košt inviestycyjnaha impartu. Situacyja ŭ źniešnim handli nie takaja spryjalnaja dla Rasii, jak letaś. U Biełarusi taksama nie varta čakać vialikaha stanoŭčaha handlovaha salda», — adznačaje ekśpiertka.
Ekśpiertka BEROC Nastaśsia Łuzhina. Fota: asabisty archiŭ
«Nie varta čakać rezkaha abvału rubla»
Novyja sankcyi, jakija pačali dziejničać z hetaha hoda, taksama niehatyŭna ŭpłyvajuć na handlovy bałans. Ceny na enierhanośbity taksama značna źnizilisia ŭ paraŭnańni ź minułym hodam. Na rasijskuju naftu ŭstalavana stol cen, a značyć nie treba raźličvać na toje, što rasijski rubiel zmoža znoŭ umacavacca dziakujučy vysokim cenam na enierhanośbity.
Jašče adnym važnym faktaram, jaki niehatyŭna ŭpłyvaje na rasijski rubiel, Łuzhina nazyvaje prodaž zamiežnikami rasijskich aktyvaŭ i vyvad finansaŭ z RF.
«Kali hetyja pracesy buduć praciahvać nabirać abaroty, to całkam mahčyma, što Centrabank RF uviadzie dadatkovyja abmiežavańni na prodaž zamiežnych aktyvaŭ, kab paźbiehnuć niehatyŭnaha ŭpłyvu na kurs rubla», — ličyć ekśpiertka.
Tym nie mienš ekanamistka adznačaje, što nie varta čakać rezkaha abvału rasijskaha, a razam ź im i biełaruskaha rubla.
«Niahledziačy na toje, što na valutnym rynku RF pa-raniejšamu dziejničajuć niekatoryja abmiežavańni i rasijskaje Ministerstva finansaŭ u ramkach biudžetnaha praviła (miechanizm, jaki pieraraźmiarkoŭvaje dachody ad ekspartu syraviny) pradavała juani. Viadoma, pry ŭmovie, što nie adbudziecca ničoha vielmi niehatyŭnaha, što zmoža źmianić situacyju», — adznačaje Łuzhina.
U najbližejšaj pierśpiektyvie biełaruski rubiel praciahnie abiasceńvacca ŭ dačynieńni da dalara i jeŭra, miarkuje ekanamistka.
«Prytym heta nie aznačaje, što kali rasijski rubiel abiascenicca ŭ dačynieńni da dalara na 10%, to i biełaruski stracić roŭna stolki ž. Takuju tendencyju my nazirali letaś. Ciapier my taksama bačym, jak, źnižajučysia ŭ dačynieńni da dalara, naša valuta ŭmacoŭvajecca adnosna rasijskaj.
Kali da dalara kurs biełaruskaha rubla z pačatku hoda źniziŭsia na 6%, to adnosna rasijskaha rubla jon, naadvarot, umacavaŭsia na 3,4%. To-bok źnižeńnie jość, ale jano nie takoje, jak u rasijskaha rubla», — tłumačyć ekśpiertka.
«Kurs biełaruskaha rubla budzie niepasredna zaležać ad ekanamičnaj situacyi ŭ RF»
Łuzhina taksama źviartaje ŭvahu, što ŭ dačynieńni da valutnaha košyka rubiel z pačatku hoda straciŭ usiaho 0,58%. Praŭda, adbyvajecca heta za košt taho, što dola rasijskaha rubla ŭ im składaje 60%.
«Kali pahladzieć na abjomy tarhoŭ na BVFB, to tam na pieršym miescy pa abjomach idzie rasijskaja valuta. Ciapier biełaruskaja ekanomika maksimalna aryjentavanaja na rasijski rynak. Valutny rynak adpaviedna taksama mocna zaviazany na rasijski valutny rynak, tamu kurs biełaruskaha rubla budzie niepasredna zaležać ad ekanamičnaj situacyi ŭ RF», — adznačaje ekśpiertka.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čamu biełaruskija banki na čverć zanižajuć kurs rasijskaha rubla? Tłumačyć ekanamist
Niekalki biełaruskich bankaŭ mianiajuć valuty raźlikaŭ pa kartach Mastercard na kitajski juań
