Alaksiej Chrałovič u SIZA KDB. Kadr ź filma ANT
Padrabiaznaści spravy nieviadomyja, bo praces prachodziŭ u zakrytym režymie, a na samoj kryminalnaj spravie — hryf sakretnaści. Niekatoryja padrabiaznaści zatrymańnia asudžanych viadomyja tolki z prapahandysckaha filma «Apieracyja KDB «Mankurty», jaki ATN pakazaŭ u 2021 hodzie. Spravu razhladała sudździa Valancina Ziańkievič.
U 2021 hodzie na telekanale ANT pakazali film «Apieracyja KDB «Mankurty»», u jakim paviedamili pra zatrymańnie padpałkoŭnika KDB Alaksieja Chrałoviča. Zhodna ź filmam, Chrałovič mieŭ dačynieńnie da pieradačy Ściapanu Puciłu ŭ listapadzie 2020 aŭdyjazapisaŭ razmoŭ pres-sakratarki Łukašenki Natalli Ejsmant z roznymi słužbovymi asobami. Mienavita ŭ hetych zapisach viałasia havorka pra abstaviny hibieli Ramana Bandarenki.
Taksama tady paviedamlałasia, što Alaksieja zatrymali i dałučyli da apieratyŭnaj hulni, kab vyjavić šlachi evakuacyi biełarusaŭ, jakich mohuć praśledavać pa palityčnych matyvach. Pavodle ANT, siłaviki zatrymali Viačasłava Sidarakina, Juryja Harkača, Siarhieja Starčanku, Uładzimira Tryfanava i Volhu Sałamienik.
U filmie Volha kazała, što pa prośbie Ihara Makara joj treba było «zabrać niejkaha čałavieka i dakumienty». Prapahandysty raspaviali, što joj skazali «zabrać archiŭ KDB i pierapravić jaho ŭ Polšču». Zychodziačy ź filma, Volha paśla zatrymańnia supracoŭničała z KDB i pad ich kantrolem kamunikavała z Makaram. Pavodle filma ANT, Uładzimir Tryfanaŭ — pravadnik praź biełaruska-litoŭskuju miažu, praź jakuju musiŭ nielehalna pieravieści Alaksieja Chrałoviča.
Volha Sałamienik. Kadr ź filma ANT
Viadoma, što Volhu hod utrymlivali ŭ SIZA KDB, dzie jana trymała haładoŭku. Potym jaje pieraviali ŭ SIZA-1.
«Jana była zusim sivaja. Jana doŭha trymała haładoŭku — jaje navat karmili praź vieny na rukach, tamu jany ŭ jaje byli nadźmutyja, jak lasnyja karčaki. U Volhi byŭ vialiki biznes u Hrodnie, ale jana ŭsio pradała i chacieła nabyć kvateru ŭ Hrecyi i źjechać. Ale ŭsio heta adbyłosia i jaje schapili. Dakumientaŭ nijakich na rukach u jaje nie było, bo sprava była pad hryfam sakretnaści — «SS». Joj ničoha nie vydavali na ruki naohuł. Ź jaje «padzielnikam» tam vielmi dziŭnaja historyja», — raspaviała pravaabaroncam žančyna, jakaja sustrakałasia ź joj u źniavoleńni.
Byłoha padpałkoŭnika KDB Alaksieja Chrałoviča ŭ Minskim haradskim sudzie 30 sakavika 2022 hoda asudzili da 10 hadoŭ kałonii va ŭmovach uzmocnienaha režymu i štrafu ŭ pamiery 500 bazavych vieličyń pa č. 2 art. 356 Kryminalnaha kodeksa (zdrada dziaržavie, ździejśnienaja słužbovaj asobaj, jakaja zajmaje adkaznaje stanovišča).
24 lutaha 2023 hoda Volhu Sałamienik i Uładzimira Tryfanava ŭnieśli ŭ «śpis ekstremistaŭ». Viadoma, što žančynu etapavali ŭ homielskuju kałoniju №4, a ŭ jakuju kałoniju adpravili Uładzimira — pakul nieviadoma.
Čytajcie taksama:
Šrajbman daŭ svaju interpretacyju filmu «Mankurty» na ANT
Aryštavany padpałkoŭnik KDB, jaki pieradavaŭ infarmacyju telehram-kanałam
