Fota: znwr.minsk / Instagram
Hanisieŭski napisaŭ, što artykuły ŭ ŚMI pra supracoŭnictva brenda z fondam «Prosta» «skažajuć realnuju situacyju». Pavodle jaho, na pačatku śniežnia 2022 hoda ŭ ZNWR vyrašyli znajści fond, praź jaki jany buduć dapamahać siemjam, što majuć patrebu ŭ hetym, i addavać im rečy brendu, jakija nie mohuć pradać ci puścić na pierapracoŭku.
Fond «Prosta», pavodle Hanisieŭskaha, — heta «najbujniejšy fond, jaki za minuły hod dapamoh 30 tysiačam małazabiaśpiečanych siemjaŭ, i jaki ŭ toj ža čas zajmajecca pierapracoŭkaj rečaŭ».
Zasnavalnik ZNWR zapeŭnivaje, što nidzie nie bačyŭ infarmacyi, što fond «Prosta» dapamahaje rasijskim mabilizavanym.
Pavodle jaho, paźniej vyśvietliłasia, što heta była «razavaja pryvatnaja inicyjatyva niekatorych udzielnikaŭ fondu» i dapamoha «zaniała mienš za 0,1% ad jaho dziejnaści».
Hanisieŭski piša, što brend ZNWR «nikoli nie mieŭ nijakaha dačynieńnia da militarysckich prajektaŭ», bo heta «supiarečyć fiłasofii i kaštoŭnaściam brenda».
Jon zajaviŭ, što jaho kampanija ŭvieś čas zajmałasia dabračynnaściu, ładziła takija prajekty ŭ Biełarusi: pieradavała rečy ŭ prajekt «Kaliłaska», Čyrvony Kryž, adziavała biazdomnych pierad chaładami, rychtavała padarunki dzieciam u dziciačych damach i Biełaruskim dziciačym chośpisie, kuplali drovy dla piensijanieraŭ.
Hanisieŭski piša, što, ryzykujučy zakryćciom, ZNWR abkleiŭ vitryny kramaŭ u Maskvie i Sankt-Pieciarburha słohanam «People for peace» («Ludzi za mir»).
«I ciapier u nas byŭ čysty matyŭ, i heta nasamreč kryŭdna, kali ty robiš dabračynny prajekt, a ciabie ŭsio roŭna palivajuć brudam», — piša Hanisieŭski.
«Chaj kožny, chto napisaŭ nam kamientaryj z abvinavačvańniem, česna spytaje ŭ siabie, a što zrabiŭ kankretna jon, kab niekamu dapamahčy?»
Niahledziačy na ŭsie abstaviny, kampanija vyrašyła spynić supracoŭnictva z fondam «Prosta», bo jana «suprać lubych prajektaŭ, źviazanych ź militaryzmam», i ciapier šukaje novych partnioraŭ, paviedamiŭ Maksim Hanisieŭski.
Dyzajnierski brend ZNWR viadomy svaimi chudzi i cišotkami. Jon zjaviŭsia ŭ Babrujsku, ale z časam zavajavaŭ nie tolki biełaruski rynak. U Rasii ŭ ich — taksama sietka kramaŭ.
Čytajcie taksama:
Viadomy biełaruski brend z pačatku vajny adkryŭ čatyry kramy ŭ Maskvie. Dyzajniery patłumačyli svajo rašeńnie
