Alaksiej Sieladcoŭ (źleva) i Siarhiej Biazzubienka
U Mahilovie razhortvajecca «sprava achoŭnikaŭ i ŭčastkovych», u publičnych bazach my znajšli zhadki pra čatyroch byłych aficeraŭ MUS, jakich abvinavačvajuć u karupcyi. Ale ich moža być i bolš.
Try ź ich prachodziać pa adnoj spravie pa artykułach 426 č. 2 (pieravyšeńnie ŭłady), art. 431 č. 1 (davańnie chabaru), art. 209 č. 1, č. 2 (machlarstva). Im pahražaje da šaści hadoŭ turmy.
Pieršy ź ich — kapitan Alaksiej Sieladcoŭ.
Učastkovy Alaksiej Sieladcoŭ — syn milicyjaniera, u orhanach z 2009-ha, skončyŭ Biełaruska-rasijski ŭniviersitet, «dobry strateh, pieramoŭščyk i juryst», jak pisaŭ rehijanalny sajt MUS.
Ź im ža ŭ kampanii ŭhanaravany miedalom «Za biezdakornuju słužbu» treciaj stupieni kamandzir uzvoda roty milicyi Departamienta achovy Leninskaha rajona Mahilova Siarhiej Biazzubienka.
Treci ŭ hetaj kampanii — Badziłaŭ Siarhiej Anatoljevič. Major milicyi, kamandzir roty milicyi Kastryčnickaha adździeła Departamienta achovy Mahilova.
Pa asobnaj, ale vielmi padobnaj spravie, adnačasova sudziać i inšaha mahiloŭskaha ŭčastkovaha Maksima Saskaŭca pa art. 431 č. 2 i č. 1 (davańnie chabaru), art. 209 č. 2 i č. 1 (machlarstva), art. 430 č. 2 (atrymańnie chabaru), i art. 212 č. 2 (kradziež majomaści šlacham madyfikacyi kampjutarnaj infarmacyi).
Hod tamu mahiloŭskaja milicyja vykładała videa, dzie piensijanierka, siedziačy ŭ kvatery, vykazvaje Saskaŭcu padziaku «za čullivaje staŭleńnie da hramadzian i prafiesijanalizm».
U čym praštrafilisia milicyjanty?
Jak stała viadoma «Našaj Nivie», da turmy ich pryviała tradycyjnaja dla łukašenkaŭskaj milicyi schiema zaachvočvańniaŭ.
Reč u tym, što ŭ hetaj struktury pryniata rabić hrašovyja padarunki kiraŭnikam na śviaty, mierapryjemstvy i hetak dalej.
Źbirajuć hrošy z usiaho kalektyvu. Byłyja supracoŭniki krasamoŭna apisvajuć pryniatyja praktyki.
«Heta ni dla kaho nie sakret. Ciapierašnija hienierały taksama rehularna atrymlivali hrašovyja padarunki, kali słužyli ŭ HAUSach i HUUSach. Daryli i publična, vydumlali maskiroŭki. Niajomka ž, kaniečnie, voś tak uručać, tamu adzin raz pry mnie prydumali taki sposab — dorycca mikrachvaloŭka publična. Heta nibyta i zvyčajny padarunak. Ale ŭnutry jaje kłali pakiet z hrašyma», — raskazvaje nam abaznany aficer MUS.
U vypadku mahiloŭskich učastkovych i departamienta achovy, prablemy vyklikaŭ nie sam fakt paboraŭ, a toje, što častku z sabranych hrošaj źbiralniki pakidali sabie. Hetaje prysvajeńnie i stała, pa infarmacyi «Našaj Nivy», asnovaj kryminalnaj spravy.
