Tydzień Sysa na NN — u hetyja dni praklaty paet moh by śviatkavać 50-y dzień naradžeńnia. Hety vierš byŭ napisany Sysom u adkaz na rospačny vierš Pimiena Pančanki «Heta z movaj majoj raźvitańnie», napisany na piku savieckaj rusifikacyi.
- Rodny moj Pimien Pančanka,
Vy skazali: nastała źmiarkańnie?
Vy skazali na maci mačycha?
Bo nastała Vam raźvitańnie?
- Ź jaje słovam — užo nie rodnym,
ź jaje soncam — užo chałodnym,
ź jaje ludam — spradviek hałodnym,
navat Bohu j tamu niaŭhodnym…
- Adychodzicie ci zrakajeciesia?
Ci suchimi ślazami kajeciesia?
Pad kryžami Safii Połackaj
biurakrat za Vas nie pamolicca,
- a pamolicca za Vas mačycha,
za synočka svajho, za Pančanku,
i ŭ hałovach zapalić śviečačku.
Moža, ŭzimačku, a moža, ŭleciečku
- skroź rasstańnie i skroź źmiarkańnie
na ahieńčyk paet prystanie,
skaža: rodny moj Pimien Pančanka,
ja Vam vieryŭ, dy viera stračana.
- I ŭ hałovach patušyć śviečačku,
moža, ŭzimačku, a moža, ŭleciečku
pad kryžami Safii Połackaj
jon za Biełuju Ruś pamolicca,
- za nastupnikaŭ i za pradziedaŭ,
jon pamolicca tak, jak dadziena,
jak vučyli Kupała z Kołasam —
kreŭnym słovam, rodnym hołasam.
- Vy žyvymi ślazami zapłačacie,
za paetam narod ubačycie
skroź rasstańnie i skroź źmiarkańnie,
Vam za śmierć svaju prykra stanie,
- bo pad niebam Safii Połackaj
na narodnych paetaŭ molacca.
0
0
0
0
0
0
