Rudy ličyć pierśpiektyŭnym abrany biełaruskimi ŭładami afrykanski kirunak, bo:
«Z 50 krain, jakija rastuć najbolš chutka, u 2022 hodzie pałova — z Afryki. U najbližejšyja 10-20 hadoŭ Afryka zabiare ŭ Azii lidarstva ŭ dynamicy, mahčymaściach, kolkaści nasielnictva. Takimi tempami pa ŭzroŭni raźvićcia jana abydzie i naš rehijon. Heta dobraja staŭka».
Aptymistyčna jon hladzić i na niebiaśpieku Biełarusi patrapić u «daŭhavuju pastku»:
«Raniej kredytory za daŭhi vajavali, uvodzili časovaje kiravańnie pa zbory padatkaŭ dla pahašeńnia svaich pazyk. Ciapier inšyja časy: kredytory bolš humannyja i nie mienš zacikaŭlenyja, čym sam pazyčalnik, kab jon nie trapiŭ u pastku i płaciŭ. Umoŭ kredytavańnia šmat, ich možna abmiarkoŭvać, asłablać, až da śpisańnia doŭhu. U minułym hodzie Rasija refinansavała daŭhi Biełarusi, a Kitaj śpisaŭ 17 afrykanskim krainam 23 biespracentnyja pazyki i refinansavaŭ im 10 młrd dalaraŭ.
Najhoršaje, što mahło ŭ Biełarusi być — heta zabarona na vychad na suśvietny finansavy rynak. Faktyčna heta adbyłosia. I što? Raniej dumaŭ, što heta paŭpłyvaje na inšych našych kredytoraŭ i budzie recesija. Ciapier zdajecca, što ryzyka «daŭhavoj pastki» dla Biełarusi trochi pieraacenienaja».
Pazityŭ Rudy bačyć navat u tym, što z-za zachodnich sankcyj Biełaruś zmušanaja pradavać našmat mienš, čym raniej, pradukcyi kalijnaha kambinata:
«Kalij, darečy, u niejkaj stupieni navat pieraškadžaŭ našamu ekspartu ŭ Kitaj, bo zapoŭniŭ čyhunačnyja kantejniery, i inšym eksparcioram davodziłasia albo čakać svajoj čarhi i zatrymlivać pastaŭki ŭ Kitaj, albo asvojvać praciahłyja aŭtamabilnyja pieravozki».
Nie bačyć ničoha asabliva krytyčnaha Rudy i ŭ raźvićci inviestycyjnaha parku «Vialiki kamień»:
«Acanić raźvićcio «Vialikaha kamienia» možna pa kolkaści rezidentaŭ. Jana raście, a nie skaračajecca. Kali mierkavać pa vizitach, to pavialičyłasia cikavaść da parku z boku rasijskich rehijonaŭ i zon raźvićcia».
Tym nie mienš:
«U cełym, viadoma, biełaruska-kitajskija inviestycyjnyja adnosiny paciarpieli. Paŭpłyvali palityčnyja padziei ŭ nas, vajennyja dziejańni ŭ susiedziaŭ, kavidnyja abmiežavańni ŭ Kitai, zachodnija sankcyi. Byŭ režym čakańnia. Ciapier realnaść zrazumiełaja, inviestary pačnuć prymać niejkija rašeńni».
