Fota ilustracyjnaje
Polšča: tuha pa pielmieniach, žuravinach u cukry i čypsach Lay's z krabam
- Nie staje miakkaha tvarahu i ziefiru. Narmalnaha horkaha šakaładu, a nie masła z cukram. Narmalnych pielmieniaŭ i syrkoŭ płaŭlenych. Piečanyja piražki — redkaść.
- U Polščy ŭ cełym praduktovyja kramy razdražniajuć. Zamała raznastajnaści ŭ šakaładzie i łasunkach, sumuju pa babrujskim ziefiry.
- Što raduje, dyk heta śviežy chleb i ceny na sadavinu/harodninu; harbaty, napoi. Dumaju, takich pazicyj šmat, adrazu i nie zhadać. Ale vysnova takaja: usio jość — vybaru niama.
- Sieladziec u kramach kisły abo vielmi vocatny. Toje ž samaje z marynadami — kali kuplaješ hryby, to ŭsio roŭna budzieš jeści vocat biez smaku hryboŭ. Alternatyva — sieladziec «po gryficku» ad firmy Kapitan Navi ŭ «Biadroncy» abo «a-la macijas» u «Ašanie», dastaŭka «Fryska».
- Zadziaŭbałasia, pakul znajšła narmalny kiefir u litrovych słoikach biez kamiakoŭ. Ciapier biaru naturalny kiefir firmy Pilos u Lidl i Auchan, smakam taki ž, jak biełaruski.
- Tvarožnyja syrki, padobnyja da našych, tut udałosia znajści nie adrazu. Ja biaru «Mahiju» ŭ «Ašanie» abo «Karums» u «Best Markiecie».
- Śmiešna hučyć, ale mnie smačnaha marožanaha nie staje. Jak naš «Kaštan», naprykład.
- Sumuju pa žuravinach u cukry, čypsach Lay's z krabam i šašłykom. Kažuć, takija čypsy pieryjadyčna ŭ «Žabcy» byvajuć, ale mnie nie traplalisia pakul.
- A ja dahetul pryvožu z Hrodna 10 bochanaŭ chleba čornaha i kładu ich u marazilnik. Paśla razmarozki smakavyja jakaści nie hublajucca. Tolki žonka łajecca, što pałovu marazilnika zaniaŭ.
Słavienija: niama salonaj ryby i žoŭtaha kołataha harochu
- U prodažy ŭ zvyčajnych kramach adsutničaje žoŭty kołaty haroch. Možna zaduryć sabie hałavu pajezdkaj u «ruskuju» kramu, ale nie fakt, što tam budzie. Mnie pryvoziać kubiki Lidskaha harochavaha supu «ŭ padarunak» z RB. Heta ta-a-ak smačna!
- Jašče niama salonaha sała, tolki vendžanaje. Muž pakutuje. Zasalić samoj nie varyjant, tut sała niama naohuł. I jašče niama narmalnych salonych bočkavych sieladcoŭ (maŭču pra sałaku i kilku). Voziać štości niamieckaje, ale heta zusim nie toje i davoli doraha.
- «Macijas» možna kupić pa 3-4 jeŭra za maleńkuju ŭpakoŭku, ale ja jaje nie lublu. Tamu sieladziec pad šubaj apošnija 5 hadoŭ u nas z… siomhaj abo łasosiem chatniaha pasołu.
- Salonuju rybu słaviency nie jaduć, jana dla ich «syraja». Jaduć smažanuju, piečanuju, vendžanuju, varać rybny sup. Naohuł, tut «miasnaja» kraina. Miasa šmat, ryby mała i jana darahaja, choć i mora pobač.
Litva/Hiermanija: darahi kiefir
- U Litvie krychu vuziejšy vybar šmatkoŭ (tych, ź jakich kašy varać) — prasianyja, kukuruznyja možna znajści tolki ŭ kramach zdarovaha charčavańnia nakštałt LivIn, pa adpaviednych cenach. Krychu dziŭna, bo i prasianaja, i kukuruznaja krupy jość u luboj kramie. I inšyja šmatki: rysavyja, hračanyja, nie kažučy ŭžo pra aŭsianku i roznyja vidy mulciziernievych — jość usiudy. Taksama nie znajšoŭ kruhłaziernievaha rysu a-la krasnadarski abo niamiecki Milchreis — zamiest jaho kuplaŭ rysavyja šmatki.
- Z astatnimi zvykłymi praduktami (małako, čorny chleb, navat hłazuravanyja syrki) u Litvie lepš, čym u Biełarusi, choć chleb i značna daražejšy.
- Ciapier ja ŭ Hiermanii, tut užo sa zvykłymi praduktami trochu składaniej. Sa šmatkoŭ — aŭsianka roznych varyjantaŭ i miljon hatunkaŭ miuśli. Hračanyja, rysavyja, prasianyja, mulciziernievyja šmatki — tolki ŭ jakaści zdarovaj ježy, naroŭni z amarantam i šmatkami z kinoa (nu i, zdajecca, u ruskich kramach štości jość — pakul nie dajšoŭ). Zatoje jość Milchreis.
- Čornaha zavarnoha chleba, naštałt biełaruskaha «Čaraŭnika», tut pakul nie bačyŭ, ale nie asabliva šukaŭ.
- Kiefir jość dobry, tolki davoli darahi — ad 1 jeŭra za 0,5 ł. Tvaroh taksama jość, i taksama darahi — 1,5 jeŭra za 250 hramaŭ. Navat paru vidaŭ hłazuravanych syrkoŭ jość u Lidl, pa 69 centaŭ.
- Paśla Litvy — na dziva darahaja ryba, kiłahram stejkaŭ z łasosia za 7-8 jeŭra nie kupiš, minimum 20-25.
Kanada: bočkavyja salonyja hurki — tolki ŭ adnoj kramie
- Mnie ŭ Kanadzie nie staje salonych ahurkoŭ z bočki. U vyniku znajšoŭ ich tolki ŭ adnoj kramie, ale jany byvajuć nie zaŭsiody.
- Kuplaju ŭ miascovym supiermarkiecie. Ale ja bačyŭ hetyja ahurki ŭ kramie z «ukrainskimi» tavarami. Mnie da «ŭkrainskaj» kramy doŭha dabiracca.
- Kvašanuju kapustu bačyŭ pobač z tymi ahurkami. Na sała nie źviartaŭ uvahi. Ale ja hetyja pradukty nie lublu.
Sierbija: niama narmalnaha tvarahu i ablapichi
- U Sierbii niama narmalnaha tvarahu.
- Sieladziec pryvozili ažno ź Litvy. Bo kali jaho niama, šuba — heta toje, čaho zachaciełasia ŭ pieršuju čarhu. Nu i syrnikaŭ, viadoma.
- A jašče ŭ Sierbii nie viedajuć, što takoje ablapicha. Našaj ablapichavaj harbaty nie staje. Znajšli adnu kaviarańku (trymajuć ruskamoŭnyja chłopcy z roznych krain, «Akijan Elzy» lubiać słuchać, što pryjemna). Dyk jany znajšli ablapichu ŭ niejkim miastečku, dzie jaje vyroščvajuć dla kaśmietyčnych firmaŭ. Parolaŭ i javak nie zdajuć.
Hruzija: nie staje razabranaj kurycy i dobrych małočnych praduktaŭ
- Šašłyku narmalnaha nie staje. Prychodzicca ŭ kaminie smažyć samatužny.
- Banalna kurycy razabranaj i miasa dobraha ŭ kramach — davodzicca pašukać, i jość daloka nie zaŭsiody.
- Sumuju pa raznastajnaści krutych sumiesiaŭ z aharodniny.
- Kaŭbasnyja vyraby… Usio dzika salonaje. Navučyłasia sama hatavać viandlinu, bo kramnaj jeści nie mahu.
- Nie staje ŭ cełym dobrych małočnych praduktaŭ — pitnych johurtaŭ, śmiatany.
- Vielmi nie staje vendžanych jajek. Ja tut jašče nie da kanca asvoiłasia, tamu pakul šukaju ŭ biełaruskich kramach zvykłuju ježu.
14
40
22
5
7
12