Vierahodny śpiećciahnik Pucina
Z-za śpiećciahnika ŭ piatnicu ŭviečary spyniŭsia ruch na adnoj z samych zahružanych halin staličnaha čyhunačnaha vuzła — Maskoŭska-Ćviarskoj. Ciahniki, što išli ad Leninhradskaha vakzała, stali ŭ 18.15 na ŭčastku ad stancyi Maśsielmaš u vobłaści pa ŭsich šlachach. Na ŭčastku ad Maskvy da Maśsielmaša paŭstaŭ zator ź ciahnikoŭ, jakija daviałosia spynić dla propusku śpiecsastavu, piša moscowtimes.ru.
Ruch adnaviŭsia kala 18.50. U Maskoŭska-Ćviarskoj pryharadnaj pasažyrskaj kampanii paćvierdzili, što ciahniki na Leninhradskim kirunku Kastryčnickaj čyhunki išli sa spaźnieńniami. Pryčyna — propusk śpiećciahnika.
Blizki da Kramla palitołah, a ŭ minułym «ideołah» «Adzinaj Rasii» Siarhiej Markaŭ adznačaje, što Pucin, pa čutkach, vyrašyŭ aprabavać śpiećciahnik dla pajezdki ŭ svaju rezidencyju na Vałdai. Tam prezidentu treba budzie zaviaršyć padrychtoŭku pasłańnia Fiederalnamu schodu, jakoje namiečanaje na 21 lutaha.
Transpartniki, vidavočna, niezadavolenyja tym, što bronieciahnik Pucina rvie raskład i «źlivajuć» infarmacyju pra jaho ruch, miarkuje Markaŭ.
Pra toje, što Pucin aktyŭna karystacca bronieciahnikom dla pajezdak ŭnutry krainy, pisaŭ centr «Daśje» sa spasyłkaj na čałavieka ź blizkaha koła prezidenta, a taksama na blizkuju da jaho administracyi krynicu.
Bronieciahnik sa spalniaj i pracoŭnym Kabinietam skanstrujavali jašče ŭ 2014-2015 hh., ale jon nie vyklikaŭ vialikaj cikavaści Pucina da taho momantu, jak Kreml pačaŭ rychtavacca da ŭvarvańnia va Ukrainu. Rehularna ździajśniać pajezdki na bronieciahniku kiraŭnik Rasii staŭ u druhoj pałovie 2021 hoda, kali rasijskaje vojska ściahvali da ŭkrainskich miežaŭ.
Žadańnie Pucina karystacca bronieciahnikom pradyktavanaje intaresami sakretnaści: pieramiaščeńnie samalota možna adsačyć z dapamohaj šmatlikich adkrytych internet-servisaŭ, a dla ciahnikoŭ anałahičnaha miechanizmu niama.
Raskład RČ davodzicca karektavać śpiecyjalna pad Pucina, kab sastaŭ išoŭ z maksimalnaj chutkaściu i biez prypynkaŭ.
«Vyjezd ciahnika moža być spantannym, nieanansavanym, — raspaviadaje krynica «Daśje». — Paśla pačatku vajny, u lutym—sakaviku, jon [Pucin] staŭ vielmi aktyŭna karystacca ciahnikom, asabliva kab dabracca da svajoj rezidencyi na Vałdai».
Čytajcie taksama:
Pucinu pabudavali jašče i sakretnuju sietku čyhunak i stancyj — jany viaduć da jaho rezidencyj
