Zdymak maje ilustracyjny charaktar. Fota: ukrinform.ru
U centry rasśledavańnia OCCRP z udziełam vydańniaŭ The Guardian, Der Spiegel, Haaretz i jašče niekalkich ŚMI — izrailskaja hrupa śpiecyjalistaŭ pa anłajn-upłyvie, jakaja nazyvaje siabie «Kamanda Chorchie»; jany ŭmiešvajucca ŭ vybary pa ŭsim śviecie, pravodziać kampanii pa dezynfarmacyi z dapamohaj botaŭ i ŭzłomvajuć akaŭnty vysokapastaŭlenych čynoŭnikaŭ u tielehramie i Gmail.
Kiraŭnik hrupy Tał Chanan, jaki nazvaŭ siabie Chorchie, zajaviŭ žurnalistam, što jaho kamanda praviała 33 kampanii «prezidenckaha ŭzroŭniu», ź jakich 22 pryznanyja «paśpiachovymi» — u asnoŭnym u Afrycy, ale taksama i ŭ krainach Jeŭropy, Łacinskaj Amieryki, Paŭdniova-Uschodniaj Azii i Karybskaha basiejna.
Chanan paviedamiŭ, što ŭmiašańnie jaho kamandy ŭ prezidenckija vybary kaštuje kala 15 miljonaŭ dalaraŭ.
Pavodle adkrytych źviestak, sam Tał Chanan słužyŭ u izrailskim śpiecnazie i byŭ śpiecyjalistam pa vybuchovych rečyvach. Usiaho ŭ kamandzie minimum 100 supracoŭnikaŭ — tudy imknucca brać ludziej z dośviedam pracy ŭ śpiecsłužbach, u tym liku ŭ Słužbie ŭnutranaj biaśpieki Izraila.
Praca kibiernajomnikaŭ zaklučajecca va ŭzłomie elektronnych pryład, zbory i padrobcy materyjałaŭ, jakija vykarystoŭvajucca dla šantažu, u raspaŭsiudzie dezynfarmacyi, zryvie vybaraŭ i razhortvańni kampanij u sacsietkach. U hrupy jość try tabu: jana nie pravodzić nijakich kampanij u Izraili, nie biarecca za zakazy, źviazanyja z amierykanskimi partyjami, a taksama za tyja, što skiravanyja suprać prezidenta RF Uładzimira Pucina.
Siarod inšaha «Kamanda Chorchie» raspracavała PZ Advanced Impact Media Solutions (AIMS), jakoje nibyta kupili raźviedsłužby bolš čym dziesiaci krain. AIMS stvaraje botaŭ, jakija vykarystoŭvajuć fatahrafii realnych ludziej i ŭdzielničajuć u kampanijach pa dezynfarmacyi na sajtach i ŭ sacsietkach.
Adzin z prykładaŭ pracy AIMS — kampanija na karyść Alaksandra Zinhmana, biznesoŭca z atačeńnia Alaksandra Łukašenki i hanarovaha konsuła Zimbabve ŭ Biełarusi. U sakaviku 2021 hoda Zinhmana aryštavali ŭ Konha pa abvinavačvańni ŭ niezakonnym abaračeńni zbroi, ale paźniej vyzvalili.
Nahadajem, raniej OCCRP praviała rasśledavańnie taho, jak Zinhman i syn nabližanaha da Łukašenki Viktara Šejmana vykarystoŭvali padstaŭnyja afšornyja kampanii, kab schavać vyhadnuju ŭhodu z zołatazdabyŭnaj kampanijaj ź Zimbabve.
Za hod da hetaha AIMS pravodziła «ŭzhodnienuju i aŭtamatyzavanuju» kampaniju ŭ sacsietkach na karyść Zinhmana. Niekatoryja z publikacyj byli skiravanyja suprać jaho kankurenta, jašče adnaho biełaruskaha biznesoŭca Vitala Fišmana. Praz materyjały pa spravie pra paklop, jakuju Fišman vyjhraŭ u ZŠA, žurnalisty vyjavili 35 botaŭ, źviazanych z «Kamandaj Chorchie».
Advakat Zinhmana zajaviŭ, što jaho klijent nikoli nie pracavaŭ z kampanijami, jakija ŭdzielničajuć u raspaŭsiudžvańni dezynfarmacyi.
Nie tolki zbroja i zołata
Letam minułaha hoda biznesoviec i hanarovy konsuł Zimbabve ŭ Biełarusi Zinhman taksama akazaŭsia zamiešany ŭ skandał z kuplaj biełaruskaj pažarnaj techniki na 32 młn dalaraŭ u Zimbabve. Parłamient krainy padazravaŭ, što košt techniki zavyšany, a srodki za kuplu pažarnych mašyn pravodzilisia pa šerych schiemach u abychod publičnaj sistemy zakupak.
Nabyć pažarnuju techniku va ŭradzie Zimbabve płanavali ŭ kampanii, jakoj vałodaje Zinhman. Cana kožnaj mašyny składała 464 296 dalaraŭ. Paśla taho, jak infarmacyja pra ŭhodu stała publičnaj, u Bułavaja, druhim pa vieličyni horadzie Zimbabve, admovilisia kuplać pažarnyja mašyny ź Biełarusi.
Darečy, za hod da taho Zimbabve ŭžo kupiła ŭ Biełarusi kala 11 pažarnych mašyn dla baraćby ź lasnymi pažarami. Uhodu praviali praz dylera pa prodažy biełaruskaj techniki ŭ Afrycy — arabskuju kampaniju Aftrade DMCC, adzin z suŭładalnikaŭ jakoj — Alaksandr Zinhman. Z udziełam biznesoŭca ŭ krainu taksama pastaŭlali sielskahaspadarčaje abstalavańnie i aŭtobusy «na dziasiatki miljonaŭ dalaraŭ», adznačała vydańnie Zimlive.
