Pradstaŭnica Abjadnanaha pierachodnaha kabinietu Alina Koŭšyk patłumačyła, čamu na miedalach takaja fraza.
«Biełaruś pieradusim! — patryjatyčny zaklik-poklič, skiravany na abudžeńnie nacyjanalna-hramadzianskich pačućciaŭ, kansalidacyju biełarusaŭ u abaronu svabody, niezaležnaści svajoj krainy, rodnaj movy, usioj nacyjanalnaj kultury. Adnak hety poklič značna mieniej viadomy za «Žyvie Biełaruś!». Biełaruski nacyjanalny dziejač u Zachodniaj Biełarusi (Polskaj Respublicy) Albin Stapovič napisaŭ pieśniu «Biełaruś pieradusim!», u jakoj byŭ prypieŭ:
Dyk ci ŭ ščaścia dzień pahodny,
Ci ŭ burym dni błahim
Znajma pieršy klič narodny:
Biełaruś pieradusim!
Paźniej hetaja pieśnia stała himnam Sajuza biełaruskaj moładzi i ŭvajšła ŭ «Junacki śpieŭnik», — napisała jana ŭ dyskusii ŭ sacsietkach.
Adsyłku da Sajuza biełaruskaj moładzi, jaki ŭźnik pad niamieckaj akupacyjaj, u sacsietkach paličyli niedarečnaj.
Andrej Łaŭruchin prakamientavaŭ u fejsbuku, što ličyć hetuju frazu na miedalach vialikaj pamyłkaj, bo jana asacyjujecca z pačatkam «Pieśni niemcaŭ», jakuju dla prapahandy vykarystoŭvali nacyjanał-sacyjalisty ŭ 1930-40-ja hady. Hetuju pieśniu 30 studzienia 1933 hoda vykonvali i na fakielnych šeściach, jakija słavili Adolfa Hitlera.
«Asabliva sprečnaj i taksičnaj była jakraz pieršaja strafa «Pieśni niemcaŭ»: «Deutschland, Detschland, über alles!» Mienavita tamu, kali paśla dziesiacihadovych sprečak pra los «Pieśni niemcaŭ», jana z 10 listapada 1991 hoda znoŭ stała dziaržaŭnym himnam abjadnanaj Hiermanii, pieršuju i druhuju strofy prybrali i ciapier himn FRH pačynajecca z treciaj strafy: «Einigkeit und Recht und Freiheit für deutsche Vaterland»!(Adzinstva, prava i svaboda dla Hiermanii rodnaj!). Navošta było stavić mienavita hetuju frazu na miedali, aŭtaram jakoj byŭ, maulaŭ, Albin Stapovič, jaki stajaŭ la vytokaŭ stvareńnia Biełaruskaj nacyjanał-sacyjalistyčnaj partyi (stvoranaja ŭ 1933 hodzie), niezrazumieła. Niaŭžo nielha było znajści postać i asobu, jakaja nie vyklikała b takija pramyja kanatacyi z nacyjanał-sacyjalizmam, nie dyskredytavała demsiły i nie antahanizavała tak biełarusaŭ i biełarusak?» — piša Andrej Łaŭruchin u fejsbuku.
Salidarnaja ź im fiłosafka Volha Šparaha.
«Nie mahu pavieryć, što taki łozunh. Pa-mojmu, heta hańba, a nie honar, — pakinuła jana kamientaryj. — Deutschland über alles naležyć niamieckamu kłasiku, ale niemcam chapiła rozumu admovicca ad hetaha radka paśla jaho vykarystańnia Hitleram».
Abaroncy łozunhu ŭ svaju čarhu zaŭvažajuć, što tady pytańni pavinny być i da ŭkrainskaj patryjatyčnaj frazy «Ukrajina ponad usie».
Sierabrystaja «Pahonia» ŭ łaŭrovym vianku: Kabiniet zaćvierdziŭ uznaharodu za vyklučnuju addanaść u słužeńni Biełarusi
