Fota: Andy Wong, AP
Novaja reforma achovy zdaroŭja ŭ Kitai vyklikała masavyja pratesty piensijanieraŭ i ludziej, jakija im spačuvajuć. Pra heta 9 lutaha paviedamiła vydańnie The Guardian sa spasyłkaj na infarmacyju radyjo «Svabodnaja Azija».
Pratesty prajšli ŭ horadzie Uchani z nadziejaj na pierahlad hetaj reformy, jakaja značna skaračaje miedycynskija vypłaty piensijanieram na fonie rezkaha pavieličeńnia zatrat na achovu zdaroŭja praz Covid-19.
Na videa z twitter-staronki radyjo «Svabodnaja Azija» bačna, jak niezadavolenyja ludzi atačajuć palicejskuju mašynu, śpiavajuć pieśni i vykrykvajuć roznyja łozunhi. Na inšych kadrach tysiačy mitynhoŭcaŭ padychodziać da ŭradavaha budynka va Uchani i vykazvajuć svaju niezadavolenaść palicyi. Niekalki čałaviek było zatrymana.
«Abrabavać prostych ludziej nakštałt nas? Čamu b spačatku vas, čynoŭnikaŭ, nie abadrać, a vašyja lhoty zrezać udvaja? Heta niedapuščalna», — aburajecca adna z pratestujučych žančyn na videa za kadram.
Bolšaść pratestoŭcaŭ — heta byłyja rabotniki mietałurhičnaha zavoda Uchania i inšych dziaržaŭnych pradpryjemstvaŭ. Jany raspaviali, čamu adkryta vyjšli pratestavać.
«My patrabujem, kab našy miedycynskija lhoty byli adnoŭlenyja da pieršapačatkovaha ŭzroŭniu, jaki składaŭ 260 juaniaŭ u miesiac (96 biełaruskich rubloŭ). U mnohich ludziej ich urezali da 88 ci 82 juaniaŭ (30—33 bieł. rub.)», — paviedamili pratestoŭcy.
Piensijaniery pahražali znoŭ vyjści na vulicy 15 lutaha, kali miascovyja čynoŭniki nie adreahujuć nieadkładna. Ułady Uchania spačatku nie adreahavali na pratest, ale praź dzień paśla mitynhaŭ zajavili, što miedycynskija vypłaty sapraŭdy pamienšanyja, ale ŭ žycharoŭ budzie lepšaje miedycynskaje absłuhoŭvańnie i jany na hetym zmohuć aščadzić.
Usio heta adbyvajecca na fonie taho, što centralny ŭrad Kitaja admaŭlajecca ratavać miascovyja biudžety, jakija apuścieli z-za palityki «nulavoha kavidu» staršyni KNR Si Czińpina, jakaja ŭžo da hetaha vyklikała pratesty.
Čytajcie jašče:
Polšča zakryvaje punkt propusku «Babroŭniki» «ź mierkavańniaŭ nacyjanalnaj biaśpieki»
Kitajskaja kavidnaja katastrofa: kitajskija vakcyny słabyja, zachodnich Kitaj nie zakuplaŭ
Ułady Turcyi paraŭnali siłu ziemlatrusu z vybucham 500 atamnych bombaŭ
