«Kali my bačym nieabhruntavany rost cen i što skorabahaćki, učora jakija źjavilisia nieviadoma adkul, stvaryŭšy svaje sietki ŭ handli i hetak dalej, pačali nabivać kišeni, kali zarobak u šarahovych supracoŭnikaŭ kampanii 500 dołaraŭ, a ŭ ich u 46 ci 60 razoŭ bolš. […] Kamitet dziaržkantrolu i ŭrad, šturchanicie tak, kab jany vam nazvali ŭsie fakty, dzie ŭ 30—40 razoŭ «vialikija» dziejačy, kiraŭniki atrymlivajuć zarobak vyšejšy, čym zvyčajny pradaviec i inšyja. […] Da pradaŭcoŭ treba davieści: voś 800 abo tysiača rubloŭ vaš zarobak, a voś 50—60 tysiač zarobak u hetak zvanych uładalnikaŭ», — bušavaŭ siońnia na naradzie Alaksandr Łukašenka.
Što stała pryčynaj?
Jak raskazali «Našaj Nivie» pracaŭniki śfiery handlu, pryčynaj bury stała čarhovaja lehalnaja schiema aptymizacyi padatkaabkładańnia, jakoj karystajucca niekatoryja bienieficyjary biznesaŭ.
Miarkujecca, što adzin z akcyjanieraŭ sietki «Hipa», jak i mnohija biełaruskija biznesoŭcy ciapier, nie pakazvajecca ŭ Biełarusi, žyvie za miažoj, ale aformleny jak rabotnik svajho ofisa i atrymlivaje zarobak.
Nie jasna, što bolš raźjatryła Alaksandra Łukašenku ŭ hetym vypadku — fakt pražyvańnia za miažoj abo niepasredna sam pamier zarobku, jaki naŭrad ci možna nazvać kaśmičnym u paraŭnańni z dachodami prydvornych «biznesmienaŭ udačy» kštałtu Aleksina i Vierabja.
Moža padacca, što vyvodzić hrošy praz dyvidendy bienieficyjaru vyhadniej, čym płacić sabie zarobak jak rabotniku — ź Biełarusi z kožnaj tysiačy rubloŭ zarobku płacicca kala 500 rubloŭ padatkaŭ, zboraŭ i adličeńniaŭ u Fond sacyjalnaj abarony nasielnictva (FSAN). Tady jak u vypadku kešaŭtu praz dyvidendy pryjdziecca płacić tolki 18% i 13%, što vychodzić mienš.
Ale situacyja, kali 18+13 vyhadniej, čym 50, mianiajecca na vialikich ličbach. Isnuje norma, što kali zarobak čałavieka pieravyšaje płanku dziesiać siarednich zarobkaŭ pa krainie, to z sumy, jakaja zvyš, FSAN užo nie naličvajecca. Takim čynam, paśla 10 tysiač dołaraŭ schiema z pracaŭładkavańniem bienieficyjara rabotnikam stanovicca vyhadnaj.
Schiema adpaviadaje dziejnamu zakanadaŭstvu.
«Ja dumaju, što tut byŭ fakt vyvadu hetych hrošaj za miažu, što było vykarystana Łukašenkam dla papulizmu. Ale chaj by Łukašenka raskazaŭ pradaŭcam u «Tabakierkach», kolki zarablaje Aleksin», — aburajecca mieniedžar adnoj z praduktovych sietak, jakaja raniej užo traplała pad represii.
Surazmoŭca «Našaj Nivy» nie vieryć, što dachody top-mieniedžaraŭ vialikich kampanij udasca abmiežavać.
«Mienš nichto atrymlivać u lubym razie nie stanie — prosta buduć vypłaty ŭ kanviertach. Z druhoha boku, tut orhanam zaŭsiody rabota budzie — łavić. Tak i žyviom, u zahannym kole», — dadaŭ jon.
Čytajcie taksama: Pahrom u sietcy «Susiedzi»: KDK zatrymaŭ amal usio kiraŭnictva
Čytajcie taksama: «Kampaniju my vyrazajem»: zatrymany ŭłaśnik kramaŭ «Hryn» i HC «Skała» Hienadź Kirejkaŭ
