Darečy, skuns nie ŭvachodzić u śpis žyvioł, jakich zabaroniena trymać u kvatery.
Volha žyvie z chłopcam u minskaj kvatery. Kaža, zvyčajnyja kociki dy rybki — heta zanadta prosta, nie dla jaje. Adnojčy ŭ internecie natknułasia na žančynu, jakaja metanakiravana razvodzić skunsaŭ. Padobna na toje, što za miažoj heta ŭžo pierśpiektyŭny trend. Praź niekatory čas u Minsk prybyła pieršaja maładaja samka. Nazvali Bułačkaj. Naturalna, zaviali instahram.
Dziciania skunsa kaštuje kala $1000. Haspadynia kaža, hetaja Bułačka atrymałasia nastolki viartlavaja, što jaje amal niemahčyma narmalna sfatahrafavać.
— Vielmi cikaŭnaja drapiežnica: usio joj treba pahladzieć, usiudy praleźci, usio vyśvietlić, — zachoplena raskazvaje dziaŭčyna. — I ŭvieś čas sprabuje ściahnuć ježu, asabliva tuju, jakuju joj nielha. Kolki ni karmi — viečna hałodnaja. Kormim kurycaj i indyčkaj, sabačym kormam, harodninaj i sadavinaj. Jašče vielmi lubić dziciačyja piure z trusam, nie adarvać. Nu i jość pastajannaja meta ŭ žyćci — ściahnuć kavałačak torta abo šakaładki. Tolki joj nielha. Starajemsia, voś, nie dapuścić atłuścieńnia.
Volha raspaviadaje, što charaktaram jaje skunsicha nahadvaje adnačasova i katoŭ, i sabak — łaskavaja, pryjaznaja, tavaryskaja, addanaja. Pry hetym vielmi achajnaja. Siabruje ź dziuma ptuškami angry birds, inšyja cacki nie ŭsprymaje.
Złavacca Bułačka asabliva nie ŭmieje, ale pryłaŭčyłasia aburacca:
— Kali niezadavolenaja, to vydaje dziŭnyja, ni da čoha nie padobnyja huki, naprykład, kali nie razumieje, što adbyvajecca: navošta my čyścim jaje domik abo kali zanadta rana, na jaje dumku, sadžajem u hety domik pierad snom.
Drać meblu ci zajmacca inšym škodnictvam pieršy biełaruski skuns pakul nie dumaje. Chiba što časam, pa słovach Volhi, sprabuje prykrucić plintus tam, dzie jon adyšoŭ.
Ale jość hałoŭnaje pytańnie. Kažuć, što skuns svaim strumieniem zdolny paralizavać pracu nievialikaha ahraharadka. Pra pach raspaviadajuć žachi.
— Sama pa sabie jana nie maje niepryjemnaha pachu, — tłumačyć haspadynia. — Miech davoli pryjemna pachnie, nie jak sabaka abo kot. A što datyčyć strumienia, to svojskim skunsam u dziciačym uzroście vydalajuć analnyja załozy — «atakavać» paśla hetaha jany nie mohuć.
Bułačcy ciapier try miesiacy. Nieŭzabavie treba budzie zrabić kamplekt sabačych pryščepak — i možna adpraŭlacca na pavadku hulać pa Minsku.
